लगानी बोर्ड र उद्योग वाणिज्य महासंघबीच लगानी सम्झौता

A+ A A-

लगानी बोर्ड र नेपाल उद्योग वाणिज्य महासंघबीच लगानीसम्बन्धी विस्तृत सम्झौतापत्रमा हस्ताक्षर भएको छ । अर्थमन्त्री जनार्दन शर्माको उपस्थितिमा आइतबार लगानी बोर्डका प्रमुख कार्यकारी अधिकृत सुशील भट्ट र उद्योग वाणिज्य महासंघ अध्यक्ष शेखर गोल्छाले सम्झौतापत्रमा हस्ताक्षर गरेका छन् ।

सो अवसरमा अर्थमन्त्री शर्माले नेपालमा विदेशी लगानी मात्रै नभएर लगानीसँगै प्रविधि पनि ल्याउन आवश्यक रहेको बताए । उनले लगानीसँग प्रविधि भित्र्याउँदा निजीक्षेत्रका लागि फाइदा पुग्न सक्ने दाबी गरे ।

अहिले विदेशी लगानी ल्याउनका लागि केही नीतिगत तथा ऐन र कानुनी रूपमा समस्या देखिएको अर्थमन्त्री शर्माले बताए । उनले हरेक कुरामा लागत बढ्दै गएकाले सरकार लागत कम गर्ने प्रक्रियामा लागेको बताए । नेपाल डुइङ बिजनेस इन्डेक्समा ९६औँ स्थानमा रहेको भन्दै अर्थमन्त्री शर्माले त्यसलाई सुधार गरेर १५औँ स्थानमै ल्याउनुपर्ने बताए । उनले नेपाल डुइङ बिजनेस सुधार गर्नका लागि निजीक्षेत्र र लगानी बोर्ड लाग्नुपर्ने बताए ।

अर्थमन्त्री शर्माले आयोजनाहरूले नै ऋण तिर्न सक्नेगरी लगानी योजना बनाउनुपर्ने उल्लेख गर्दै अब योजना बनाउँदा ऋण जनताको टाउकोमा बोकाउन नहुने बताए । उनले जलविद्युत्‌मा मात्रै नभएर अन्य पूर्वाधारका क्षेत्रमा लगानी भित्र्याउनुपर्ने आवश्यक भएको उल्लेख गरे ।

मन्त्री शर्माले मुलुकमा लगानी बढाउनका लागि ‘डाइरेक्ट इन्भेस्टमेन्ट फण्ड’ तयार गर्न लागेको बताए । उनले यो फण्डमा निजीक्षेत्रको पनि सहभागिता हुनुपर्ने बताए ।

कार्यक्रममा लगानी बोर्डका सीईओ सुशील भट्टले महालेखा परीक्षकले लगानी प्रतिबद्धताअनुसार नआएको भन्दै बेरुजू लेख्न थालेकोमा दुःख लागेको बताए । उनले नेपालले गुणस्तरीय विदेशी लगानी खोजेको बताए । भट्टले अहिले विदेशी लगानी प्रतिवद्धता धेरै भए पनि लगानीमा परिणत नभएको विषयमा अनुसन्धानको विषय भएको बताए ।

नेपाल उद्योग वाणिज्य महासंघका अध्यक्ष शेखर गोल्छाले अहिलेको मुख्य समस्या मुलुकमा रकमको अभाव भएको बताए । उनले व्यापारघाटा सात महिनामै १० खर्ब नाघेको तर, वैदेशिक सहायता बढ्न नसकेकाले अहिले मुलुकको अर्थतन्त्रमा समस्या आएको बताए । उनले अब विदेशी लगानी ठूला उद्योगमा मात्रै नभएर साना तथा मझौला उद्योग पनि ल्याउनुपर्ने उल्लेख गरे । गोल्छाले नेपालमा विदेशी लगानी प्रतिबद्धता धेरै आउने तर, लगानी नआउने समस्या भएको टिप्पणी गरे ।

त्यस्तै, महासंघकी पूर्वअध्यक्ष तथा लगानी बोर्डका सदस्य भवानी राणाले मुलुकमा अहिले अर्थतन्त्रमा देखिएका चुनौती सामना गर्नका लागि आन्तरिक अर्थतन्त्र परिचालन तथा विदेशी ठूला लगानीको आवश्यकता भएको बताइन् ।

प्रकाशित मिति: आइतबार, चैत १३, २०७८ १४:१६