कस्तो हो ओलीले रुपन्देहीमा उद्‌घाटन गरेको बिजुलीबस ?

A+ A A-

गत मंगलबार पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले रुपन्देहीमा बिजुलीबसको उद्‌घाटन गरे । युरोबस कम्पनीको सहकार्यमा सुन्दर यातायातले सञ्चालनमा ल्याएको उक्त बिजुुलीबसको ओलीले रुपन्देहीको मणिग्रामस्थित ड्रिमल्यान्ड होटलमा रिबन काटेर शुभारम्भ गरेका थिए ।

कम्पनीका अध्यक्ष भेषबहादुर थापाका अनुसार उनी त्यही बस चढेर लुम्बिनीमा आयोजित कार्यक्रममा सहभागी भई भैरहवा एयरपोर्टसम्म करिब ६० किलोमिटर यात्रा तय गरे ।

सुनवलदेखि कपिलवस्तुको रुटमा सञ्चालन गर्ने ती दुईवटा गाडीलाई अहिले परीक्षणको रूपमा त्यही रुटमा चलाइरहेको थापाले जानकारी दिए ।

‘सोमबारसम्म सबै सरकारी प्रक्रिया पूरा हुन्छ । त्यसपछि यी दुई गाडी सुनवलदेखि कपिलवस्तु रुटमा चलाउँछौँ,’ उनले भने ।

१५ दिनभित्र त्यो क्षेत्रमा अन्य चारवटा बिजुली गाडी चलाउने तयारी रहेको उनले जानकारी दिए ।

कस्तो छ त गाडी ?

९ मिटर लम्बाइको उक्त बसको ३० सिट क्षमता छ । फुल चार्ज गर्न करिब ३ घण्टा लाग्ने यी गाडीले एसी चलाउँदा २ सय १५ र एसी नचलाउँदा २ सय ७५ किलोमिटर रेन्ज दिने थापाको दाबी छ ।

यी गाडीमा सातवटा सीसी क्यामेरा, एसी, जीपीएस ट्र्याकिङ सिस्टम, डिजिटल पेमेन्ट सिस्टम, अपांगमैत्री, उभिएर यात्रा गर्न सजिलोका लागि ह्याङ्गर, आरामदायी सिटलगायतका सुविधा रहेको थापाले जानकारी दिए ।

सुन्दर यातायातले यसअघि काठमाडौंको चक्रपथमा चारवटा बिजुली गाडी सञ्चालनमा ल्याइसकेको छ भने वैशाखसम्ममा विराटनगरमा पनि सञ्चालनमा ल्याउने थापाले जानकारी दिए ।

ओलीलाई बिजुली गाडीको नमीठो अनुभव

केपी ओलीका लागि बिजुलीबसको अनुभव त्यत्ति राम्रो छैन । ६ कात्तिक २०७५ मा तत्कालीन प्रधानमन्त्री ओलीले साझा यातायातको प्राङ्गणमा बिजुलीबसको उद्‌घाटन गरे ।

एसियाली विकास बैंक (एडीबी)को सहयोगमा लुम्बिनी विकास कोषले ल्याएका ती बस भैरहवा अन्तर्राष्ट्रिय विमानस्थल सञ्चालनमा नआउन्जेलसम्म साझा यातायातले चलाउने भन्दै काठमाडौं ल्याइएको थियो ।

उक्त बिजुली गाडीको उद्‌घाटन गर्दै ओलीले भनेका थिए, ‘आज काठमाडौंमा सुरु भएको बिजुलीबसले आउँदा दिनमा माछाले जस्तै फुल पार्छ र देशका अरू शहरलाई पनि यसले आकर्षित गर्छ ।’

उद्‌घाटनपश्चात् ओली त्यही बिजुली गाडी चढेर सिंहदरबारसम्म पनि पुगे । तर, त्यसपछि भने ती गाडी हालसम्म सञ्चालनमा आउन सकेका छैनन् ।

गाडी सञ्चालनअगाडि संस्कृति, पर्यटन तथा नागरिक उड्डयन मन्त्रालयले प्राविधिक परीक्षण गर्दा सम्झौताअनुसारको गुणस्तरका नभएको पाइएको थियो ।

बीवाईडीले सम्झौताअनुसार मापदण्ड पूरा नभएको गाडी दिएको समितिको प्रतिवेदनका आधारमा मन्त्रालयले बस अस्वीकार गरेको थियो ।

हाल कम्पनीले सम्झौताअनुसारकै बस दिए पनि ती बस सञ्चालनमा आउन सकेका छैनन् । ती बस हाल लुम्बिनी विकास कोषकै पार्किङमा राखिएको छ । करिब १५–२० दिनअगाडि ती बसहरूले नम्बर प्लेट भने पाइसकेको कोषका एक कर्मचारीले जानकारी दिए ।

प्रकाशित मिति: बिहीबार, चैत १७, २०७८ १७:५५