संयन्त्र बनाएर गठबन्धनमा जाने भयो कांग्रेस, टिकट बाँड्ने समितिको लागेन टुंगो

संयन्त्र बनाएर गठबन्धनमा जाने भयो कांग्रेस, टिकट बाँड्ने समितिको लागेन टुंगो

A+ A A-

नेपाली कांग्रेस चुनावी गठबन्धन गरेरै स्थानीय निर्वाचनमा होमिने भएको छ । पार्टीको केन्द्रीय कमिटी बैठकले चुनावमा स्थानीय आवश्यकताअनुसार गठबन्धन गरेर जाने सर्वसम्मत निर्णय गरेको हो । सानेपास्थित पार्टी कार्यालयमा बसेको केन्द्रीय कार्यसमितिको बैठकले केन्द्रदेखि तल्लो किमटीसम्म संयन्त्र बनाएर गठबन्‍धनमा जाने नीतिगत निर्णय लिएको हो ।

बैठकपछि सञ्चारकर्मीहरूसँग कुरा गर्दै कांग्रेसका वरिष्ठ नेता रामचन्द्र पौडेलले स्थानीय आवश्यकताअनुसार गठबन्धन गरेर जाने सर्वसम्मत निर्णय भएको बताए । 'केन्द्रको रेखदेखमा स्थानीय आवश्यकताअनुसार गठबन्धन गरेर जाने सर्वसम्मत निर्णय भएको छ । माथिदेखि तलसम्म संयन्त्र बनाएर हामी गठबन्धनको नीतिगत निर्णयलाई व्यवहारमा कार्यान्वयन गर्नेछौँ,' पौडेलले भने ।

समग्र पार्टी पङ्क्तिलाई एकताबद्ध रूपमा चुनावमा परिचालन गरिने उनले बताए । अधिकतम स्थानमा कांग्रेसको जीत सुनिश्चित हुनेगरी गठबन्धन गरिने पौडलको भनाइ छ । महानगर र उपमहानगरपालिकाको हकमा केन्द्रीय संयन्त्रले स्थानीय आवश्यकताअनुसारको निर्णय लिने र अन्य स्थानमा स्थानीय कमिटीलाइ नै जिम्मेवारी दिइने पौडेलको भनाइ छ ।

बैठकपछि बोल्दै प्रवक्ता प्रकाशरण महतले गठबन्धनको आवश्यकता रहेको विचार प्रकट भएकाले सबैको भावनालाई मध्यनजर गर्दै तालमेलको निर्णय गरिएको बताए । 'गठबन्धन बन्दा भएको सहमतिको कार्यान्वयन गर्न र स्थानीय तहमा बहुसंख्यक स्थानमा पार्टीलाई विजयी बनाउन कांग्रेसले गठबन्धन गर्ने नीतिगत निर्णय सर्वसम्मतिले गरेको छ,' उनले भने ।

संविधान निर्माणमा कांग्रेसले निर्वाह गरेको भूमिका, देश विकास र समृद्धिकाल लागि देखाएको जिम्मेवार शैलीका कारण कांग्रेसको पक्षमा आकर्षण रहेको बैठकको निष्कर्ष छ । 'विभिन्न कालखण्डमा हामीले निर्वाह गरेको नेतृत्वदायी भूमिका र घर-घर जाऔँ कांग्रेस जिताऔँ अभियानले पार्टीको पक्षमा आकर्षण बढाएको छ । विजयको आधारलाई सबल बनाउन एकजुट भएर निर्वाचनमा परिचालन हुने निर्णय छ,' प्रवक्ता महतले भने ।

बैठकले स्थानीय चुनाव परिचालन समितिको जिम्मेवारी उपसभापति पूर्णबहादुर खड्कालाई दिएको छ भने प्रचार-प्रसार समितिको संयोजकमा प्रवक्ता महतलाई तोकेको छ ।

टिकट बाँड्ने समितिको लागेन टुंगो

कांग्रेसको केन्द्रीय कार्यसमितिको बैठकले चुनावमा उम्मेदवारलाई टिकट दिने संसदीय बोर्ड भने गठन गर्न सकेन । प्रधानमन्त्रीसमेत रहेका सभापति शेरबहादुर देउवाको भारत भ्रमणको व्यस्ततालाई मध्यनजर गर्दै बोर्ड तत्काल गठन गर्न नसकिएको प्रवक्ता महतले बताए । 'प्रधानमन्त्रीको भारत भ्रमणमा व्यस्त रहने भएकाले र केही परामर्शसमेत आवश्यक रहेकाले समिति अहिले गठन गर्न सकिएन,' उनले भनेका छन् ।

कांग्रेसको संसदीय समितिमा सभापति देउवाले समावेशी सिद्धान्तका आधारमा भन्दा पनि वरियाताका आधारमा संसदीय बोर्ड गठन गर्ने मनसाय राखेका छन् । उनको यो मनसाय नेता शेखर कोइरालालाई समितिबाट बाहिर राख्नका निम्ति भएको भन्दै उनका समूहले आपत्ति जनाइसकेका छन् । यो समिति प्रदेश र संघको निर्वाचनमा समेत टिकट वितरण गर्ने भएकाले यसमा पर्न नेताहरूको लबिइङ छ ।

सभापति देउवाले वरियताका आधारमा सदस्य मनोनयन गरेको खण्डमा नेता कोइराला त्यसमा अटाउने छैनन् । हाल केन्द्रीय समितिको वरियतामा उनी २६औँ स्थानमा छन् । सभापतिले कोषाध्यक्ष नियुक्त गरे उनी २७औँ स्थानमा झर्न सक्नेछन् । सभापति देउवाले वरियताकै आधारमा ११ केन्द्रीय सदस्यलाई मनोनयनको प्रस्ताव गरेको अवस्थामा पदाधिकारीबाहेक वरिष्ठ नेता रामचन्द्र पौडेल, गोपालमान श्रेष्ठ, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, शशांक कोइराला, चित्रलेखा यादव, रामशरण महत, अर्जुननरसिंह केसी र प्रकाशसरण महत मात्रै अटाउनेछन् ।

कांग्रेस महानमन्त्री गगन थापाले नेता कोइरालालाई समितिबाट बाहिर राखे त्यो अन्यायका विरुद्ध देशभर विद्रोह हुने चेतावनी दिएका छन् । आफ्नो सचिवालयमा आफूनिकट नेताहरूसँग मंगलबार कुरा गर्दै उनले भनेका छन्, 'सभापतिबाट कुनै पनि अन्याय हुनुहुँदैन । यदी उहाँले नेता कोइरालालाई बोर्डबाट बाहिर राख्ने चेस्टा गरेको खण्डमा त्यसको नतिजाको सामना गर्न सभापति तयार हुनुपर्छ,' उनले भनेका छन् ।

कांग्रेस महामन्त्री विश्वप्रकाश शर्मा भने संसदीय बोर्ड महत्वपूर्ण समिति भएकाले सभापतिले शीर्ष नेतालाई अन्याय नगर्ने बताउँछन् । 'चुनावमा समग्र पार्टी पङ्क्तिलाई एकताबद्ध रूपमा अघि बढाउने सभापतिको प्रतिबद्धता छ । उहाँले शेखर कोइराला, प्रकाशमानसिंह र विमलेन्द्र निधि कसैलाई पनि अन्याय गर्नुहुनेछैन,' उनले भने ।

प्रधानमन्त्री १८ चैतदेखि तीन दिनका लागि भारतमा हुनेछन् । भारतीय समकक्षी नरेन्द्र मोदीको निमन्त्रणमा उनी भारत जान लागेका हुन् । देउवा भारतबाट फर्किएपछि आवश्यक परमार्श गरेर बोर्डलाई पूर्णता दिने प्रवक्ता महतले बताएका छन् ।

तस्वीरहरूः सुशील श्रेष्ठ/शिलापत्र

प्रकाशित मिति: मंगलबार, चैत १५, २०७८ १८:३९