प्रदेश १ मा वडा तहसम्मै तालमेल गर्ने गठबन्धन दलमा सहमति, असर नपार्ने एमालेको प्रतिक्रिया

प्रदेश १ मा वडा तहसम्मै तालमेल गर्ने गठबन्धन दलमा सहमति, असर नपार्ने एमालेको प्रतिक्रिया

A+ A A-

सत्ता गठबन्धनमा आवद्ध दलहरूले आगामी ३० वैशाखमा हुने स्थानीय तहको चुनावमा प्रदेश १ का सवै स्थानीय तहमा चुनावी तालमेल गर्ने भएका छन् । गठबन्धनका दलहरू प्रदेशका १३७ वटै पालिका र ती पालिकाका सवै वडामा चुनावी तालमेल गरेर अघि बढ्ने भएका हुन् ।

शनिवार इटहरीमा बसेको प्रदेश १ का सत्ता गठबन्धनमा आवद्ध प्रमुख दलका नेताहरूको बैठकले प्रदेशका वडा तहसम्म चुनावी तालमेल गर्ने निर्णय गरेको जनता समाजवादी पार्टी (जसपा) प्रदेश १ का अध्यक्ष प्रवीण चाम्लिङले जानकारी दिए । ‘बैठकमा गठबन्धनलाई मजबुद बनाएर लाने सहमति भएको छ । वडा तहसम्मनै संयन्त्र बनाएर चुनावी तालमेल गरेर अघि बढ्ने हाम्रो निर्णय हो’, उनले शिलापत्रसँग भने, ‘अहिले नै भागवण्डामा कुरा मिलिसकेको होइन । त्ययसका लागि एउटा नीति बनेको छ । स्थानीय स्तरमै छलफल गरेर निर्णय लिइन्छ ।’

गठबन्धनमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी र संयुक्त लोकतान्त्रिक राष्ट्रिय मञ्च आवद्ध छन् । तर, बैठकमा संयुक्त लोकतान्त्रिक राष्ट्रिय मञ्चबाहेक अन्य प्रमुख चार दलका नेताहरूको मात्र सहभागिता रहेको जनाइएको छ ।

अध्यक्ष चाम्लीङले कुन पालिका कसले लिने भन्ने विषयमा गठबन्धन दलहरूले आन्तरिक छलफल गरेर अन्तिम टुंगो लगाउने सहमति बनेको जानकारी दिए । उनका अनुसार चुनावी गठबन्धनका लागि बैठकले कार्यदलसमेत बनाउने निर्णय गरेको छ । कार्यदलमा सत्ता गठबन्घधनको प्रमुख दल नेपाली कांग्रेस प्रदेश १ का सभापति उद्धव थापा, महामन्त्री उमेश थापा, नेकपा माओवादी केन्द्रका प्रदेश अध्यक्ष हर्कबहादुर नेम्वाङ, उपाध्यक्ष शिवकुमार डाँगी, एकीकृत समाजवादीका प्रदेश अध्यक्ष बलदेव चौधरी, उपाध्यक्ष धर्म निरौला र जनता समाजवादी पार्टीका प्रदेश अध्यक्ष चाम्लिङ रहेका छन् । बैठकले प्रदेशका पार्टी प्रमुखहरू रहेको अनुगमन संयन्त्र पनि बनाएको छ ।

सो बैठकमा नेपाली कांग्रेसबाट प्रदेश १ सभापति उद्धव थापा, माओवादी केन्द्रका प्रदेश अध्यक्ष हर्कबहादुर नेम्वाङ र उपाध्यक्ष शिवकुमार डाँगी, नेकपा (एकीकृत समाजवादी) का प्रदेश इन्चार्ज घनेन्द्र बस्नेत, अध्यक्ष बलदेव चौधरी र जनता समाजवादी पार्टीका प्रदेश अध्यक्ष प्रवीण चाम्लिङलगायतको सहभागिता रहेको जनाइएको छ ।

प्रदेश १ मा सत्ता गठबन्धनका दलहरूले चुनावी तालमेल गर्ने भएपछि अघिल्लो चुनावमा अधिकांश स्थानीय तह जितेको नेकपा (एमाले) प्रदेश १ का अध्यक्ष तुलसी न्यौपानेले भने गठबन्धनले एमालेलाई कुनै असर नपर्ने बताएका छन् । उनले अघिल्लो चुनावमा पनि एमालेविरुद्ध गठबन्धन भएको बताउँदै यसपटक पनि एमालेले आफ्नो बर्चस्व कायम राख्ने दावी गरेका छन् ।

‘अहिले औपचारिक भनेर गठबन्धन गरे । अघिल्लो निर्वाचनमा पनि उसले उसलाई सघाउने भनेर अघोषित गठबन्धन गरेकै हुन् । उनीहरू एक्लै सामना गर्न सामथ्र्य राख्दैनन्’, उनले शिलापत्रसँग भने, ‘मुलुकको राजनीति दुईवटा पोलमा पोलराइज भइरहेको छ । बाम शक्ति र दक्षिणपन्थी शक्तिहरू एक ठाउँमा उभिन्छन् भन्ने कुरा कुनै अनौठो होइन । हात्ति चले बजार कुत्ता भुके हजार । यसको खास असर हामीलाई हुँदैन । हामी त्यसको दृढतापूर्वक सामना गरिहाल्छौँ ।’

प्रकाशित मिति: शनिबार, चैत १९, २०७८ १९:००