भृकुटीमण्डपमा भोलिदेखि ‘हिमालयन हाइड्रो एक्स्पो’ सञ्चालन हुँदै, सयभन्दा बढी स्टल बुकिङ भइसके

भृकुटीमण्डपमा भोलिदेखि ‘हिमालयन हाइड्रो एक्स्पो’ सञ्चालन हुँदै, सयभन्दा बढी स्टल बुकिङ भइसके

A+ A A-

‘हिमालयन हाइड्रो एक्स्पो, २०२२’ को तेस्रो संस्करण १९ चैतदेखि काठमाडौंस्थित भृकुटीमण्डपमा सुरु हुने भएको छ ।

स्वतन्त्र ऊर्जा उत्पादकहरूको संस्था नेपाल (इप्पान) र एक्स्पो एण्ड इभेन्ट म्यानेजमेन्ट सर्भिसको संयुक्त आयोजनामा हुन लागेको एक्स्पोको राष्ट्रपति विद्यादेवी भण्डारीले उद्घाटन गर्ने बताइएको छ ।

आयोजकका अनुसार एक्स्पोको पहिलो दिन शनिबार बिहान ७.०० बजे विद्युतीय सवारीसाधनको र्‍याली हुनेछ ।र्‍याली भृकृटीमण्डपबाट सुरु भएर नेपालको पहिलो जलविद्युत् आयोजना फर्पिङसम्म पुगेर पुनः भृकुटीमण्डपमै आएर समापन हुनेछ ।

फर्पिङ जलविद्युत् आयोजनामा र्‍यालीका सहभागीहरूलाई पर्यटनमन्त्री प्रेम आलेले स्वागत गर्ने कार्यक्रम तय गरिएको छ ।

यस एक्स्पोको मुख्य प्रायोजक एनएमबी बैंक छ भने आईएफसीलगायतका संघसंस्थाहरूले प्रायोजन गरेका छन् । त्यस्तै, नेपालस्थित भारतीय राजदूतावासको समन्वय तथा बेलायती राजदूतावास र क्यानेडियन हाई कमिसन कन्ट्री पार्टनर रहेका छन् ।

साथै, नेपाल विद्युत् प्राधिकरण, नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, नेपाल बैंकर्स एसोसिएसन र नेपाल निर्माण व्यवसायी महासंघको एक्स्पोलाई सहयोग रहेको छ ।

‘क्रिएटिङ मार्केट्स अफ नेपाल्स हाइड्रोपावर’ भन्ने नाराका साथ आयोजित यस हाइड्रो एक्स्पो अवधिभर प्रत्येक दिन हाइड्रो पावरसम्बन्धी विषयगत ६ वटाभन्दा बढी टेक्निकल सेसन सञ्चालन गरिने कार्यक्रम छ ।

यस एक्स्पोमा सयवटाभन्दा बढी स्टल बुकिङ भइसकेका छन् । जसमा विदेशी स्टल चीन, भारत, क्यानडा, नर्वे, दक्षिण कोरिया, जर्मनी, अस्ट्रिया, बुल्गेरिया, चेक रिपब्लिक, इटाली, स्वीडेन, बेलायत, ब्राजिललगायत देशका कम्पनी तथा सरोकारवालाहरूको सहभागिता रहनेछ ।

साथै, हाइड्रोपावरसम्बन्धी वस्तु तथा सेवाको नयाँ अवधारणाबारे विद्यार्थीहरू एवं व्यक्तिगत तवरबाट आविष्कार गरेका वस्तु तथा सेवाबीच प्रतिस्पर्धासमेत गराइनेछ ।

त्यस्तै, एक्स्पोमा हाइड्रोपावर क्षेत्रमा ड्रोनको उपयोगिता के कसरी गर्न सकिन्छ भनी ड्रोन भिडियो मेकिङ कम्पिटिसनसमेत आयोजना गरिनेछ ।

विश्वकै पहिलो हाइड्रोपावर रोबोटिक कम्पिटिसन हाइड्रोकन २.० मा हाइड्रोपावरमा काम लाग्ने रोबोटहरूका साथै टनेल चेकिङ र इन्स्पेक्सनजस्ता काममा समेत सहायता प्रदान गर्ने रोबोटहरूको प्रतिस्पर्धा एक्स्पोमा हुनेछ ।

एक्स्पो अवलोकनका लागि आएका इच्छुक अवलोकनकर्तालाई हेलिकोप्टरमार्फत हाइड्रोपावर आयोजनाहरूको भ्रमण गराउने व्यवस्था गरिएको छ ।

त्यसैगरी प्रत्येक दिन एक्स्पो अवलोकनकर्ताहरूमध्ये १० जनालाई गोला प्रथाका माध्यमबाट विद्युतीय चुलो वितरण गरिनेछ ।

प्रकाशित मिति: शुक्रबार, चैत १८, २०७८ १४:०८