अर्थतन्त्रका ६ महिनाः भुक्तानी सन्तुलन केही सुध्रियो

A+ A A-

काठमाडौं । देशको आर्थिक अबस्था खस्कदै गएको समाचारहरु सार्बजनिक भइरहेको बेलामा नेपाल राष्ट्र बैंकले भने केही सुधार भएको तथ्यांक सार्बजनिक गरेको छ ।

राष्ट्र बैंकले प्रकाशित गरेको चालु आर्थिक बर्षको ६ महिनासम्मको आर्थिक अबस्थामा भुक्तानी सन्तुलनमा केही सुधार भएको देखाएको छ ।

गत ५ महिनासम्मको तथ्यांकले देशको भुक्तानी सन्तुलन ८५ अर्ब ३२ करोड रुपैयाँले ऋणात्मक थियो । तर, ६ महिना अर्थात पुस मसन्तसम्म आइपुग्दा भुक्तानी सन्तुलन ६३ अर्ब ६८ करोड रुपैयाँले मात्रै ऋणात्मक रहेको तथ्यांकले देखाएको छ ।

भुक्तानी सन्तुलनमा केही सुधार भएपनि अब नेपाल राष्ट्र बैंकमा रहेको अमेरिकी डलरले नेपालको लागि आवश्यक बस्तु तथा सेवा खरिद गर्न सक्ने समय भने घटेको देखाएको छ । गत ५ महिनासम्म राष्ट्र बैंकमा जम्मा रहेको अमेरिकी डलरले ९ महिनासम्मको बस्तु आयात गर्न पुग्ने भएपनि ६ महिनासम्म आइपुग्दा घटेर ८.९ महिनामा सिमित भएको छ ।

निर्यात झन् घट्यो, आयात अझै बढ्यो
चालु आर्थिक बर्षको ६ महिनासम्मको अबधिमा निर्यात बृद्धिदर झन घटेको छ । गत बर्षको सोही अवधिमा १३.५ प्रतिशतले बढेको निर्यात यो बर्षको ६ महिनामा जम्मा १०.३ प्रतिशतले मात्रै बढेको छ । गत पुस मसान्तसम्ममा नेपालबाट ४५ अर्ब ४१ करोड रुपैयाँ बराबरको बस्तु निर्यात भएको छ ।

आयातको बृद्धिदर भने गत बर्षको भन्दा निकै बढेको छ । गत बर्षको ६ महिनामा बस्तु आयात १९.४ प्रतिशतले बढेको भएपनि यो बर्ष ३०.५ प्रतिशतले बढेको छ । गत पुस मसान्तसम्ममा नै नेपालमा विदेशबाट ७ खर्ब २३ अर्ब ९४ करोड रुपैयाँ बराबरको बस्तु आयात भएको छ ।

६ महिनामा पौने ७ खर्बको ब्यापार घाटा
यो ६ महिनाको अवधिमा बस्तु ब्यापार घाटा ३२ प्रतिशतले बढेको छ । यो बृद्धि गत आर्थिक बर्षको ६ महिनाको अबधिसँग नै तुलना गरिएको हो । चालु आर्थिक बर्षको ६ महिनामा बस्तु ब्यापार घाटा ६ खर्ब ७८ अर्ब ५३ करोड रुपैयाँभन्दा बढी भएको राष्ट्र बैंकको तथ्यांकमा उल्लेख छ ।

रेमिटान्सले थेग्न छोड्यो ब्यापार घाटा
केही बर्ष अगाडिसम्म ब्यापार घाटालाई रेमिटान्स आयले थेग्ने गरेका कारण भुक्तानी सन्तुलनमा खासै चाप परेको थिएन । तर, केही बर्षयता रेमिटान्स बृद्धिदर कम हुदै गएको र रेमिटान्स आयको तुलनामा बस्तु आयात बढी भएको कारण भुक्तानी सन्तुलनमा चाप पर्न थालेको छ । यसैकारण भुक्तानी सन्तुलन ऋणात्मक हुने गरेको हो ।

राष्ट्र बैंकका अनुसार चालु आार्थिक बर्षको ६ महिनामा ३०.२ प्रतिशतले बढेर ४ खर्ब ४३ अर्ब ३६ करोड रुपैयाँ पुगेको छ । गत बर्षको सोही अवधिमा भने रेमिटान्स आय ०.५ प्रतिशतले घटेको थियो ।

मूल्य बृद्धि ४.६ प्रतिशत
चालु आर्थिक बर्षको पुसमा गत बर्षको सोही अवधिको तुलनामा मूल्यबृद्धि ४.६ प्रतिशतले बढेको छ । खाद्य तथा पेय पदार्थ समुहको मूल्यबृद्धि २.७ प्रतिशतले बढेको छ भने गैर खाद्य तथा सेवा समुहको मूल्य बृद्धि ६.१ प्रतिशत रहेको छ ।

प्रकाशित मिति: बिहीबार, फागुन २, २०७५ ०४:०३