'पल्पसा क्याफे'मार्फत अभिनयमा १४ वर्षपछि विमल सुवेदीको पुनरागमन

A+ A A-

नाट्यनिर्देशक विमल सुवेदीले १४ वर्षपछि नाटकको अभिनयमा पनुरागमन गर्ने भएका छन् ।

उनकै निर्देशनमा तयार भएको नाटक 'पल्पसा क्याफे'मा विमल दृश्यको भूमिकामा देखिने भएका हुन् । कोभिड महामारीको कारण अघिल्लो वर्ष प्रदर्शन हुनबाट रोकिएको थिएटर भिलेजको उक्त नाटक १ वैशाखबाट काठमाडौँको थापागाउँस्थित मण्डला थिएटरमा मञ्चन हुँदैछ ।

विमलले पछिल्लो पटक अनुप बरालको निर्देशनमा बनेको नाटक 'बाँकी उज्यालो'मा अभिनय गरेका थिए ।

नारायण वाग्लेको मदन पुरस्कार प्राप्त उपन्यास ‘पल्पसा क्याफे’मा आधारित भएर बनाइएको उक्त नाटकमा अभिनेत्री सृष्टि केसी पल्पसाको भूमिकामा देखिँदैछिन् ।

भर्खरै ‘चिसो एस्ट्रे’ फिल्मको प्रदर्शन सकाएकी सृष्टिले यसभन्दा पहिला पनि थिएटर भिलेजकै ‘ह्याम्लेट’ नाटकमा अभिनय गरिसकेकी छन् ।

‘सान्दाजुको महाभारत’ ‘यार्मा’ ‘ह्याम्लेट’ ‘मालिनी’ जस्ता फरक डिजाइनका नाटक निर्देशनमार्फत आफूलाई चिनाएका विमल भारतको नयाँ दिल्लीस्थित नेसनल स्कुल अफ ड्रामामा डिजाइन र डिरेक्सन अध्ययन गर्नुभन्दा पहिला अभिनय र मोडलिङमा सक्रिय थिए ।

यसअघि दृश्यको भूमिकामा विपिन कार्की र पल्पसाको भूमिकामा स्वस्तिमा खड्काले उक्त नाटकमा अभिनय गर्ने चर्चा थियो । अघिल्लो वर्ष रिहर्सलकै क्रममा व्यस्तताका कारण विपिन बाहिरिएका थिए ।

दोस्रो चरणको कोभिड महामारीअघिसम्म स्वस्तिमा नाटकको रिहर्सलमा सक्रिय थिइन् । तर, कोभिडका कारण नाटकको प्रदर्शन अनिश्चित भयो । पछल्लो पटक स्वस्तिमा पनि व्यस्त भएपछि पल्पसाको भूमिकामा सृष्टिले तयारी गरेकी हुन् । त्यसैगरी नाटकमा अन्य कलाकाररू पनि फेरबदल भएका छन् ।

सुरज सुवेदीको नाट्य रुपान्तरणमा तयार नाटकमा दिलीप रानाभाटको सह-निर्देशन छ ।

अर्का प्रमुख पात्र सिद्धार्थको भूमिका भने दिपेश राईले निभाउँदैछन् ।

‘पल्पसा क्याफे’ नेपालको चर्चित उपन्यासमध्ये एक हो । यो पुस्तक अंग्रेजी, फ्रेन्च, कोरियन तथा सिंहला भाषामा अनुदित छ । १० वर्ष लामो सशस्त्र युद्धको वरपर रहेर एक चित्रकारकाे कथा बोल्ने उपन्यासले तत्कालीन परिवर्तनशील समाजको कथालाई सजिलो भाषामा बोलेर प्रसिद्धि कमाएको थियो ।

सशस्त्र युद्धमा सामेल भएको आफ्नो साथी सिद्धार्थले युद्ध हेर्न भनेर लगेपछि चित्रकार रहेको दृश्यले नजिकैबाट देखेको युद्धको वरपर उपन्यासको कथा घुमेको छ ।

उपन्यासका धेरै पात्रहरू स्पष्टरूपमा लाखौँ मानिसको मनमा बसेकाले तिनको कथालाई नाटकमा लिएर जानु आफैँमा चुनौतीपूर्ण रहेको नाट्य रुपान्तरक सुरज सुवेदीले बताए । निर्देशक विमल सुवेदीले भने १५ वर्षपछि उपन्यासतिर फर्किंदै त्यसले उबेला उठाएका विषयहरूलाई वर्तमान समयमा उभिएर विवेचना गर्न लागिएको जानकारी दिए ।

नाटकमा सृष्टि र विमलका साथमा दिपेश राई, संगीता थापा, पूर्णिमा आचार्य, बच्चु हिमांशु, सरगम राई, ङिमाशेर्पा, जेनी सुनुवार, चक्रपुलामी, श्रवण सिंहराना, लगायतका कलाकारहरूको अभिनय रहनेछ ।

प्रकाशित मिति: शुक्रबार, चैत १८, २०७८ १२:०८