प्रधानमन्त्री रोजगार कार्यक्रम सुरु, बेरोजगार भए भत्ता पाइने

A+ A A-

सरकारले आजदेखि प्रधानमन्त्री रोजगार कार्यक्रम लागू गरेको छ ।

श्रम रोजगार तथा सामाजिक सुरक्षा मन्त्रालयले काठमाडौको राष्ट्रियसभा गृहमा आयोजना गरेको कार्यक्रममा प्रधानमन्त्री केपी शर्मा ओलीले प्रधानमन्त्री रोजगार कार्यक्रमको शुभारम्भ गरे । कार्यक्रमको शुभारम्भ गर्दै प्रधानमन्त्री ओलीले समृद्द नेपाल बनाउने यो नयाँ अभियान भएको बताए ।

प्रधानमन्त्री ओलीले र राजनीतिक समस्या टुंग्याएर सुशासनको बाटोमा गएकाले सरकारसँग स्पष्ट नीति, उद्धेश्य, गन्तव्य स्पष्ट भएको भन्दै स्थिर नीतिका साथ सरकार अघि बढेको उल्लेख गरे । प्रदेश ३ का मुख्यमन्त्री डोरमणि पौडेलले प्रदेश सरकार यो अभियानलाई सार्थक बनाउन प्रतिवद्द रहेको बताऐ ।

कार्यक्रमले समृद्द नेपाल बनाउने बलियो आधार तयार भएको मुख्यमन्त्री पौडेलको भनाई थियो । देशभर सुरू भएको यो अभियानले सरकार प्रतिको भ्रम चिर्ने समेत उनले उल्लेख गरे ।

कार्यक्रममा अर्थमन्त्री युवराज खतिवडाले कार्यक्रमले उत्पादन र उत्पादकत्व बढाउने उल्लेख गर्दै अबको श्रम औपचारिक हुनु पर्नेमा जोड दिए । उनले प्रधानमनत्री रोजगार कार्यक्रमले रोजगारी प्रत्याभूति गर्ने दावी गरे ।

श्रम, रोजगार तथा सामाजिक सुरक्षा मन्त्री गोकर्ण विष्टले सबैका लागि रोजगार संवैधानिक अधिकार भन्ने नाराका साथ यो अभियान सुरू भएको जानकारी दिदै रोजगार कार्यक्रम अन्तर्गत एक आर्थिक वर्षमा न्यूनतम १ सय दिनको रोजगारी सरकारले दिन नसके १ सय दिनकै निर्वाह भत्ता दिने बताए ।

प्रधानमन्त्री रोजगार कार्यक्रम निर्दे्शिका अनुसार परिवारको कुनै पनि सदस्यले न्यूनतम रोजगारी नपाए, सरकारले तोकेभन्दा कम वार्षिक आय भएका परिवार भएमा, परिवारको कुनै सदस्य स्वरोजगार नभएमा या परिवारका कुनै पनि सदस्य वैदेशिक रोजगारीमा नभएमा मात्रै निर्वाह भत्ता दिइनेछ ।

प्रकाशित मिति: बिहीबार, फागुन २, २०७५ ०४:४६