'बाहुबली २' पछि 'आरआरआर' बनाउन चाहँदैनथे एसएस राजामौली

A+ A A-

चर्चित निर्देशक एसएस राजामौलीको फिल्म 'आरआरआर'ले देश तथा विदेशको बक्स अफिसमा धुम मच्चाएको छ ।

चलचित्रले कमाइको नयाँ रेकर्ड बनाएको छ । तर, ‘बाहुबली’ बनाएका राजामौली 'आरआरआर' बनाउन चाहँदैनथे । यो कुरा चर्चित थिएटर तथा चलचित्र कलाकार मकरन्द देश पाण्डेले खुलासा गरेका छन् ।

'आरआरआर'मा उनले पनि भूमिका निर्वाह गरेका छन् । राजामौलीसँग काम गरेको अनुभवबारे उनले भारतीय मिडिया नवभारत टाइम्ससँग भने, ‘एक दिन मलाई राजामौलीको कार्यालयबाट फोन आयो । उनले भने कि राजामौली मलाई एक परियोजनाको सन्दर्भमा भेट्न चाहन्छन् । उनले मलाई हवाई टिकट पठाए र म उनलाई भेट्न गएँ । मैले कपाल काटेको थिएँ । तर म राजामौलीलाई देखेर छक्क परेँ । राजमौली मलाई चाहन्थे, मेरो कपाल होइन । त्यहाँ मैले विग लगाएर मेकअप गरेँ । त्यहाँ रामचरण पनि थिए । मलाई भेट्न मात्र आएको उनले बताए । रामचरणलाई मेरो काम मनपर्छ । साउथ स्टारले मलाई भेट्न चाहेको थाहा पाएपछि म निकै खुसी भएँ । त्यसपछि राजामौलीले मलाई आरआरआरको कथा सुनाए ।'

मकरन्दका अनुसार 'बाहुबली २' पश्चात् उनी 'आरआरआर' बनाउन चाहँदैनथे । उनले मकरन्दलाई भने, 'तपाईंलाई थाहा छ, बाहुबलीपछि म एक छोटो लभ स्टोरी बनाउन चाहन्थेँ । तर, मेरी श्रीमतीले मलाई यस्तो फिल्म बनाउनुपर्छ जसका लागि म चिनिन्छु, जुन कि मैले गर्न सक्दिनँ भनिन् ।'

राजामौलीले मकरन्दलाई आफूले बलिउडका सत्य, स्वदेशजस्ता फिल्म हेरेको र त्यही भएर आदिवासीको भूमिका दिएको बताए । तर, लामो फिल्म भएकाले मकरन्दका केही दृश्य काट्नुपरेको थियो ।

बलिउड र साउथको इन्डस्ट्रीमा काम गर्ने शैली फरक रहेको मकरन्दले बताए ।

उनले भने, ‘दक्षिण कलाकारले निर्देशकलाई धेरै प्रश्न सोध्दैनन् । उनी पूर्ण रूपमा निर्देशकलाई समर्पण गर्छन् । उनीहरूको प्रतिबद्धता र ऊर्जा अद्भुत छ । त्यसैले उनीहरूमा धेरै शंका वा प्रश्नहरू छैनन् । त्यसैले पनि निर्देशकले उनीबाट बढी काम लिन पाएका छन् । निर्देशकसँग अभिनेता सहमत नभएकाले सुटिङ रोकिएको त्यहाँ कहिल्यै हुँदैन ।'

'आरआरआर'ले ७ सय करोडभन्दा बढीको व्यापार गरेको छ । व्यापारको हिसाबले यो फिल्मले बाहुबलीको पहिलो भागको रेकर्ड तोडेको छ ।