खल्तीले जित्यो संयुक्त राष्ट्र संघीय स्तरको फिनटेक इन्नोभेसन फन्ड

A+ A A-

नेपाली कम्पनी खल्तीले संयुक्त राष्ट्र संघअन्तर्गतको संयुक्त राष्ट्र संघीय पुँजी विकास कोष (यूएनसीडीएफ) र एसिया तथा प्रशान्त क्षेत्रका लागि संयुक्त राष्ट्रसंघीय आर्थिक तथा सामाजिक आयोग (युनेस्क्याप) ले संयुक्त रुपमा आयोजना गरेको फिनटेक इन्नोभेसन फन्ड जित्न सफल भएको छ ।

खल्तीसँगै एसिया र प्रशान्त क्षेत्रका जम्मा १० वटा उद्यमह उक्त इन्नोभेसन फन्डको विजेता घोषित भएका हुन् ।

उक्त फन्ड जितेपछि खल्तीले महिलाले नेतृत्व गरेका लघु, साना र मझौला आकारका उद्यमलाई व्यवसाय वृद्धि र बजार विस्तारका लागि सहयोग गर्न एक विशेष कार्यक्रम ल्याउने भएको छ । खल्तीले उक्त कार्यक्रम कार्यान्वयन गर्न ३ हजार ५ सय महिला आबद्ध भएको सञ्जाल सार्क बिजनेस एसाेसिएसन अफ होम बेस्ड वर्कर्स नेपालसँग सहकार्य गर्ने भएको छ ।

नेपालले गृहिणीको सिपलाई व्यवसायीकरण गरी विभिन्न सामान उत्पादन गर्दै आएको छ । परियोजना सञ्चालन गर्न यूएनसीडीएफ र युनेस्क्यापले संयुक्त रुपमा खल्तीलाई वित्तीय र प्राविधिक सहयोग प्रदान गर्नेछन् ।

यस परियोजनाअन्तर्गत पूर्वमा संखुवासभादेखि पश्चिममा दार्चुलासम्मका १२ वटा जिल्लामा ३ हजार ५ सयभन्दा बढी महिला उद्यमीलाई सहयोग गरिनेछ । खल्तीले उनीहरूलाई आत्मनिर्भर हुन र व्यवसाय थप विस्तार गर्न मदत पुर्याउनेछ । साथै खल्तीले स्मार्ट छोरीहरुलाई पनि उक्त महिला उद्यमीलाई सहयोग गर्न परिचालन गर्नेछ ।

खल्ती २६ जनावरी २०१७ बाट नेपाली बजारमा आरम्भ भएको पेमेन्ट गेटवे हो । खल्तीको मोबाइल एप तथा वेबसाइट प्रयोग गरी मोबाइल रिचार्ज, बिजुली र पानीको बिल भुक्तानी, इन्टरनेट तथा डीटीएचको बिल भुक्तानी, बिमाशुल्क भुक्तानी, फिल्म टिकेटिङ, प्लेन टिकेटिङ, इभेन्ट्स टिकेटिङ, होटेल रुम बुकिङ आदि गर्ने, ई–कमर्समार्फत किनिएको सामानको भुक्तानी, दैनिक पत्रिकाहरुको ग्राहक–शुल्क तिर्ने जस्ता अन्य थुप्रै सेवा लिन सकिन्छ । हाल खल्ती प्रयोगकर्ताको संख्या ८ लाख बढी छ ।

प्रकाशित मिति: शुक्रबार, असार २०, २०७६ ०३:२४