ओलीको गृहजिल्लामा वर्चस्व जाेगाउने दाउमा एमाले, माओवादी राप्रपाभन्दा कमजोर

ओलीको गृहजिल्लामा वर्चस्व जाेगाउने दाउमा एमाले, माओवादी राप्रपाभन्दा कमजोर

A+ A A-

स्थानीय तहकाे चुनाव मिति नजिकिँदै जाँदा झापामा क्रियाशील राजनीतिक दल र उम्मेदवारका आकांक्षीहरू चुनावी अभियानमा व्यस्त छन् । झापा नेकपा (एमाले) अध्यक्ष तथा पूर्वप्रधानमन्त्रीसमेत रहेका केपी शर्मा ओलीको गृहजिल्ला र निर्वाचन क्षेत्रसमेत हो । त्यसैले आगामी ३० वैशाखमा हुने स्थानीय तहको चुनावमा आफ्नो वर्चस्व कायम राख्नु एमालेका लागि प्रतिष्ठाको विषय हो ।

त्यस्तै, अन्य दलहरूलाई पनि आफ्नो प्रभाव विस्तार गर्नु चुनौतीको विषय बनेको छ । त्यसो त २०७४ सालको चुनावमा प्रतिस्पर्धा गरेका झापाका प्रमुख राजनीतिक दलहरूमध्ये नेपाली कांग्रेसबाहेक अहिले कोही पनि सग्लो छैनन् । त्यसकारण यसपटकको चुनाव रोचक हुने देखिएको छ ।

२०७४ सालको निर्वाचनमा झापामा नेकपा (एमाले) पहिलो, नेपाली कांग्रेस दोस्रो र राष्ट्रिय प्रजातन्त्र पार्टी तेस्रो शक्ति बनेका थिए । सो निर्वाचनमा नेकपा माओवादी केन्द्र राष्ट्रिय प्रजातन्त्र पार्टीभन्दा निकै कमजोर देखिएको थियो ।

१५ वटा स्थानीय तह र १३१ वडा रहेको झापामा २०७४ सालको चुनावमा एमालेले सात, नेपाली कांग्रेसले पाँच र राष्ट्रिय प्रजातन्त्र पार्टीले तीन स्थानीय तहमा प्रमुख जितेका थिए ।

त्यस्तै, एमालेले १२ पालिकाका उपप्रमुख, कांग्रेसले दुई र राष्ट्रिय प्रजातन्त्र पार्टीले एउटा स्थानीय तहको उपप्रमुख जितेकाे थियाे । माओवादी केन्द्र एउटा पनि स्थानीय तहमा विजयी हुन सकेको थिएन । झापाका कुल १३१ वडामध्ये एमालेले ७९, नेपाली कांग्रेसले ३८, राष्ट्रिय प्रजातन्त्र पार्टीले ७ र मओवादी केन्द्रले ६ वडा जितेकाे थियाे ।

सो चुनाव परिणामअनुसार एमाले सबैभन्दा बलियो अवस्थामा छ, भने माओवादी राष्ट्रिय प्रजातन्त्र पार्टीभन्दा कमजोर अवस्थामा देखिएको छ । २०७४ सालको स्थानीय तह चुनावमा विजयी झापाका प्रमुख चार दलमध्ये यतिबेला नेपाली कांग्रेसबाहेक कुनै पनि सग्लो छैनन् । एमाले र राप्रपा विभाजित अवस्थामा छन् ।

सत्ता गठबन्धनको प्रमुख घटक माओवादी केन्द्रका अधिकांश नेता कार्यकर्ता आफूहरूसँगै समाहित भएको एमालेको दाबी छ । केही साताअघि मात्र एमाले अध्यक्ष ओली आफैँ झापा पुगेर माओवादी केन्द्रका नेता/कार्यकर्तालाई पार्टीमा प्रवेश गराएका थिए ।

एमालेले फुटेर जानेभन्दा भित्रिनेको संख्या अत्यधिक भएकाले विभाजनको कुनै असर नरहेको दाबी गरेको छ । आगामी निर्वाचनमा एमालेले आफ्नो विरासत जोगाउने रणनीतिसहित निर्वाचनको तयारीमा जुटेको छ भने सत्ता गठबन्धनमा आबद्ध दलहरू एमालेको वर्चस्व भत्काउने ध्याउन्नमा छन् ।

एमाले झापाका अध्यक्ष दिपक कार्की २०७४ सालको चुनावमाभन्दा अहिले पार्टी झन बलियो अवस्थामा रहेको दाबी गर्छन् । ‘केही लोभीपापी मात्र पार्टीबाट चोइटिएर गएका हुन् । हामीसँग अत्यधिक संख्यामा माओवादीका नेता/कार्यकर्ता समाहित हुनुभएको छ । कांग्रेस र अरु पार्टीबाट पनि धेरै संख्यामा पार्टी प्रवेश भएको छ’, उनले शिलापत्रसँग भने,‘हामी पहिलेभन्दा अहिले अझ बलियो अवस्थामा छौँ । दक्षिण भेगमा पनि एकदमै सुदृढ भएका छौँ । हामी अझ धेरै पालिका र वडाहरू हामी जित्दैछौँ ।’

अध्यक्ष कार्कीले एमालेविरुद्ध गठबन्धन गरेर आए पनि आफूहरूलाई कुनै असर नपर्ने दाबी गरे । उनले आवश्यकताका आधारमा एमालेले पनि गठबन्धन गर्नसक्ने बताए । ‘हामीसँग एक्ला–एक्लै लडने तागत कसैसँग पनि छैन । हामीविरुद्ध गठबन्धन गर्छौं भन्ने कुराले नै त्यसको पुष्टि गर्छ’, उनले भने, ‘हामी पनि औचित्यका आधारमा गठबन्धन गर्न सक्छौं ।’ अध्यक्ष कार्कीले वर्तमान सत्ता गठबन्धनमा आबद्ध दलसँग एमालेको गठबन्धन नहुने बताए । उनले भने,‘राप्रपा सत्ता गठबन्धनमा नरहेकाले लेनदेनमा कुरा मिले हाम्रो तालमेल हुनसक्छ । पालिकास्तरमा माओवादीका साथीहरूले पनि तालमेलको प्रस्ताव गरिरहनुभएको छ ।’

झापामा एमालेविरुद्ध गठबन्धनको चर्चा चले पनि गठबन्धनको औपचारिक घोषणा भएको छैन । सत्ता गठबन्धनको प्रमुख घटक नेपाली कांग्रेस पार्टी केन्द्रको निर्णयको पर्खाइमा छ । नेपाली कांग्रेस झापाका सभापति देउमान थेबेले झापामा पार्टी एक्लै चुनावमा लड्न सक्षम रहेको बताउँछन् । ‘एक्लै लड्न सक्षम छौँ । तर, हामी पार्टी केन्द्रको निर्णय पर्खिरहेका छौँ’, उनले भने, ‘अहिले हामी निर्वाचन परिणाम नेपाली कांग्रेसको पक्षमा पार्ने अभियानमा जुटेका छौँ । गठबन्धनको विषयमा अहिले केही भएको छैन ।’

यता एमालेबाट फुटेर बनेको नेकपा (एकीकृत समाजवादी) का अध्यक्ष बेदराज रेग्मी फुटे पनि एमाले बलियो अवस्थामा रहेको स्वीकार गर्छन् । ‘पार्टी फुटे पनि झापामा एमाले नै पहिलो शक्ति हो । एक्ला एक्लै लडेर एमालेलाई पराजित गर्न सक्ने अवस्था छैन’, उनले शिलापत्रसँग भने, ‘त्यसैले गठबन्धन गरेर एमालेलाई परास्त गर्नुपर्छ ।’

२०७४ सालको चुनाव परिणाम अनुसार सत्ता गठबन्धनको सानो दल जनता समाजवादी पार्टीले अहिलेको अवस्थामा आफूहरू एक्लै पनि निर्वाचन लड्न सक्षम रहेको दवी गरेको छ । झापा निवासी जनता समाजवादी पार्टी प्रदेश १ का अध्यक्ष प्रवीण चाम्लिङले आफूहरू गठबन्धन गरेर जानुपर्छ भन्ने पक्षमा रहे पनि सबै पालिकामा आफ्नै उम्मेदवार खडा गर्ने तयारीमा जुटिरहेको बताए । उनले शिलापत्रसँग भने, ‘सबै पालिकाहरूमा हाम्रो आफ्नै उम्मेदवारहरू उठाएर चुनाव लड्नेगरीको तयारी पनि गरिरहेका छौँ ।’

पटक–पटक विभाजित हुँदै आएको राष्ट्रिय प्रजातान्त्र पार्टी पनि झापामा यसपटक आफ्नो प्रभाव अझ विस्तार गर्ने रणनीतिमा लागेको छ । झापा राष्ट्रिय प्रजातान्त्र पार्टीका अध्यक्ष राजेन्द्र लिङ्देनको समेत गृहजिल्ला र निर्वाचन पनि क्षेत्र हो । त्यसैले आगामी चुनावमा लिङ्देन नेतृत्वको राप्रपा झापामा आफ्नो प्रभाव विस्तार गर्न चाहन्छ । अघिल्लो चुनावमा तेस्रो शक्ति बनेको राप्रपा थप शक्ति आर्जन गर्ने दाउमा छ । राप्रपा झापाका अध्यक्ष केशव ओझाले चुनावमा एक्लै लड्ने गरी तयारी गरिरहेको बताए । उनले शिलापत्रसँग भने,‘पद लेनदेनका आधारमा स्थानीय समितिले आवश्यकता ठानेको खण्डमा उहाँहरूले गठबन्धन गर्न सक्नुहुनेछ ।’

उनले पार्टी विभाजन भए पनि झापामा त्यसको प्रभाव शून्य रहेको दाबी गरे ।

२०७४ मा यस्तो थियो निर्वाचन परिणाम

२०७४ सालको निर्वाचनमा झापाको अर्जुनधारा नगरपालिकाको मेयरमा एमालेका हरिकुमार राना मगर १३ हजार ८ सय ७९ मतसहित विजयी भएका थिए । उनका निकटतम प्रतिद्वन्द्वी नेपाली कांग्रेसका हेमप्रसाद खरेल ९ हजार ६ सय ४१ मत प्राप्त गरेका थिए । माओवादी केन्द्रका भूपेन्द्र न्याैपानेले २ हजार ५ सय ६ मत ल्याएका थिए ।

उपप्रमुखमा एमालेकै कमला खतिवडा १२ हजार ८ सय ३१ मतसहित निर्वाचित भएकी थिइन् । उनकी निकटतम प्रतिद्वन्द्वी कांग्रसकी सरस्वती सिटौला तामाङले १० हजार ५ सय ७९ मत प्राप्त गरेकी थिइन् ।

एमालेले सो नगरपालिकाको वडा नम्बर १, २, ४, ५, ६, ९, १० र ११ नम्बर वडा गरी ८ वटा वडा जितेको थियो । नेपाली कांग्रेस ३, ७ र ८ नम्बर वडामा विजयी भएको थियो । सो नगरपालिकामा माओवादी केन्द्रले एउटा पनि वडा जितेको थिएन ।

त्यस्तै, कचनकवल गाउँपालिका अध्यक्षमा राष्ट्रिय प्रजातन्त्र पार्टीका अञ्जरा आलम ५८१६ मतसहित विजयी भएका थिए । उनका निकटतम प्रतिद्वन्द्वी नेपाली कांग्रेसका कालेन्द्रप्रसाद सिंह राजवंशीले ५३५३ मत प्राप्त गरेका थिए । एमालेका शेरबहादुर खत्रीले ३९७३ मत ल्याउँदा माओवादी केन्द्रका हंसनारायण राजवंशीले १२५० मत मात्र प्राप्त गरेका थिए ।

उपाध्यक्षमा राष्ट्रिय प्रजातन्त्र पार्टीकै निमसरी राजवंशी ५७७४ मतसहित विजयी भएकी थिइन् । उनकी निकटतम प्रतिद्वन्द्वी नेपाली कांग्रेसकी गीता ओडारी खरेलले ५०७२ मत ल्याएकी थिइन् । उपाध्यक्षमा एमालेकी दिपतारा थाम्सुहाङले ३२४२ मत प्राप्त गर्दा माओवादी केन्द्रकी ईश्वरीमाया गाइनेले १३६७ मत ल्याएकी थिइन् । राप्रपाले सो गाउँपालिकाको वडा नम्बर १, ३ र ५ नम्बर वडा जित्दा एमालेले २ र ६ नम्बर वडा जितेको थियो ।

नेपाली कांग्रेस ४ र ७ नम्बर वडामा विजयी हुँदा माओवादीले एउटा पनि वडा आफ्नो पक्षमा पार्न सकेको थिएन ।

कन्काई नगरपालिकाको प्रमुखमा एमालेका राजेन्द्रकुमार पोखरेल ८४१६ मतसहित विजयी हुँदा उनका निकटतम प्रतिद्वन्द्वी नेपाली कांग्रेसका एकराज उप्रतीले ६१९७ मत प्राप्त गरेका थिए । स्वतन्त्रबाट उठेका भीमप्रसाद अधिकारीले २१२७ मत ल्याउँदा माओवादी केन्द्रका गोपाल प्रसाद चुडालले ६३६ मत मात्र प्राप्त गरेका थिए । राष्ट्रिय प्रजातन्त्र पार्टीका उम्मेदवार केदारप्रसाद गिरीले ३०७ मतसहित पाँचौँ भएका थिए । उपप्रमुखमा पनि एमालेकै मञ्जु प्रसाईं ८५७६ मतसहित विजयी भएकी थिइन् ।

९ वडा रहेको सो पालिकामा एमालेले मात्रै ६ वटा वडा जितेको थियो । नेपाली कांग्रेस तीन वडामा चित्त बुझाउन बाध्य भएको थियो । कन्काईमा एमालेले वडा नम्बर १, २, ४, ५, ७ र ८ नम्बर वडा जित्दा नेपाली कांग्रेस ३, ६ र ९ नम्बर वडामा विजयी भएको थियो । सो पालिकाको एउटा पनि वडा माओवादी केन्द्रले जितेको थिएन ।

त्यस्तै, कमल गाउँपालिकाको अध्यक्षमा एमोलेकी मेनुका काफ्ले ८२७५ मतसहित विजयी भएकी थिइन् । उनका निकटतम प्रतिद्वन्द्वी नेपाली कांग्रेसका हुकुमसिंह राईले ८२७५ मत प्राप्त गरेका थिए । माओवादी केन्द्रका विकमकुमार संग्रौलाले १९०९ मत मात्र प्राप्त गरेका थिए ।

उपाध्यक्षमा एमालेकै बेनुप्रसाद शिवकोटी झण्डै दोब्बर मत (९४१८) विजयी हुँदा उनक निकटतम प्रतिद्वन्द्वी नेपाली कांग्रेसकी दिपा भण्डारी (गौतम) ले ४९९२ मत प्राप्त गरेकी थिइन् । मओवादी केन्द्रकी गौरी राईले ३१४३ मत ल्याउकी थिइन् ।

सो पालिकाका वडा नम्बर २, ३, ४, ५, ६ र ७ नम्बर वडा एमालेले जितेको थियो । नेपाली कांग्रेसले एउटा वडा जित्दा माओवादी केन्द्र सवै वडामा पराजित भएको थियो ।

गौरादह नगरपालिकाको मेयरमा नेपाली कांग्रेसका रोहितकुमार साह १०३०८ मत (४५४ मतान्तर) ले विजयी भएका थिए । उनका निकटतम प्रतिद्वन्द्वी एमालेका मदनप्रसाद अधिकारीले ९८५४ मत प्राप्त गरेका थिए ।

माओवादी केन्द्रका पुष्पलाल ढकालले ३४२८ मत ल्याएका थिए । उपमेयरमा भने एमालेकी गीता भेट्वाल १०६२० मतसहित विजयी भएकी थिइन् । उनकी निकटतम प्रतिद्वन्द्वी कांग्रसकी सुमित्राकुमारी खरेल ७९११ मत प्राप्त गर्दा माओवादी केन्द्रकी अर्पणा राजवंशीले ३९२० मत ल्याएकी थिइन् ।

प्रमुखमा पराजित भए पनि अधिकांश वडा एमालेले जितेको थियो । एमालेले वडा नम्बर १, ३, ४, ५, ७ र ८ नम्बर वडामा जित्दा नेपाली कांग्रेस २, ६ र ९ नम्बर वडामा विजयी भएको थियो । यस पालिकामा पनि माओवादी केन्द्रले एउटा वडा पनि आफ्नो पक्षमा पार्न सकेको थिएन ।

त्यस्तै, गौरीगञ्ज गाउँपालिकाको अध्यक्षमा राष्ट्रिय प्रजातन्त्र पार्टीका बाबुराजा श्रेष्ठ ३७४० मतसहित विजयी भएका थिए । उनका निकटतम प्रतिद्वन्द्वी नेपाली कांग्रेसकी फुलवती राजवंशीले ३४५३ मत प्राप्त गरेकी थिइन् । माओवादी केन्द्रका विद्यानन्दसिंह राजवंशीले ३३५३ मत ल्याउँदा एमालेका श्यामकुमार ढकाल २७५७ मत प्राप्त गर्दै चौथो बनेका थिए ।

उपप्रमुखमा नेपाली कांग्रेसका दिपिन्द्र थापा ३४१४ मतसहित विजयी भएका थिए । उनकी निकटतम प्रतिद्वन्द्वी एमालेकी मनिकादेवी राईले २८७० प्राप्त गरेकी थिइन् । माओवादी केन्द्रकी कल्पना राईले २५९१ मत ल्याउँदा राष्ट्रिय प्रजातन्त्र पार्टीकै सुशीला ताजपुरियाले भने २२२६ मात्र मत प्राप्त गरेकी थिइन् ।

सो पालिकाको वडा नम्बर १, २, ३, ६ नेपाली कांग्रेसले जित्दा एमालेले ५, र माओवादी केन्द्रले ४ नम्बर वडा जितेका थिए ।

झापा गाउँपालिका अध्यक्षमा नेपाली कांग्रेसका जयनारायण साह ४३९३ मतसहित विजयी हुँदा उनका निकटतम प्रतिद्वन्द्वी नेकपा (एमाले) का गजेन्द्र ताम्लीले ३७८९ मत प्राप्त गरेका थिए । माओवादी केन्द्रका रुद्र बजगाईँले ३४९९ मत ल्याएका थिए ।

उपाध्यक्षमा नेकपा (एमाले) की कुन्तीदेवी बुढाथोकी ३८१६ मतसहित विजयी भएकी थिइन् । उनकी निकटतम प्रतिद्वन्द्वी कांग्रेसकी बसुन्धरा थपलियाले ३५७६ मत प्राप्त गरेकी थिइन् ।

वडा नम्बर २, ४, ६, र ७ नम्बर वडा एमालेले जित्दा नेपाली कांग्रेस १, ३ र एक स्वतन्त्र उम्मेदवार ले ५ नम्बर वडा जितेका थिए ।

यस्तै एमाले अध्यक्ष ओलीको गृहनगरसमेत रहेको दमक नगरपालिकाको प्रमुखमा एमालेका रोमनाथ ओली १०८०६ मत ल्याएर विजयी भएका थिए । उनका निकटतम प्रतिद्वन्द्वी राष्ट्रिय प्रजातान्त्र पार्टीका रामकुमार थापाले ७६५५ मत प्राप्त गरेका थिए । माओवादी केन्द्रका रेवतराज पुरीले ६८९८ मत प्राप्त गर्दा नेपाली कांग्रेसका ढुण्डीराज भण्डारी ५५३९ मतसहित चौथो भएका थिए ।

उपमेयरमा एमालेकै गीताकुमारी पौडेल १२६२५ मतसहित विजयी हुँदा उनकी निकटतम प्रतिद्वन्द्वी नेपाली कांग्रेसकी रेगिना भट्टराईले ८९१२ मत प्राप्त गरेकी थिइन् । राष्ट्रिय प्रजातान्त्र पार्टीकी रिताकुमारी बस्नेत श्रेष्ठले ४४९८ मत प्राप्त गर्दा माओवादी केन्द्रकी शान्तिदेवी धिमालले ४३७४ मत ल्याएकी थिइन् ।

१० वडा रहेको सो नगरपालिकामा एमालेले वडा नम्बर २, ३, ४, ५, ६, ८, ९ र १० नम्बर वडा जितेको थियो । राष्ट्रिय प्रजातान्त्र पार्टीले १ र ७ नम्बर वडा जित्दा नेपाली कांग्रेस र माओवादी केन्द्र ‘क्लिन स्वीप’ भएका थिए ।

त्यसैगरी, बाह्रदशी गाउँपालिका अध्यक्षमा नेपाली कांग्रेसका खड्गप्रसाद राजवंशी ५५३९ मतसहित विजयी हुँदा उनका निकटतम प्रतिद्वन्द्वी एमालेका लक्ष्मण पाठक ले ५१११ मत प्राप्त गरेका थिए । माओवादी केन्द्रका देवीप्रसाद ओझाले १७९५ मत ल्याउँदा राष्ट्रिय प्रजातन्त्र पार्टीका भीमबहादुर राईले १४१४ मत प्राप्त गरेका थिए ।

उपाध्यक्षमा नेपाली कांग्रेसकै रत्नाकुमारी राजवंशी ५४५३ मतसहित विजयी भएकी थिइन् । उनकी निकटतम प्रतिद्वन्द्वी एमालेकी गंगादेखि धमलाले ५२५६ मत प्राप्त गर्दा माओवादीकी सुकमती राजवंशीले १७३१ र राष्ट्रिय प्रजातान्त्र पार्टीकी सौरी टुडुले १२९७ मत प्राप्त गरेकी थिइन् ।

एमालेले सो गाउँपालिकाको वडा नम्ब १, २, ३, ५ र ६ नम्बर वडा जितेको थियो । त्यस्तै नेपाली कांग्रेसले ७ नम्बर वडा जित्दा माओवादी केन्द्र ४ नम्बर वडामा विजयी भएको थियो ।

बुद्धशान्ति गाउँपालिकाको अध्यक्षमा नेपाली कांग्रेसका रमेशकुमार भुजेल ७९९६ मतसहित विजयी हुँदा उनका निकटतम प्रतिद्वन्द्वी एमालेका तिलचन पाठकले ७३५३ मत प्राप्त गरेका थिए । माओवादी केन्द्रका खड्गबहादुर तिम्सिनाले २०६६ ल्याएका थिए ।

उपाध्यक्षमा भने एमालेकी मिरा भुर्तेल ७४५७ मतसहित विजयी भएकी थिइन् । उनकी निकटतम प्रतिद्वन्द्वी कांग्रेसकी चन्द्रकला भट्टराईले ६८०४ मत प्राप्त गर्दा माओवादी केन्द्रकी अस्मित कला लिम्बूले २५०८ मत ल्याएकी थिइन् । २, ४ र ६ नम्बर वडा एमालेले जित्दा नेपाली कांग्रेसले १, ३, ५ र माओवादी केन्द्रले ७ नम्बर वडा जितेको थियो ।

त्यस्तै, भद्रपुर नगरपालिकाको प्रमुखमा एमालेका जीवनकुमार श्रेष्ठ ११०४२ ल्याएर विजयी भएका थिए । उनका निकटतम प्रतिद्वन्द्वी नेपाली कांग्रेसका गणेश पोखरेलले ७२१५ प्राप्त गरेका थिए । माओवादी केन्द्रका शिवकुमार राजभण्डारीले ४१३४ प्राप्त गर्दा राष्ट्रिय प्रजातान्त्र पार्टीका नवराज पनेरूले २८२२ मत ल्याएका थिए ।

उपमेयरमा पनि एमालेकै चन्द्रमाया श्रेष्ठ १०६५० मत ल्याएर विजयी भएकी थिएन् । उनकी निकटतम प्रतिद्वन्द्वी नेपाली कांग्रेसकी तारादेवी भुर्तेलले ६४९८ मत प्राप्त गर्दा माओवादी केन्द्रकी कुमारी स्वर्णीकाले ३९५७ र राष्ट्रिय प्रजातन्त्र पार्टीकी राधा कार्कीले ३२७७ मत ल्याएकी थिइन् ।

एमालेले भद्रपुरका वडा नम्बर १, २, ३, ६, ७, ९ र १० नम्बर वडा जित्दा नेपाली कांग्रेसले ५, ८ र माओवादी केन्द्रले ४ नम्बर वडा जितेको थियो ।

मेचीनगर नगरपालिका मेयरमा नेपाली कांग्रेसका विमल आचार्य २०७७६ मतसहित विजयी हुँदा उनका निकटतम प्रतिद्वन्द्वी एमालेका विष्णुप्रसाद प्रसाईँले १९१९२ मत प्राप्त गरेका थिए । माओवादी केन्द्रका हंसलाल राजवंशीले ७६९४ मत ल्याएका थिए ।

उपमेयरमा भने एमालेकी मीनाकुमारी पोखरेल २००१६ मतसहित विजयी हुँदा उनकी निकटतम प्रतिद्वन्द्वी नेपाली कांग्रेसकी दुर्गा खतिवडाले १९१०६ मत प्राप्त गरेकी थिइन् । उपमेयरमा माओवादी केन्द्रकी इन्दिरा कार्कीले ७६९० मत प्राप्त गरेकी थिइन् ।

मेचीनगरका वडा नम्बर १, २, ३, ८, ११, १३ र १४ नम्बर वडा एमालेले जित्दा नेपाली कांग्रेसले ४, ५, ६, ७, ९, १०, १५ र माओवादी केन्द्रले १२ नम्बर वडा जितेको थिए ।

बिर्तामोड नगरपालिकामा एमालेका ध्रुवकुमार शिवाकोटी ९११२ मतसहित विजयी हुँदा उनका निकटतम प्रतिद्वन्द्वी नेपाली कांग्रेसका जालकुमार गुरुङले ८२१७ मत प्राप्त गरेका थिए । राष्ट्रिय प्रजातन्त्र पार्टीका भक्तिप्रसाद सिटौलाले ६१७० मत ल्याउँदा माओवादी केन्द्रका चन्द्रप्रसाद कडरियाले ३७९७ मात्र मत प्राप्त गरेका थिए ।

उपमेयरमा एमालेकै पवित्रादेवी महतरा १०४३७ मतसहित विजयी भएकी थिइन् । उनकी निकटतम प्रतिद्वन्द्वी नेपाली कांग्रेसकी पार्वता गिरी (भारती) ले ९०११ मत प्राप्त गर्दा राष्ट्रिय प्रजातन्त्र पार्टीकी लिला उप्रेतीले ३८७६ र माओवादी केन्द्रकी लक्ष्मिदेवी न्यौपाने (शर्मा) ले ३४४४ मत प्राप्त गरेकी थिएन् ।

एमालेले वडा नम्बर १, २, ४, ५, ७ र ९ नम्बर वडा जित्दा नेपाली कांग्रेस ३, ६, र १० नम्बर वडामा विजयी भएको थियो । राष्ट्रिय प्रजातन्त्र पार्टी ८ नम्बर वडामा विजयी हुँदा माओवादी केन्द्रले एउटा पनि वडाको परिणामा आफ्नो पक्षमा पार्न सकेको थिएन ।

त्यस्तै, शिवसताक्षी नगरपालिकाको प्रमुखमा एमालेका चन्द्र कुमार शेर्मा १३४३९ मत ल्याएर निर्वाचित हुँदा उनका निकटतम प्रतिद्वन्द्वी नेपाली कांग्रेसका पर्शुराम ढुंगानाले ८९८४ मत प्राप्त गरेका थिए । माओवादी केन्द्रका महेन्द्र भट्टराईले ३२४१ मत ल्याएका थिए ।

उपमेयरमा एमालेकै भोजकुमारी नेपाल १३४७२ मत ल्याएर विजयी हुँदा उनकी निकटतम प्रतिद्वन्द्वी नेपाली कांग्रेसकी जयकुमारी चेम्जोङले ८३६१, माओवादी केन्द्रकी कचाली ताजपुरियाले ३८०९ मत प्राप्त गरेकी थिइन् ।

एमाले वडा नम्बर १, २, ३, ५, ७, ८, ९, १० र ११ नम्बरमा विजयी हुँदा नेपाली कांग्रेसले ४ र ६ नम्बर वडा मात्र जितेर चित्त बुझाउनुपरेको थियो । सो पालिकामा पनि माओवादी केन्द्रले एउटै वडा जितेको थिएन ।

त्यसैगरी, हल्दिबारी गाउँपालिकाको अध्यक्षमा अध्यक्षमा राष्ट्रिय प्रजातन्त्र पार्टीका रवीन्द्रप्रसाद लिङ्देन ३९४३ मतसहित विजयी हुँदा उनक निकटतम प्रतिद्वन्द्वी एमालेकी मञ्जुदेवी सिटौलाले ३५४३ मत ल्याएकी थिइन् । कांग्रेसका दिलीपकुमार लिम्बूले २९१५ प्राप्त गर्दा माओवादी केन्द्रका तुलसीप्रसाद ओलीले २११७ मत मात्र प्राप्त गरे ।

उपाध्यक्षमा एमालेका डम्बरबहादुर गिरी ४३८६ मतसहित विजयी हुँदा उनकी निकटतम प्रतिद्वन्द्वी नेपाली कांग्रेसकी चन्द्रकला चाम्लिङले २७४७, राष्ट्रिय प्रजातन्त्र पार्टीकी भारती दाहालले २७०८ र माओवादी केन्द्रकी शान्तिमाया लिम्बूले २३९९ मत प्राप्त गरेकी थिइन् ।

सो पालिकाको १ र ३ नम्बर वडा एमालेले जित्दा नेपाली कांग्रेस ४, माओवादी केन्द्रले २ र राष्ट्रिय प्रजातन्त्र पार्टी ५ नम्बर वडामा विजयी भएको थियो ।

प्रकाशित मिति: आइतबार, चैत १३, २०७८ १९:४०