पञ्चेश्वर अघि बढाउन देउवाको आग्रह, भारतीय हितविपरीत नेपालको सीमा प्रयोग गर्न नदिनू : मोदी

पञ्चेश्वर अघि बढाउन देउवाको आग्रह, भारतीय हितविपरीत नेपालको सीमा प्रयोग गर्न नदिनू : मोदी

A+ A A-

नेपालका प्रधानमन्त्री शेरबहादुर देउवाले पञ्चेश्वर बहुउद्देशीय परियोजनाको विस्तृत आयोजना प्रतिवेदन (डीपीआर) अघि बढाउन भारतीय समकक्षी नरेन्द्र मोदीसमक्ष आग्रह गरेका छन् । भारतको राजकीय भ्रणणमा रहेका देउवाले दिल्लीस्थित हैदरावाद हाउसमा यस्तो आग्रह गरेका हुन् ।

संयुक्त पत्रकार सम्मेदलनमा बोल्दै प्रधानमन्त्री देउवाले भने, 'पञ्चेश्वरको डीपीआर तयार गर्न मैले मोदीजीलाई ध्यानाकर्षण गराएको छु । हामीबीच नेपाल भारत सम्बन्धलाई नयाँ उचाइमा पुर्‍याउन विभिन्न विषयमा छलफल भएको छ ।'

पञ्चेश्वर बहुउद्देश्यीय परियोजनाकाे २००३ मा पहिलोपटक डीपीआर भएको थियो । सन् २०१४ मा नयाँ डीपीआर बनाउनुपर्ने आवाज उठे पनि हालसम्म त्यस परियोजनामा कुनै प्रगति हुन सकेको छैन । देउवाले यसबारे मोदीको ध्यानाकर्षण गरेको बताएका हुन् ।

जवाफमा माेदीले पञ्चेश्वर परियोजना तीव्र गतिले अगाडि बढ्ने र यसको महत्त्वमा जोड दिएकाे बताए । 'ऊर्जा सहकार्यमा हाम्रो संयुक्त दृष्टिकोण आपसी सहयोगको ब्लुप्रिन्ट सावित हुनेछ । हामीले पञ्चेश्वर परियोजनामा तीव्र गतिले अगाडि बढ्ने र त्यसको महत्त्वमा जोड दिएका छौँ । यो परियोजना यो क्षेत्रको विकासका लागि एक गेमचेन्जर सिद्ध हुनेछ', माेदीले भने ।

देउवाले गौतमबुद्ध अन्तर्राष्ट्रिय विमानस्थलमा इयर रुट दिन पनि मोदीलाई आग्रह गरेको बताए । 'गौतमबुद्ध अन्तर्राष्ट्रिय विमानस्थल निर्माण भइसकेको छ । यसले धार्मिक पर्यटनमा महत्वपूर्ण योगदान गर्ने भएकाले रुट दिने विषयमा पनि मैले छलफल गरेको छु,' उनले संयुक्त पत्रकार सम्मेलनमा भनेका छन् ।

यस्तै देउवाले चाँदनी दोधारा, भैरहवा लगायतका स्थानमा संयुक्त सीमा चेकपोस्ट बनाउने विषयमा पनि छलफल भएको बताए । भारतीय समकक्षी मोदीले गरेको आतिथ्यताप्रति कृतज्ञता प्रकट गर्दै देउवाले भनेका छन्, 'भारत सरकारको आतिथ्यता र सत्कारप्रति म विशेष धन्यवाद दिन चाहान्छु । मोदीजीलाई नेपालमा स्वागत गर्न आतुर छु ।'

प्रधानमन्त्री देउवाले युरिया मल सहजरूपमा पठाउन पनि भारतलाई आग्रह गरेको बताए । नेपाल र भारतको सम्बन्धलाई नयाँ उचाइमा पुर्‍याउने उच्च तहको भेटघाट बारम्बार भइरहनुपर्ने देउवाको भनाइ छ ।

संयुक्त पत्रकार सम्मेलनमा भारतीय प्रधानमन्त्री नरेन्द्र मोदीले नेपालको सीमा भारतीय हितविपरीत प्रयोग हुन नदिन समकक्षी देउवालाई आग्रह गरिएको बताए । 'नेपाल र भारतको जस्तो सामाजिक र सांस्कृतिक सम्बन्ध विश्वका अरु कुनै पनि मुलुकबीच छैन । हाम्रो सम्बन्धलाई थप बलियो बनाउनका लागि भारत सधैँ तयार छ,' मोदीले भने, 'नेपालको भूमि भारतको हितविपरीत प्रयोग हुन नदिन म आग्रह गर्दछु ।'

नेपाल र भारतबीच रेलवे सेवा सञ्चालन हुनु र रुपी कार्ड सुचारु हुनाले भारतको 'नेवरहुड फस्ट' नीतिलाई नयाँ उचाइमा कार्यान्वयन गर्न सहयोग पुगेको मोदीले बताए । 'अब भारत र नेपालका जनताले रेलमार्फत यात्रा गर्न सक्छन् । रुपी कार्डको प्रयोगबाट कारोबार गर्न सक्छन् । यसले भारतको नेवरहुड फस्ट नीतिलाई नयाँ उचाइमा कार्यान्वयन गरेको छ,' उनले भने ।

नेपाल इन्टरनेसनल सोलर एलायन्सको सदस्‍य बनेकोमा धन्यवाद दिँदै मोदीले भने,'दक्षिण एशियामा नवीकरणीय उर्जाको प्रयोग बढाउन नेपाल पनि हिस्सेदार मुलुक बनेको छ । यस क्षेत्रमा सफा उर्जा प्रयोगका निम्ति नेपालको योगदानलाई धन्यवाद छ,' मोदीले भने ।

प्रकाशित मिति: शनिबार, चैत १९, २०७८ १४:०५