पर्वत-कास्की जोड्ने १३२ केभी लाहाचोक सबस्टेसन सञ्चालनमा

A+ A A-

नयाँ मोदी (पर्वत)–लेखनाथ (कास्की) १३२ केभी डबल सर्किट प्रसारणलाइन आयोजनाअन्तर्गत लाहाचोक सबस्टेसन साेमबार उद्घाटन भएको छ ।

सबस्टेसनमा १३२/३३ केभी, ३० एमभीए र ३३/११ केभी, ८ एमभीएका पावर ट्रान्सफर्मरहरू रहेका छन् । सबस्टेसनमा स्थानीय रूपमा विद्युत् आपूर्तिका लागि ३३ केभीकाे एक लाइन वे र चारवटा ११ केभीका फिडरहरू रहेका छन् ।

नयाँ मोदी–लेखनाथ प्रसारणलाइन आयोजनाअन्तर्गत पर्वतको मोदी गाउँपालिका–२ देउपुरमा रहेको सबस्टेसनबाट लाहाचोकसम्मको १३२ केभी प्रसारणलाइन निर्माण सम्पन्न भई सञ्चालनमा आइसकेको नेपाल विद्युत् प्राधिकरणले जानकारी गराएको छ ।

नयाँ मोदी १३२ केभी स्वीचिङ स्टेसनमार्फत मोदी जलविद्युत् केन्द्रहुँदै लाहाचोक सबस्टेसन राष्ट्रिय ग्रिडमा जोडिएको र सबस्टेसनबाट हेम्जा ३३/११ केभी सबस्टेसन पनि जोडिनेछ ।

लाहाचोक सबस्टेसनबाट कास्कीको माछापुच्छ्रे, अन्नपूर्ण गाउँपालिका र पोखरा महानगरपालिकामा विद्युत् आपूर्ति दिइएको छ । यसबाट त्यस क्षेत्रको विद्युत आपूर्ति गुणस्तरीय र भरपर्दो हुने दाबी प्राधिकरणले गरेको छ ।

अनुमानित लागत २ अर्ब २४ करोड रुपैयाँ रहेको आयोजनामा नेपाल सरकार तथा नेपाल विद्युत् प्राधिकरणको लगानी र आयात निर्यात (एक्जिम) बैंक भारतको सहुलियतपूर्ण ऋण छ ।

सोमबार उद्घाटन कार्यक्रमममा ऊर्जामन्त्री पम्फा भुसालले विगतमा बत्ती बाल्ने कुरा मात्रैै चर्चा हुने गरेकोमा अब उद्योग कलकारखाना, यातायातलगायतका सबै क्षेत्रमा विद्युत्‌को उपभोग गर्ने अवस्थामा पुगिएको र नेपाल ऊर्जामा आत्मनिर्भर बन्नेतर्फ अगाडि बढेको बताइन् ।

‘नदीमा पानीको बहावका आधारमा विद्युत् उत्पादन हुने आयोजना बढिरहेकाले वर्षामा धेरै विद्युत् उत्पादन हुने र हिउँदमा कम हुने अवस्था छ, हिउँदको माग धान्न केही महिना मात्र आगामी वर्ष विद्युत् आयात गर्नुपर्छ’, मन्त्री भुसालले भनिन् ‘वर्षामा बढी भएको विद्युत् निर्यातका लागि छिमेकी मुलुकसँग विद्युत् व्यापार वृद्धिका लागि सकारात्मक छलफल भइरहेको छ, छिट्टै निष्कर्षमा पुग्नेछौँ ।’

गण्डकी प्रदेशका अर्थमन्त्री रामजी बरालले प्रसारणलाइन निर्माणमा स्थानीयले उठाएको वास्तविक समस्यालाई सम्बोधन गरी आयोजना निर्माण गरिनुपर्ने बताए ।

ऊर्जा, जलस्रोत तथा सिँचाइ मन्त्रालयका सचिव देवेन्द्र कार्कीले आयोजनाप्रति स्थानीयको अपनत्व बढाउन निर्माणका क्रममा स्थानीयले उठाएका जायज मागलाई सम्बोधन गरिने बताए ।

नेपाल विद्युत् प्राधिकरणका कार्यकारी निर्देशक कुलमान घिसिङले प्रसारणलाइन र सबस्टेसन सञ्चालनमा आएपछि विद्युत् आपूर्ति गुणस्तरीय तथा भरपर्दो भएको र यस क्षेत्रमा निर्माणाधीन विभिन्न जलविद्युत् आयोजनाबाट उत्पादित विद्युत् राष्ट्रिय ग्रिडमा प्रवाह गर्न पूर्वाधार तयार भएको बताए ।

नयाँ मोदी–लेखनाथ प्रसारणलाइन आयोजनाअन्तर्गत नयाँ मोदीमा १३२ केभी स्वीचिङ सबस्टेसन, लाहाचोकमा नयाँ सबस्टेसन र लेखनाथ सबस्टेसनको स्वीचयार्डमा १३२ केभी लाइनको वे निर्माण कार्य सम्पन्न भएको छ । सबस्टेसन निर्माणका लागि हिताची इनर्जी लिमिटेड (एबीबी), भारतसँग ठेक्का सम्झौता भएको थियो ।

प्रसारणलाइन निर्माणका लागि कलपत्रु पावर ट्रान्समिसन लिमिटेड, भारतसँग ठेक्का सम्झौता भएको थियो । आयोजनाअन्तर्गत नयाँ मोदी–लाहाचोक प्रसारणलाइन खण्ड निर्माण सम्पन्न भई सञ्चालनमा आइसकेको छ भने लाहाचोक–लेखनाथ खण्ड निर्माणाधीन छ । लाहाचोक–लेखनाथ खण्डमा पर्ने ७५ वटा टावरमध्ये १९ वटाको निर्माण बाँकी छ ।

माच्छापुच्छ्रे गाउँपालिका र पोखरा महानगरपालिको विभिन्न ठाउँका स्थानीय बासिन्दाले प्रसारण लाइनको रुट परिवर्तन माग गर्दै अवरोध गरेका कारण निर्माण प्रभावित भएको छ । प्रसारणलाइनको लम्बाइ ४३ किलोमिटर रहेको छ ।

प्रकाशित मिति: सोमबार, चैत १४, २०७८ १८:३८