'बैंकमा कर्जायोग्य रकम कम भएको हो, लगानी गर्नै नसक्ने अवस्था होइन'

A+ A A-

बैंक तथा वित्तीय संस्थाहरूबाट आजको दिनमा सहजै कर्जा पाउन सकिँदैन । बैंकहरूले दिने कर्जायोग्य रकम (तरलता) सहज नहुनु र निक्षेप संकलनमा उचित सुधार नहुनुले पनि तरलता अभावको खाडल थप गहिरिँदै गएको छ ।

कर्जायोग्य रकम नभएको भन्दै यतिबेला बैंक तथा वित्तीय सस्थाहरू कर्जा दिन पन्छिरहेका छन् भने राष्ट्रबैंक बैकिङ प्रणालीमा तरलताको अवस्था सहज बनाउन हरप्रयास गरिरहेको छ । तर अवस्था सुधारोन्मुख देखिँदैन ।

झण्डै दुई बर्षसम्म कोरोना संक्रमणका कारण लकडाउन र निषेधाज्ञा झेलेको मुलुकमा संक्रमण कम भएसँगै कर्जाको माग ह्वात्तै बढ्न पुगेको छ । कर्जा प्रवाह वृद्धि हुनु र त्यसमा बैंकहरूले संयममता नअपाउनुले पनि तरलता लामो समयसम्म सहज बन्न सकेको छैन ।

अर्थमन्त्री जनार्दन शर्माले बैंकहरूबाट पुँजी हराएको भन्दै दिएको अभिव्यक्तिले पनि नेपालका बैंकिङ प्रणालीबाट लगानीयोग्य रकम हराएको हो भन्ने प्रश्न आम सर्वसाधारणमा उब्जिन थालेको छ । यसैलाई लिएर सर्वसाधरणमा नेपालको अर्थतन्त्र आर्थिक विप्पत्तिमा फसिरहेको श्रीलंकाको जस्तै बन्ने त होइन भन्ने प्रश्नहरू उब्जन थालेको छ ।

बैंकिङ क्षेत्रमा लामो अनुभव संगालेका नबिल बैंकका अध्यक्ष उपेन्द्र पौडेल बैंकमा कर्जायोग्य रकम कम भए पनि लगानी गर्नै नसक्ने अवस्था भने नरहेको बताउँछन् । उनी बैंकर एसोसिएसन नेपालका पूर्वअध्यक्ष पनि हुन् ।