गण्डकीमा एमालेको हिसाबकिताब– गठबन्धनसँग लड्दा २७ स्थानीय तह जित्ने

A+ A A-

गण्डकी प्रदेशका ८५ स्थानीय तहमध्ये ३९ वटामा नेकपा (एमाले)को नेतृत्व छ । एमाले गण्डकी प्रदेशले सम्मुख स्थानीय चुनावको सम्भावित जित–हारको आकलनसहित हिसाबकिताब निकालेको छ ।

गण्डकी प्रदेश कमिटीले आउँदो स्थानीय तहको चुनावको सम्भावित परिणामबारे तयार पारेको रिपोर्ट गत ९ र १० चैतको पार्टीको केन्द्रीय कमिटी बैठकमा प्रदेश अध्यक्ष नवराज शर्माले प्रस्तुत गरिसकेका छन् ।

३० वैशाखको चुनावमा विपक्षीको गठबन्धन नभए ११ जिल्लामा थप ११ वटा पालिका जित्ने एमालेको प्रक्षेपण छ । गठबन्धन भएमा हालभन्दा १२ वटा पालिकामा क्षति हुने र २७ वटामात्रै जित्ने अनुमान छ । एक्लै लडेमा ५० पालिका जित्ने, स्थानीय आवश्यकता हेरेर अन्य दलसँग एकता हुँदा ८१ पालिका जित्ने, विपक्षी गठबन्धनसँग एक्लै लड्दा जम्मा २७ पालिका जित्न सक्ने रिपोर्टमा उल्लेख छ ।

पार्टी केन्द्रीय सदस्य भीम कार्की २७ पालिका गठबन्धन भए पनि जित्ने पक्का रहेकाले केन्द्रीय कमिटीमा उक्त ब्रिफिङ गरिएको बताउँछन् । तर, २७ बाहेकका पालिकामा मिहिनेत गरेमा जित्न सक्ने उनको भनाइ छ । ‘२७ वटा पालिका जितिसक्यौँ भनेर राखिएको हो,’ कास्की जिल्ला इन्चार्जसमेत रहेका नेता कार्कीले शिलापत्रसँग भने, ‘त्यसपछि ३८ पालिका अत्यधिक सम्भावना छ र बाँकी पालिकामा हामी धेरै मिहिनेत गर्नुपर्छ भन्ने ढंगले गएको हो ।’

कास्कीका सबै पालिकामा क्लिन स्वीप गर्ने दाबी रिपोर्टमा गरिएको छ । एक महानगर र चार गाउँपालिका रहेको कास्कीमा सबै पालिका जित्ने दाबी एमालेको छ । गठबन्धन भएमा कास्कीमा एउटा पालिका पनि नजित्ने आन्तरिक अनुमान छ ।

एमालेले गठबन्धनविरुद्ध स्याङ्जामा आफूलाई दह्रो ठहर्‍याएको छ । ११ पालिका रहेको स्याङ्जामा गठबन्धनविरुद्ध एक्लै लड्दा पनि आठ जित्ने दृढता एमालेको रिपोर्टमा उल्लेख छ । स्याङ्जामा अहिले सात पालिकामा एमालेको नेतृत्व छ । स्याङ्जा एमाले सचिव पद्म अर्यालको गृहजिल्ला हो ।

गोरखामा एमालेको नेतृत्वमा अहिले एउटा पनि पालिका छैन । अब तीन वटा पालिका जित्न सक्ने आकलन गरिएको छ । स्थानीय आवश्यकताअनुसार एकता भएर चुनाव लडेमा थप ५ पालिका जित्ने दाबी एमालेको छ । गोरखामा ११ पालिका छन् । विपक्षीको गठबन्धन भएमा त्यहाँ पनि शून्य हुने प्रक्षेपण गरिएको छ ।

जिल्लास्तरीय पार्टी प्रवेश कार्यक्रम बढेको, जनप्रतिनिधिले पनि अरु पार्टी परित्याग गरेर एमाले आएको, अन्य दलका केन्द्रीय नेताले पनि एमाले रोजेकाले एक्लै चुनाव भएमा स्थानीय तहमा हालभन्दा बढी पालिका जित्ने एमालेको अनुमान छ । एमालेप्रति जनताको समर्थन देखिएको र पार्टी प्रवेश कार्यक्रमले झनै शक्तिशाली भएको दाबी नेता कार्की गर्छन् ।

‘हामीले गरेका कामका सन्दर्भमा जनताबाट विरोध छैन, पार्टीप्रति समर्थन व्यापक छ,’ नेता कार्कीले थपे, ‘हामी सरकारमा छैनौँ, कसैलाई केही दिने अवस्थामा छैनौँ तर, पनि पार्टी प्रवेशको अभियानले नेकपा एमाले देशको शक्तिशाली पार्टी हो भन्ने प्रमाणित गरेको छ ।’

स्थानीय शक्ति सन्तुलनलाई ख्याल गरेर तालमेलका लागि वा पार्टीमा ल्याएर भए पनि सन्तुलन मिलाउन ध्यान दिन प्रदेश कमिटीले नेतृत्वलाई रिपोर्टमार्फत सुझाव दिएको छ ।

यस्तो छ एमालेले गरेको हिसाबकिताब