संसदीय चुनावसम्म मिलेरै जाने मोडालिटी बनाउँदै गठबन्धन, आधार बनाउन प्रतिवेदन माग

संसदीय चुनावसम्म मिलेरै जाने मोडालिटी बनाउँदै गठबन्धन, आधार बनाउन प्रतिवेदन माग

A+ A A-

सत्ता गठबन्धनले संसदीय चुनावसम्मै सहकार्यको मानसिकतासहित स्थानीय चुनावमा अन्य दलसँग तालमेल नगर्ने भएका छन् ।

बिहीबार बालुवाटारमा बसेको पाँच दलीय गठबन्धनको बैठकले सहकार्यको मोडालिटी निर्माण संयन्त्र बनाएर वस्तुस्थिति समेटेर प्रतिवेदन मगाएको छ । केन्द्र, प्रदेश र स्थानीय कमिटीका प्रमुखहरूलाई पाँच दिनभित्र वस्तुस्थिति समेटेर केन्द्रका प्रतिवेदन पठाउन भनिएको छ । त्यही प्रतिवेदनका आधारमा सहकार्यको मोडालिटी तयार गरिने नेताहरूले बताएका छन् ।

राष्ट्रियसभाको उप-निर्वाचनमाजस्तै तीनै तहको निर्वाचनमा एकतावद्ध रूपमा अघि बढ्ने सहमति दलहरूबीच भएको हो । तीनै तहको निर्वाचनमा सहकार्य कायम राख्ने उद्देश्यले नै गठबन्धनबाहेक अन्‍य दलसँगको सहकार्यलाई निषेध गरिएको जनमोर्चाकी उपाध्यक्ष दुर्गा पौडेलले बताइन् ।

'तत्कालै हामीले स्थानीय चुनावको सामना गर्नुपर्ने भएकाले हामीले स्थानीय तहमा गठबन्धनका दलसँग मात्रै तालमेल गर्ने भनेका छौँ । दलहरूको मानसिकता संघीय संसदको निर्वाचनसम्म सँगै जाने छ,' उनले भनिन् । सत्ता गठबन्धनले तीनै तहको निर्वाचनमा सहकार्य गर्ने सैद्धान्तिक सहमति गरेको उनले बतनाइन् ।

केन्द्रबाट सत्ता गठबन्धनको दलबीच चुनावी तालमेलको निर्णय भएकाले तल्लो कमिटीसम्मै पाँच दलीय संयन्त्र बनाएर प्रतिवेदन माग गर्ने निर्णय भएको सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले बताए । त्यही प्रतिवेदनका आधारमा सहकार्य हुने कार्कीको भनाइ छ ।

'कहाँ‚ कस्तो अवस्था छ भनेर जान्नका लागि संयन्त्र बनाएका छौँ, त्यसले प्रतिवेदन बुझाएपछि यथार्थ कुरा, तथ्य कुरा थाहा हुन्छ, त्यसपछि बाँकी निर्णयहरू गर्दै जानेछौँ,' कार्कीले भने ।

माओवादी केन्द्रका नेता नारायणकाजी श्रेष्ठले पाँच दलबीच दीर्घकालीन सहकार्यको विषयमा सैद्धान्तिक सहमति भएको बताए । 'अहिले स्थानीय तहको चुनाव मुखैमा रहेकाले हामीले यो निर्वाचनको सन्दर्भलाई केन्द्रमा राखेका हौँ । गठबन्धन दलबीच दीर्घकालीन सहकार्य नै हुनेछ,' उनले भने ।

पाँच दलीय संयन्त्रले प्रतिवेदन पठाएपछि शीर्ष नेताहरूले त्यस प्रतिवेदनलाई आधार माने सिट बाँडफाँड गर्ने श्रेष्ठको भनाइ छ । 'प्रदेश जिल्ला र स्थानीय कमिटीका पाँच दलका प्रमुखहरू संयन्त्रका सदस्य हुनेछन् । त्यो संयन्त्रको प्रतिवेदन प्राप्त भएपछि केन्द्रका नेताहरूले उम्मेदवारको टुंगो लगाउने भनिएको छ,' उनले भने ।

गठबन्धनमा महानगरमा केन्द्रबाटै उम्मेदवारको टुंगो लगाउने निर्णय भएको छ । एकीकृत समाजवादीका नेता झलनाथ खनालले महानगरको हकमा केन्द्रबाटै र उपमहानगर, नगर र पालिकाको हकमा स्थानीय सिफारिस अनुसार निर्णय गर्ने सहमति जुटेको बताए । 'महानगरको निर्णय केन्द्रीय संयन्त्रले गर्नेछ । अन्यको हकमा स्थानीय संयन्त्रबाटै टुंगो लगाउने भनिएको छ,' खनालले भने ।

प्रतिगमनको खतरा कायमै रहेको दाबीसहित तीनै तहमा सहकार्य

सत्ता गठबन्धनमा आवद्ध दलका नेताहरूले प्रतिगमनको खतरा कायमै रहेकाले तीनै तहमा सहकार्य गरेर अघि बढ्नुपर्ने निष्कर्ष निकालेको नेताहरूले बताएका छन् । कांग्रेस केन्द्रीय समिति बैठकमा एमालेलाई साइजमा राख्न गठबन्धन जरुरी रहेको बताएका वरिष्ठ नेता रामचन्द्र पौडेलले प्रतिगमनलाई परास्त गर्न पाँच दलले तीनै तहमा सहकार्य गर्नुपर्ने आवश्यकता रहेको दोहोर्‍याए ।

'प्रतिगमनलाई पराजित गर्न संविधानको रक्षा र समृद्धिलाई अघि बढाउन हामीबीच अझै सहकार्य जरुरी छ,' उनले भने ।जनमोर्चाकी उपाध्यक्ष पौडेलले पनि प्रतिगमनकारी शक्तिलाई रोक्न संसदीय चुनावसम्म सँगै जाने आधार तय गर्ने लागिएको बताइन् ।

'स्थानीय निर्वाचनको परिणाम अधिकतम आफ्नो पक्षमा पारेर प्रतिगमनकारी शक्तिलाई रोक्न संसदीय निर्वाचनमा पनि सँगै जाने मानसिकता पाँच दलभित्र छ । हामीबीचको सहकार्य दीर्घकालीन रूपमै अघि बढ्नेछ,' उनले भनिन् । २२ गतेभित्र प्रतिवेदन पठाइसक्न प्रदेश, जिल्ला र स्थानीय संयन्त्रलाई गठबन्धनको बैठकले निर्देशन दिएको छ ।

प्रधानमन्त्री शेरबहादुर देउवा १८ चैतदेखि तीन दिने भारत भ्रमणमा जाँदैछन् । उनी फर्किएपछि प्रतिवेदनको आधारमा तालेमलको मोडालिटीमा छलफल केन्द्रित हुने नेताहरूले बताएका छन् ।

प्रकाशित मिति: बिहीबार, चैत १७, २०७८ १८:३७