ओलीका कम्युनिष्टविरोधी कदम मैले नेकपामा रहँदै पराजित गरिदिएँ: प्रचण्ड

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमाले अध्यक्ष केपी शर्मा ओलीका कम्युनिष्टविरोधी कदमलाई आफूले नेकपामा रहेकै अवस्थामा पराजित गरिदिएको दाबी गरेका छन् ।

माओवादीको बाँकेका कार्यकर्ताहरूलाई आज नेपालगञ्जमा प्रशिक्षण दिँदै प्रचण्डले ७० प्रतिशत बढी कार्यकर्ताहरूको नेतृत्व प्रचण्डले गर्ने अवस्था आएपछि अदालतबाट सेटिङबाट नेकपा फुटाइएको बताए । उनले पार्टी, संसदीयदल र कार्यकर्ता पङ्क्तिबाट एक्लिन थालेपछि अन्तर्राष्ट्रिय सेटिङका आधारमा पार्टी विभाजन गरिएको बताए ।

मधेसको मुद्दामा आफू दोस्रो पटक प्रधानमन्त्री भएका बेला संविधान संशोधनको प्रस्तावमार्फत संवोधन गरेको बताउँदै उनले मधेशका सबै माग पूरा गर्न नदिन एमालेले अवरोध गरेको आरोप लगाए ।

राजनीतिक कालखण्डमा माओवादीहरूले गल्ती गरे पनि महाधिवेशनबाट माओवादीले कमजोरीहरूलाई सच्याउँदै पार्टीलाई व्यवस्थित बनाएको प्रचण्डको दाबी छ ।

‘हामी बिग्रीयौँ, हाम्रो कति सदस्य छन् भन्ने पनि हामीलाई थाहा भएन, संगठन अस्तव्यस्त बनायौँ,’ उनले भने, ‘तर, महाधिवेशनपछि भने वडा-वडाबाट संगठनलाई ब्युँताउँदै ८ लाख सदस्य बनाउन सफल भयौँ ।’

मधेशमा माओवादीप्रति लहर आएको बताउँदै प्रचण्डले सबैतिरको माहौल हेर्दा माओवादीको अवस्थाबाट आफू उत्साहित भएको बताए । उनले आउँदै गरेको चुनाव प्रतिगमन र अग्रगमनबीचको लडाइँ भएको जिकिर गरे । चुनाव हारे जनयुद्ध, १९ दिने जनआन्दोलनबाट प्राप्त उपलब्धी गुम्ने र चुनाव जितेमात्र जनयुद्धको उपलब्धीको रक्षा हुने उनको तर्क छ । उनले युद्धकै शैलीमा दुस्मनको घेरा तोडेर अगाडि बढ्न कार्यकर्तालाई निर्देशन दिँदै आगामी चुनाव जित्नुको विकल्प नरहेको बताए ।

प्रकाशित मिति: बिहीबार, चैत १७, २०७८ १९:५५