स्थानीय चुनावमा माओवादी केन्द्रले भनेको सम्मानजनक हैसियत के हो ?

A+ A A-

सत्ता गठबन्धनको बैठकमा कांग्रेस सभापति शेरबहादुर देउवाले पार्टीले स्थानीय तहको चुनावमा आवश्यकताको सिद्धान्त अनुसार गठबन्धन गर्ने निर्णय गरेको कुरा औपचारिक रूपमा गठबन्धनका नेताहरूलाई सुनाए । उनले बैठकमा भने, 'स्थानीय तहमा आवश्यकताको सिद्धान्त अनुसार गठबन्धन गर्ने निर्णय भएको छ । साथीहरूले तल्लो कमिटीमा अरु दलसँग पनि छलफल गरिरहनुभएको छ ।'

माओवादी केन्द्रका अध्यक्ष पुष्पकमल दाहाल प्रचण्डले पनि आफ्नो पार्टीका कमिटीले पनि एमालेसँग छलफल गरिरहेको कुरा सुनाउँदै बैठकमा प्रस्ताव गरे, 'स्थानीय तहमा कांग्रेसका साथीहरू पनि र हाम्रा साथीहरू पनि एमालेसँग बसिरहनुभएको छ । हामीले सुरुमै रणनीति बनाएपछि यो गतिविधि स्थगित हुन्छ । गठबन्धन दलबाहेक अन्यसँग तालमेल नगर्ने नीति बनाऔँ ।'

प्रचण्डको यो प्रस्तावमा आफूलाई प्रधानमन्त्री बनाउन सहयोग गर्ने दललाई दोबाटोमा नछाड्ने अभिव्यक्ति दिएका देउवा पनि सहमत भए । पाँच दलीय गठबन्धनले निर्णय गर्‍यो, 'राष्ट्रियसभाको निर्वाचनमा एकमत भएर चुनावमा गएझैँ स्थानीय चुनावमा पनि गठबन्धनबाहेकका दलसँग तालमेल नगर्ने ।'

माओवादी केन्द्रले आफ्नो सम्मानजनक उपस्थितिको सुनिश्चिता पनि खोजेको छ । आफूले कांग्रेसलाई प्रधानमन्त्री बनाउन सहयोग गरेकाले कांग्रेसले पनि आफूहरूलाई सम्मानजनक व्यवहार गर्नुपर्ने माओवादीका नेताहरू बताउँछन् । माओवादी केन्द्रका नेता नारायणकाजी श्रेष्ठ भन्छन्, 'हामीले नै सहयोग गरेर कांग्रेसको नेतृत्वमा सरकार बनाएको तथ्य कांग्रेसले बिर्सिन मिल्दैन । यो गठबन्धन हामीलाई मात्रै चाहिएको त होइन नी । सहकार्य सबैको वीन-वीनमा हुने हो, हामीले सम्मानजनक स्थिति दाबी गर्ने विषय स्वाभाविक हो । तल्लो तहमा प्रतिवेदन आएपछि कति संख्यामा दाबी गर्ने निर्क्यौल हुन्छ अहिले हामी छलफलमै छौँ ।'

यस्तै माओवादी केन्द्रका नेता हरिबोल गजुरेल एमालेको प्रतिगमनकारी कदमले सबैलाई सताएकाले त्यसलाई परास्त गर्न एकअर्काको आवश्यकता रहेको बताउँछन् । त्यसका निम्ति संख्यामा पनि सम्मानजनक उपस्थिति खोज्नु स्वाभाविक रहेको उनको मत छ । 'जसले जहाँ जितेको छ त्यहाँ छोड्ने र अन्य स्थानमा जित हासिल गर्ने किसिमले अघि बढ्ने हो । सम्मानजनक संख्या हामीलाई मात्रै चाहिएको त होइन नी । सबै ठाउँमा कांग्रेसले मात्रै छोड्नुपर्ने कुरा पनि होइन । यो त सहकार्य गरेर अघि बढ्ने कुरा हो,' उनले भने ।

माओवादी केन्द्रका निर्वाचन आयोगका अध्यक्ष विष्णुप्रकाश श्रेष्ठ कांग्रेसमा गठबन्धन विरोधी नेताहरूले माओवादी केन्द्रको अपमान गरिरहेको बताउँछन् । यस्ता अभिव्यक्ति रोकिनुपर्ने उनको भनाइ छ । 'गठबन्धनका दललाई कांग्रेसका नेताहरूले बोलेको बोली र गरेको व्यवहार न्यून स्तरको छ, यो ठीक भइरहेको छैन । तत्काल रोकिनुपर्छ,' श्रेष्ठले भने ।

स्थानीय चुनावमा पनि माओवादीलाई महानगर र उपमहानगरमा सम्मानजनक सिट दिन कांग्रेस तयार हुनुपर्ने उनको भनाइ छ । ७ सय ५३ स्थानीय तहमध्ये माओवादी एक्लै भिड्दा दुई सय स्थानीय तहमा जित हासिल गर्ने निश्चित रहेको उनको दाबी छ । अघिल्लो चुनावमा कांग्रेस र माओवादी केन्द्रबीच अधिकांश ठाउँमा गठबन्धन भएको थियो । गठबन्धन गरेर चुनाव लड्दा पनि माओवादी केन्द्र १०६ ठाउँमा मेयर/अध्यक्ष जितेको थियो ।

'माओवादी केन्द्रको संगठन अहिले क्रियाशील छ, वडा कमिटीसम्म संगठन व्यवस्थित भएकाले २ सय स्थानीय तहमा हामीले सहजै जित हात पार्छौं,' उनले भने । माओवादीका केही नेता बाहिरिए पनि त्यसले कुनै असर नपुर्‍याउने श्रेष्ठले दाबी गरे । माओवादी केन्द्रले २ महानगर र कम्तीमा ४ उपमहानगर दाबी गर्ने उनको भनाइ छ । 'महानगरको हकमा हामीले २ र उपमहानगरमा कम्तीमा ४ स्थानमा दाबी हुन्छ,' उनले भने ।

६ महानगरमध्ये भरतपुरमा माओवादीले नछोड्ने मनस्थिति बनाएको छ । विराटनगर र ललितपुरमध्ये एकमा दाबी गर्ने श्रेष्ठको भनाइ छ । उपमहानगरको संख्या भने बढ्न सक्ने उनको भनाइ छ । माओवादी केन्द्रका नेता खिमलाल देवकोटा स्थानीय तहमा कति स्थानमा ढुक्क रहने भन्ने कुरा २२ चैतपछि मात्रै थाहा हुने बताउँछन् । 'अहिले ३७ लाख मतदाता थपिएका छन् । स्थलगत तथ्यांक हेरेर मात्रै यकिन तथ्यांक भन्न सकिन्छ,' देवकोटाले भने ।

माओवादी केन्द्रले २८ चैतभित्र प्रदेशमा उम्मेदवारको नामावली पठाउन भनेको छ । 'एकतावद्ध ढंगले नाम पठाउन भनेका छौँ । जित्ने उम्मेदवार चयन गर्न भनेका छौँ । नामहरू कसरी आउँछ यसले पनि माओवादीको स्थिति कस्तो छ देखाउँछ,' उनले भने ।

उक्त प्रतिवेदनका आधारमा उपमहानगरको संख्या थपिन पनि सक्ने श्रेष्ठ बताउँछन् ।

प्रकाशित मिति: शुक्रबार, चैत १८, २०७८ १७:२०