स्थानीय तहः चौतारा साँगाचोकगढीले दियो वडालाई बढी बजेट

A+ A A-

आगामी आर्थिक वर्षका लागि सिन्धुपाल्चोकका १२ स्थानीय तहमध्ये १० स्थानीय तहले आफ्नो नीति तथा कार्यक्रम र बजेट सार्वजनिक गरिसकेका छन् । प्राय: स्थानीय तहले निर्धारित १० असारभित्रै नीति कार्यक्रम र बजेट सार्वजनिक गरेका थिए ।

१२ स्थानीय तहमध्ये चौतारा साँगाचोकगढी नगरपालिकाले वडाहरुमा सबैभन्दा बढी बजेट पठाएको छ । नगरपालिकाको १४ वडामा प्रति वडा १ करोड ५० लाख रुपियाँका दरले बजेट पठाएको नगरप्रमुख अमानसिं तामाङले जानकारी दिए ।

वडालाई विकासमा बढी जिम्मेवार बनाउन पर्याप्त बजेट दिएको मेयर तामाङले जानकारी दिए । ‘धेरै कामहरु वडाबाटै हुन्छन् त्यसैले वडालाई बढी बजेट दिँदा, वडाहरु जिम्मेवारी हुन्छन्, मेयर तामाङले भने ।

तीन नगरपालिकामध्ये मेलम्चीपछि दोस्रो आन्तरिक आय बढी भएको नगरपालिका चौतारा साँगाचोकगढी हो । मेलम्ची नगरपालिकाले नीति तथा कार्यक्रम सार्वजनिकीकरण गरे पनि बजेट भने बाँडफाँट गर्न बाँकी नै छ । गत वर्ष मेलम्ची नगरपालिकाले ८० लाखसम्म वडाहरुलाई बजेट दिएको थियो ।

बाह्रबिसे नगरपालिकाले ५० र बढीमा ८० लाखसम्म बजेट वडा कार्यालयलाई दिएको बाह्रबिसे नगरपालिका प्रमुख निमफुन्जाे शेर्पाले जानकारी दिए । आन्तरिक आम्दानी कम भएकोले स्रोतको अवस्था हेरेर बजेट पठाएको मेयर शेर्पाले जानकारी दिए ।

गाउँपालिकाले भने बढीमा ६० लाखसम्म बजेट वडाहरुलाई दिएको छ । सुनकोसी गाउँपालिकाले सबै वडामा ६० लाख रुपैयाँका दरले बजेटको सिलिङ पठाएको छ ।

वडामा बजेट पर्याप्त पठाए पनि यो वर्ष पनि जिल्लाका सबै वडाले ३० हजारसम्मका योजनाका लागि बजेट विनियोजन गरेका छन् । लिसंखुपाखर गाउँपालिकाले भने यो वर्ष बजेट नछर्ने नीति ल्याएकाले साना योजनामा बजेट विनियोजन गरेको छैन ।

एउटा वडाले कम्तीमा १० लाखसम्मका योजना छनोट गर्नुपर्ने बाध्यकारी व्यवस्था गरेको थियो । यो व्यवस्थाअनुसार सातै वडाले एउटा ठूला योजनामा बजेट विनियोजन गरेका छन् । सातमध्ये ६ वडाले १५ लाख र वडा नम्बर ७ ले २० लाखको एउटा योजना गाउँपालिकामा पेस गरेका छन् ।

पहिलो सडक, दोस्रो शिक्षा

जिल्लाका सबै स्थानीय तहको यो वर्षको बजेटको प्राथमिकतामा सडक नै परेको छ । वडामा पठाएको बजेटदेखि गाउँपालिका र नगरपालिकाले विनियोजन गरेका बजेटमा अधिकांश योजना सडकमा नै छ ।

सडक स्तराेन्नति, ग्राभेल, कालोपत्रेलगायतका सडक सुधारमा वडा र गाउँ/नगरमा बजेट विनियोजन गरिएको छ । जिल्लाका १२ स्थानीय तहमध्ये चौतारा साँगाचोकगढीका केही वडाले भने वडाको बजेटबाटै सडकमा कालोपत्रे सुरुवात गरेका छन् ।

वडा कार्यालयसम्म पुग्ने सडकमा गत वर्षदेखि नै कालोपत्रे सुरुवात गरिएको चौतारा साँगाचोकगढी नगरपालिका १३ का अध्यक्ष रामप्रसाद गौतमले जानकारी दिए । यो वर्ष पनि वडाले कालोपत्रेका लागि बजेट विनियोजन गरेको वडा अध्यक्ष गौतमले जानकारी दिए । चौतारा साँगाचोकगढीको ९ र १४ वडाले कालेपत्रेका लागि क्रमश ५० र २५ लाख बजेट वडाबाटै विनियोजन गरेका छन् ।

सडकपछि स्थानीय तहले शिक्षालाई प्रमुख प्रथामिकतामा राखेका छन् । विद्यालय सुधारमा स्थानीय तहको विशेष ध्यान गएको छ । स्थानीय तहले शैक्षिक सम्मेलनको आयोजना गरेर शिक्षालाई प्राथामिकतामा राखेको बाह्रबिसे नगरपालिकाका उपप्रमुख सुशीला पाख्रिनले जानकारी दिइन् ।

वडा कार्यालयले पनि शिक्षा क्षेत्रलाई प्राथमिकतामा राखेका छन् । चौतारा साँगाचोकगढी नगरपालिकाको १३ नम्बर वडाले शिक्षा क्षेत्रका लागि मात्रै २८ लाख बजेट विनियोजन गरेको वडा अध्यक्ष गौतमले बताए ।

प्रकाशित मिति: शुक्रबार, असार २०, २०७६ २१:०९