विदेशमा मृत्यु भएका कामदारका परिवारले अब अनलाइनबाटै क्षतिपूर्ति लिन पाउने

विदेशमा मृत्यु भएका कामदारका परिवारले अब अनलाइनबाटै क्षतिपूर्ति लिन पाउने

A+ A A-

वैदेशिक रोजगार बोर्डबाट प्रदान हुने आर्थिक सहायतालगायतका सेवाहरू अब अनलाइनबाटै लिन पाइने भएको छ ।

सोमबारदेखि बोर्डबाट प्रदान हुने आर्थिक सहायतालगायतका सेवा वैदेशिक रोजगार कल्याणकारी सूचना व्यवस्थापन प्रणालीबाट प्रदान गर्न थालिएको छ ।

वैदेशिक रोजगार नियमावली २०६४ को पाँचौँ संशोधनमा श्रम स्वीकृति लिई वैदेशिक रोजगारीमा गएका श्रमिकको करार अवधि वा करार अवधि सकिएको एक वर्षभित्र कुनै कारणले मृत्यु, अङ्गभङ्ग वा गम्भीर बिरामी भएमा घटना भएको मितिले एक वर्षभित्र बोर्डमा नियमअनुसार आर्थिक सहायताका लागि पीडित परिवारले निवेदन दिन पाउँछन् । निवेदन आफ्नो स्थानीय तहबाट अनलाइनमा दिन सकिने बोर्डका कार्यकारी निर्देशक राजन श्रेष्ठले जानकारी दिए ।

अब भने निवेदन दिने प्रक्रियालाई थप सरल र सहज बनाउन बोर्डले अनलाइन प्रणालीको विकास गरेर कार्यान्वयनमा ल्याएको उनको भनाइ छ । श्रममन्त्रीस्तरको निर्णयबाट वैदेशिक रोजगार कल्याणकारी सूचना व्यवस्थापन प्रणाली सञ्चालन तथा व्यवस्थापन कार्यविधि २०७८ स्वीकृत भएर कार्यान्वयनमा समेत आइसकेको छ ।

वैदेशिक रोजगारीका क्रममा मृत्यु भएका श्रमिकको हकवालाले नियमअनुसार पाउने बीमा रकमको भुक्तानीका लागि समेत यही प्रणालीमार्फत प्रक्रिया गर्न सकिनेछ ।

कार्यविधिअनुसार अब मृत्यु, अङ्गभङ्ग, गम्भीर बिरामी भएमा पाइने आर्थिक सहायता, शैक्षिक छात्रवृत्ति, श्रमिकको परिवारले पाउने स्वास्थ्य उपचार खर्च, शव नेपाल झिकाउने, अलपत्र श्रमिकलाई उद्धार गरी स्वदेश ल्याउने, निःशुल्क शव ढुवानी सेवालगायतका बोर्डमार्फत पाइने सेवाका लागि अनलाइनमार्फत निवेदन दिन सकिन्छ ।

अनलाइन प्रणालीमार्फत पालिकाहरूमार्फत प्राप्त हुन आएका निवेदनहरूमा कागजात पुगेमा नियमअनुसार पाउनुपर्ने क्षतिपूर्ति बोर्डले व्यक्तिको बैङ्क खातामा नै पठाउनेछ । आर्थिक सहायता प्राप्त भएको जानकारी मोबाइल एसएमएसमार्फत व्यक्तिलाई जानकारी आउनेछ ।

यस्तै, एकपटक वैदेशिक रोजगारीमा गएर पुनः त्यही काममा जाने श्रमिकले अब अभिमुखीकरण तालिम लिन नपर्ने भएको छ । १४ चैतदेखि नै यो व्यवस्था लागू भएको श्रम मन्त्रालयले जनाएको छ ।

प्रकाशित मिति: मंगलबार, चैत १५, २०७८ १३:५५