जो आफूले थाहा नपाउँदै रातारात 'स्टार' बने

A+ A A-

बादाम बादाम दादा काँचा बादाम
आमार काछे नाइतो बूबू वाजा बादाम
आमार काछे पाबे सुधु वाजा बादाम

०००

इन्टरनेटमा तपाईंले 'काँचा बदाम' बाेलकाे गीत त सुन्नुभएकै होला । याे बंगाली गीतले सर्वसाधारणदेखि नामी कलाकारलाई समेत नचाइसकेकाे छ । रूपा गाङ्गाेली, सुटर हजुरआमाहरू (चन्द्रो तोमर र प्रकाशी तोमर), ब्राजिलका चर्चित बुबा-छाेरी पाब्लो र भेरोनिका, न्याला उषादेखि नेपाली सेलेब्रिटीसम्मले काँचा बदाममा 'ठुम्का' लगाएका छन् । युट्युब, फेसबुक, टिकटक, इन्स्टाग्राम रिल्सलगायत प्लेटफर्ममा याे गीतकाे 'क्रेज' लाेभलाग्दाे छ । काँचा बदामकाे 'रिमिक्स'ले युट्युबमा १ सय ८६ मिलियन भ्युज पार गरिसकेकाे छ । याे गीतले मानिसहरूलाई नचाएको मात्र छैन, कसैको जिन्दगीसमेत बदलिदिएकाे छ ।

वर्ष दिनअघिसम्म पश्चिम बंगालकाे बीरभूम जिल्लास्थित एक गाउँमा बदाम बेच्ने भुवन बड्याकरलाई याे गीतले रातारात साेसल मिडिया स्टार बनाइदिएकाे छ ।

ग्राहक तान्न उनले याे गीतलाई मार्केटिङ टुलका रूपमा प्रयोग गर्थे । सदाझैँ एक दिन उनी बदाम बेच्दै गीत गाइरहेका थिए । त्यही बेला एक ग्राहकले भिडियाे खिचेर युट्युबमा अपलाेड गरिदिए । याे कुरा भुवनले थाहै पाएका थिएनन् । नाेभेम्बर २०२१ मा अपलाेड गरिएकाे भिडियाेले यति भ्युज बटुल्याे, युट्युबमा राख्नेले पनि सायदै कल्पना गरेका थिए । गीतलाई कसैले कोरियोग्राफ गरिदियो । अनि इन्स्टाग्राम र टिकटकमा काँचा बदाम च्यालेञ्ज सुरु भयो । मानिसहरूले यो गीतमा रिल्स बनाउन थाले । यसमा भारतका मात्र होइन, विदेशका इन्टरनेट प्रयाेगकर्ता पनि छन् । भारतीय मिडियाका अनुसार भुवन एक सोझासिधा व्यक्ति हुन् । उनलाई सामाजिक सञ्जालका बारेमा कुनै जानकारी छैन ।

आफ्नो भिडियो अपलोड भएको थाहा पाउँदासम्म साेसल मिडियामा 'सेन्सेसन' बनिसकेका भुवनले पछि यही गीतलाई पेपी रिमिक्स गर्ने क्रममा हरियाणाका गायक अमित ढुलसँग काम गर्ने माैका पाए ।नवीनतम म्यास-अपमा ढुलकाे हरियाणवी गीतसँग भुवनकाे मूल गीत मिसाइएकाे छ । दर्शकमाझ याे गीत यति लाेकप्रिय छ, युट्युबमा म्युजिक भिडियाेले २० मिलियनभन्दा ज्यादा भ्युज पाइसकेकाे छ ।टिकटकलगायतका साेसल मिडिया प्लेटफर्ममा याे गीतकाे अंशमा लाखाैँले भिडियाे बनाएका छन् ।

पछि यो गीतको र्‍याप भर्सन गोधुली बेला म्युजिकले भुवन, रोन ई र पज्ञा दत्तको आवाजमा ल्यायो । युट्युबमा यो भिडियोको भ्युज १२ कराेड १८ लाखभन्दा ज्यादा छ । भुवनका छुट्टाछुट्टै गीतहरूमा दशौँ लाख भ्युज छ ।

उनी स्टार बने । भारतबाट मात्र होइन, श्रीलंकाबाट समेत युट्युबरहरू आएर उनको भिडियो बनाएर लगे । तर, उनले फुट्टीसुक्काे पाएनन् । उनको गीतबाट थुप्रैले थुप्रै पैसा कमाए तर दिनको तीन/चार सय कमाउन कराउँदै गाउँ घुम्नुपर्ने उनको बाध्यता अन्त्य भएन । यहाँसम्म कि, गीतलाई आधिकारिक रूपमा रेकर्ड गरी सार्वजनिक गरेको म्युजिक कम्पनीले समेत उनलाई रोयल्टी दिएन ।

भुवन बीरभूम जिल्लाकाे लक्ष्मीनारायणपुर पञ्चायतस्थित कुरालजुरी गाउँका हुन् । भारतीय मिडियाका अनुसार याे गाउँ यति विकट छ, यहाँ टाढाटाढासम्म पक्की सडक र घर देख्न पाइँदैन । गाउँलेहरू मजदुरी गरी पेट पाल्छन् । भुवन पनि एक छाप्राेमा बस्छन् । वर्षैपिच्छे त्याे घर मर्मत गर्नुपर्छ । उनकाे आयस्रोत नै बदामको दैनिक व्यापार हो । पैसामा मात्र नभएर कवाडी सामान लिएर पनि उनी बदाम दिन्छन् । पत्नी र दुई बच्चाको पेट भर्न उनले दैनिक कमाएको तीनदेखि चार सय पुग नपुग हुन्छ ।

धेरैलाई लागेको थियो, स्टार बनेसँगै १० वर्षदेखि दिनैपिच्छे ढकीमा बदाम बोकेर हिँड्नुपर्ने भुवनको बाध्यता अब हट्नेछ । तर यसो भएन । उनको कला देखाएर युट्युबलगायतका सोसल मिडिया प्लेटफर्मबाट पैसा कमाउनेहरूले उनलाई एक रुपैयाँ पनि दिएनन् । सोसल मिडियामा पाएको ख्यातिले उनको जीवनस्तरमा सुधार ल्याएन । उनी अन्यायमा परेको थाहा पाएपछि गाउँलेले उनको भिडियो खिच्न प्रतिबन्ध लगाए । सामाजिक सञ्जालमा पनि उनको पक्षमा धेरैले आवाज उठाए । केही साताअघि गोधुली बेला म्युजिकले भुवनलाई ३ लाख रुपैयाँ रोयल्टी दिएको छ । साथै, उनीसँग अर्को एक कामका लागि सम्झौतासमेत गरेको छ । एक अन्तर्वार्तामा भुवनले भनेका छन्, 'मेरो गीतमा मान्छे नाच्न थालेका छन्, यसको अर्थ म सेलेब्रेटी बनेको छु । अब मैले बदाम बेचे पनि मान्छेले त्यो किन्दैनन् । किनकि, उनीहरू मेरो गीत सुन्न चाहन्छन् ।' यो गीतपछि भारतका प्रसिद्ध गायक–गायिकाले उनीसित काम गर्ने इच्छा गरेका छन् । उनले अब पैसा पनि कमाउनेछन् ।

भुवनभन्दा अगाडि 'जानु मेरी जाने मन, बचपनका प्यारा मेरा भुल नहीँ जाना रे' बाेलकाे गीत साेसल मिडियामा भाइरल भएपछि बालक सहदेव रातारात स्टार बने । टिकटकमा याे गीत आजपर्यन्त चर्चित छ । ती बालकलाई गायक बादशाहले आफूसँग गाउने माैका दिए । अहिले ती बालककाे जीवनस्तर पूरै बदलिएकाे छ । बादशाहले सहदेवका साथ गाएकाे बचपनका प्यार नामक गीत सुपरहिट छ ।

प्रतिभाशाली र सिर्जनशील मानिसहरूका लागि इन्टरनेट प्लेटफर्म 'वरदान' साबित हुन सक्छ भन्ने अर्काे उदाहरण हुन् गायिका रानु मण्डल । तीन वर्षअघिसम्म कोलकाताको एक रेलवे स्टेसनमा गीत गाएर गुजारा चलाउँथिन् ६० वर्षीया रानु मण्डल ।

उनी रेलवे स्टेसननजिकै रहेको एउटा गाउँको झुपडीमा बस्थिन् । श्रीमान् वर्षौं पहिले संसारबाट बिदा भइसकेका थिए । आमा अत्यन्तै गरिब र मागेर खानुपर्ने अवस्थाकी भएकाले छोरीले पनि उनलाई १० वर्षअघि नै छाडेर हिँडिन् । त्यसपछि कहिल्यै ‘आमा तिमीलाई कस्तो छ’ भनेर सोध्न आइनन् । रानु विल्कुल एक्ली र बेसहारा थिइन् । काली वर्णकी रानु बिरामी र कमजोर शरीरलाई बचाउन संघर्ष गरिरहेकी थिइन् ।

उनीसँग भौतिक सम्पत्ति केही पनि थिएन । न रेखदेख गरिदिने आफन्त नै । खान लाउनै धौधौ थियो । तर, उनीसँग यी सबैभन्दा ठूलो सम्पत्ति थियो, उनको गला । त्यही गलाले एक दिन उनको जीवन कायापलट गराउनेवाला थियो ।

एक दिन रेलवे स्टेसनमा उनी गीत गाइरहेकी थिइन् । वरिपरिका मान्छे उनलाई सुनिरहेका थिए । त्यत्तिकैमा अतेन्द्र चक्रवर्ती नाम गरेका युवा पनि त्यो भिडमा आइपुगे । गीत गाउन आग्रह गर्दै अतेन्द्रले रानुलाई चिया र बिस्कुट किनेर खुवाए । रानुले बलिउडकी लेजेन्ड लता मंगेश्करको ‘एक प्यार का नगमा है, मौजों की रवानी है’ गीत गाइन् । अतेन्द्रले बनाएकाे भिडियो युट्युबमा पोस्ट गरिदिए । रानुलाई जीवनको उत्तरार्द्धमा एउटा ठूलो र अकल्पनीय सफलताले पर्खिरहेको थियो । त्यो सफलताको ढोका खोलिदिएका थिए, अतिन्द्रले । ‘एक प्यार का नगमा है’ले रानुलाई कहाँबाट कहाँ पुर्‍यायो । भनिन्छ, उनको स्वर पनि लता मंगेश्करको जस्तै छ । रानु पहिलेदेखि नै गाउनमा पोख्त थिइन् । किशोर अवस्थादेखि नै उनले गाउन थालेकी हुन् । तर, उनी आर्थिक रूपमा विपन्न थिइन् । आफूलाई अब्बल साबित गराउन रानुसँग सामर्थ्य थिएन । त्यसैले उनले आफूलाई साबित गराउन ६० वर्षको उमेरसम्म कुर्नुपर्‍याे ।

सामाजिक सञ्जालमा उनले गाएको गीत भाइरल बन्यो । रातारात उनलाई त्यो गीतले बलिउडको यात्रा गरायो । हिमेश रेशमियादेखि बलिउड स्टार सलमान खानसम्मले उनलाई सहयोग गरे । टिकटकमा ‘तेरी मेरी, तेरी मेरी’ कहानी बाेलकाे गीतले केही महिना ट्रेन्डिङ सेक्सन कब्जा गरेकाे थियाे । यो गीतको सुरुवात महिलाको सुमधुर आलापबाट हुन्छ । सुरु भइसकेपछि यो गीत पूरै सुन्न मन लाग्छ । हिमेश रेशमियासँग यो गीत गाउने गायिका अरु कोही नभएर रानु मण्डल नै हुन् ।

पछि रानुलाई बलिउड स्टार सलमान खानले ५५ लाख भारुमा घर किनिदिएकाे चर्चा थियाे । हिमेशले आफ्नो गीतमार्फत रानुलाई बलिउडमा डेब्यु गराए । अरु थुप्रैले रानुसँग काम गरिसकेका छन् । आमा रातारात सेलिब्रेटी भएपछि १० वर्षअघि छाडेर गएकी छोरी पनि फर्केर आइन् ।

१५/२० वर्षको उमेरमै ‘फ्रस्टु भइयो’ भन्नेहरूका लागि उदाहरण हुन सक्ने अर्का व्यक्ति हुन् अमेरिकी टेड विलियम्स । भिख मागेर गुजारा चलाउने टेड विलियम्सले एकताका विश्वभर चर्चा पाएका थिए । अमेरिकाको ब्रुकलिनमा जन्मिएका उनी आफ्नो खराब आदत र आर्थिक अभावका कारण सडकमा भिख मागेर पेट भर्थे । बेसहारा, रोगी उनी बुढो शरीर लिएर जिउन संघर्ष गरिरहेका थिए । लागुऔषध दुर्व्यसनका कारण उनले दुई पटक जेलको हावा खानुपरेको थियो । जेलबाट निस्केपछि टेड विलियम्स ‘मेरो आवाज निकै मोटो र सुरिलो छ’ भनेर लेखिएकाे प्लेकार्ड देखाएर भिख माग्थे ।

राति पेट्रोल पम्पको पछाडि राखिएका टेन्टमा गएर सुत्ने उनीमाथि एक रिपोर्टरको नजर पर्‍याे । प्लेकार्डतिर केन्द्रित भएर रिपोर्टरले टेडको अन्तर्वार्ता लिन थाले । टेडकाे बाेली सुनेर रिपोर्टर छक्क परे । उनको आवाज दमदार थियाे । रिपोर्टरले टेड विलियम्सको अन्तर्वार्ता भिडियो युट्युबमा अपलोड गरिदिए । युट्युबको त्यो भिडियो रातारात भाइरल बन्यो । गुगलमा टेड विलियम्स व्यापक खाेजिन थाले । लगत्तै न्युयोर्कको एउटा टिभी च्यानलले कर्मचारीका रूपमा टेडलाई ल्याउन अन्तर्वार्ता लियो र उनी छानिए पनि । त्यसपछि टेडले ट्रेनरका रूपमा पनि काम गर्न थाले । उनले ठूलाठूला कर्पोरेट कम्पनीका विज्ञापनमा आवाज दिए । कतिपय भिडियोमा उनी खेले । यसरी कुनै बेला सडकमा भिख माग्ने टेड विलियम्स रातारात स्टार बने । अहिले अमेरिकाको लब्धप्रतिष्ठित व्यक्तिका रूपमा परिचित छन् टेड विलियम्स । उनले आफ्नो संघर्ष र सफलताका बारेमा किताब पनि लेखेका छन् ।

चाहे बालक सहदेव हुन् वा ६० नाघेका भुवन, रानु र टेड, यिनकाे सफलताले पुष्टि गर्छ, क्षमता भएका मान्छेको भाग्य खुल्न कुनै उमेर वा परिवेश चाहिँदैन ।

प्रकाशित मिति: आइतबार, चैत २०, २०७८ १६:३३