गरिमा क्यापिटलले प्राप्ति गर्‍यो केसीयल, अब संयुक्त कारोबार

A+ A A-

गरिमा क्यापिटल लिमिटेडले केसीएल अस्ट्युट क्यापिटल लिमिटेडलाई प्राप्ति गरेको छ । याेसँगै अब केसीएल अस्ट्युट क्यापिटलले गर्ने सम्पूर्ण कारोबार गरिमा क्यापिटल लिमिटेडको नामबाट हुनेछ ।

४ असार २०७८ मा केसीएल अस्ट्युट क्यापिटल र गरिमा विकास बैंकबीच गरिमा विकास बैंकद्वारा केसीएल अस्ट्युट क्यापिटलको शेयर लगानी/स्वामित्व खरिद गर्नेसम्बन्धी समझदारी भएको थियो । सो समझदारीअनुसार कम्पनी रजिष्ट्रारको कार्यालयले यही ७ चैतमा स्वीकृति दिएसँगै साविकको केसीएल अस्ट्युट क्यापिटल लिमिटेड गरिमा क्यापिटलमा गाभिएको हो ।

अब केसीएल अस्ट्युट क्यापिटलको नाममा रहेको सम्पूर्ण चल अचल सम्पत्ति तथा तिर्नु व्यहोर्नुपर्ने कर दायित्व आदि परिवर्तित नामको कम्पनी अर्थात् गरिमा क्यापिटलले सकार्ने व्यहोर्ने बताइएको छ ।

गरिमा विकास बैंकको ५१.२० प्रतिशत शेयर स्वामित्व रहने गरी संस्थाको नाम पनि गरिमा क्यापिटल लिमिटेडको रूपमा रुपान्तरण भएको छ ।

गरिमा क्यापिटल लिमिटेड नेपाल धितोपत्र बोर्डबाट अनुमतिप्राप्त मर्चेन्ट बैंकर हो । साविक केसीएल अस्ट्युट क्यापिटल लिमिटेडबाट लगानी व्यवस्थापन सेवा तथा निक्षेप सदस्य (डिम्याट तथा मेरो शेयर खातासम्बन्धी) सेवा प्रवाह हुँदै आएको थियाे ।

अब निकट भविष्यमा नै गरिमा क्यापिटलले मर्चेन्ट बैंकरले प्रदान गर्न सक्ने अन्य सम्पूर्ण सेवाहरू जस्तैः निष्कासन तथा बिक्री प्रबन्ध, धितोपत्र प्रत्याभूति, शेयर रजिष्ट्रेसन, संस्थागत परामर्श तथा सामूहिक लगानी कोष, प्राइभेट इक्विटी फण्ड, भेन्चर क्यापिटल फण्ड, हेज फण्डलगायत अन्य फण्डहरूको व्यवस्थापनसम्बन्धी सेवाहरू प्रदान गर्नेछ ।

गरिमा क्यापिटल लिमिटेडका सेवाहरू ग्राहक समक्ष पुर्‍याउन गरिमा विकास बैंक लिमिटेडका सम्पूर्ण शाखा कार्यालयहरूबाट सहजीकरण हुने व्यवस्था मिलाइने कम्पनीले जनाएको छ ।

प्रकाशित मिति: मंगलबार, चैत १५, २०७८ १७:५३