बुढासुब्बा डिजिटलको युट्युव च्यानल ह्याक

A+ A A-

बुढासुब्बा डिजिटलको युट्युव च्यानल ह्याक भएपछि हजारौँ गीत र चलचित्र उडेका थिए । यसले वैशाख १ गतेबाट प्रदर्शनमा आउन लागेको चलचित्र ’ए मेरो हजुर ४’को प्रचारप्रसार प्रभावित बनेको थियो ।

ह्याक भएको १० घण्टाभित्र कम्पनीले च्यानललाई आफ्नो नियन्त्रणमा लिएको छ । बुढासुब्बा डिजिटलका म्यानेजर विश्व खड्काका अनुसार बिहीबार बेलुकाबाट च्यानलमा कन्टेन्ट अपलोड गर्न थालिएको छ ।

बिहीबार साँझ ‘ए मेरो हजुर ४’ को प्रचार भिडियो पुनः च्यानलमा अपलोड गरिएको छ । बुधबार बेलुका ११ बजे च्यानललाई ह्याकरले आफ्नो कब्जामा लिएको थियो ।

बिहान ३ बजे क्रिप्टोकरेन्सीको लाइभ भिडियो आउन थालेपछि कम्पनीले च्यानल ह्याक भएको पत्ता लगाएको थियो । ‘हामी बिहानै ६ बजेदेखि लाग्यौं । बिहान ९ बझ्दा हामीले आफ्नो नियन्त्रणमा लिइसकेका थियौं । कसले ह्याक गरेको रहेछ भनेर जानकारी पाउन सकिन्छ कि भनेर लाग्यौँ, तर पत्ता लागेन,’ म्यानेजर खड्काले भने ।

उनका अनुसार ह्याकर नेपालको नभई जर्मनी र रसियाबाट ह्याक गरेको देखिन्छ । अहिले च्यानलको प्राविधिक टिमले थप काम गरिरहेको छ । कसरी ह्याक भयो भन्ने कुरामा पनि कम्पनीले खोजी गरिरहेको छ ।

‘गुगलजस्तो ठूलो कम्पनीको सिस्टममा ह्याक हुनु भनेको अचम्मको कुरा हो । हामीले सेक्युरिटीमा सधैँ चनाखो अपनाइरहेका हुन्छौँ । हाम्रै अफिसको एक्सिसबाट सेक्युरिटी लुज भएको हुनसक्छ । फोन भेरिफिकेसन वा कम्प्युटरबाट इन्फरमेसन चारेको हुनसक्छ,’ उनले भने ।

यसअघि दुई वर्षअघि पनि च्यानल ह्याक भएको थियो । तर, त्यतिबेला अहिलेजस्तो क्षति पुगेको थिएन । त्यसबेला र अहिले फरक–फरक ह्याकरले कब्जा गरेको म्यानेजर खड्काको आशंका छ । ‘त्यतिबेला हाम्रो कन्टेन्ट नचलाएर कुनै अपलोड नगरेको अवस्था थियो । त्यो व्यक्तिगत रिसिइबीले गरेको शंका थियो । अहिलेचाहिँ क्रिप्टोकरेन्सी नेपालमा ब्याण्ड भएको बेलामा त्यही सम्बन्धी ह्याकरको काम हुनसक्छ,’ उनले भने ।

च्यानल ह्याक भएको बेला हजारौँ गीत र फिल्म उडेका थिए । यसले ४ लाख भ्युज च्यानलले गुमाएको छ ।

प्रकाशित मिति: शुक्रबार, चैत १८, २०७८ ११:३०