लेटाङ घटना : २० जना प्रहरी नियन्त्रणमा, १६ जनाविरुद्ध म्याद थप

फाइल तस्वीर

A+ A A-

बालिकालाई शिक्षकले यौन दुर्व्यवहार गरेको प्रकरण एकजना महिला प्रहरीको ज्यान जानेगरी मोरङको लेटाङमा भएको घटनामा अहिलेसम्म प्रहरीले २० जनालाई नियन्त्रणमा लिएको छ ।

यही ६ चैतमा मोरङको लेटाङ–५ खेरुवास्थित शिक्षा विकास माविका शिक्षक मनोज पौडेलले सोही विद्यालयकी एक छात्रालाई यौन दुर्व्यवहार गरेको आरोपमा स्थानीय र प्रहरीबीच झडप हुँदा प्रहरी जवान २६ वर्षीया उर्मिला श्रेष्ठको धारिलो हतियार प्रहारगरी हत्या भएको थियो ।

प्रहरीको हत्या र भडपमा संलग्न आरोपमा लेटाङ नगरपालिका–५ का ४८ वर्षीय चन्द्रकान्ता लामा, सोही ठाउँका २५ वर्षीय रविन राई, २० वर्षीय रविन तामाङ, लेटाङ–६ का १८ वर्षीय पालाराम राई, सोही वडाका १८ वर्षीय राम राई, १८ वर्षीय सन्तोष पौडेल, २० वर्षीय हिमाल श्रेष्ठ, लेटाङ–५ का २३ वर्षीय प्रदिप राई, सोही वडाकी १८ वर्षीय निशा पुलामी मगर, १८ वर्षीय सुरज अधिकारी, १९ वर्षीय संंजय मगर, २० वर्षीय कृष्ण विक, संजीव प्रधान, प्रनिस कट्टेल, झविन भन्ने जस्वीन पाख्रिन, सुनिल लिम्बू, प्रल्हाद खड्का, अर्पण परियार, पासाङ तामाङ र लेटाङ–६ का श्रवण यादवलाई नियन्त्रणमा लिइएको जिल्ला प्रहरी कार्यालय मोरङले जनाएको छ । ‘अहिले नियन्त्रणमा लिइएकाहरुलाई फिल्टर गरिरहेका छौँ’, मोरङका प्रहरी उपरीक्षक जनार्दन जीसीले भने, ‘केही अभद्र र केहीलाई कर्तब्य ज्यान मुद्दामा लगेका छौँ ।’

प्रहरी उपरीक्षक जीसीले नियन्त्रणमा लिइएका १६ जनाको जिल्ला आदालत मोरङबाट म्याद थप गरी अनुसन्धान भइरहेको जानकारी दिए । उनका अनुसार छात्रामाथि यौन दुर्व्यवहारका आरोपित शिक्षक पौडलविरुद्ध दुई पटक म्याद थप भई अनुसन्धान भइरहेको छ ।

उक्त घटनाबारे प्रहरीको केन्द्रीय अनुसन्धान ब्यूरो (सीआईवी), प्रदेश १ प्रहरी र मोरङ प्रहरीको संयुक्त टोलीले अनुसन्धान गरिरहेको छ ।