गठबन्धन नगर्न कांग्रेसमा अधिकांशको सुझाव, ओली आतंक नबिर्सिनुहाेस् : देउवा

A+ A A-

गाउँ-गाउँ पुगेर फर्किएका अधिकांश कांग्रेस नेताहरूले नेतृत्वलाई गठबन्धन नगर्न सुझाएका छन् । शुक्रबारको केन्द्रीय कार्यसमिति बैठकमा धारणा राखेका २१ मध्ये अधिकांश नेताहरूले गठबन्धन नगर्न सुझाव दिएका हुन् । नेकपा र एमाले विभाजित रहेकाे अवस्थामा कांग्रेसलाई फाइदा हुने भन्दै केन्द्रबाट गठबन्धन लादेर कार्यकर्ता पंक्तिलाई निराश नबनाउन अधिकांशले सुझाएका छन् ।

बैठकमा धारणा राखेका नेता दिनेश कोइरालाले आफूले गठबन्धन नगर्न सुझाएको बताए । उनले नेकपा र एमाले विभाजित रहेको अवस्थामा कांग्रेसलाई फाइदा हुने भएकाले एक्लै लड्ने उपयुक्त बेला यही रहेको मत राखेका थिए । चितवनमा पनि कांग्रेस एक्लै लड्नुपर्ने उनको मत थियो । ‘पहिला हामीसँग गठबन्धन गरेर चितवनमा जितेपछि एमालेसँग मिलेको दृष्टान्त विर्सनुहुँदैन । चितवनमा हामी एक्लै लड्न सक्षम छौँ,’ उनले भनेका थिए ।

उनले यस्तो धारणा बैठकमा राखेपछि सभापति शेरबहादुर देउवा कड्किएका थिए, ‘चितवनमा सधैँ हार्ने अनि ठूला कुरा गर्ने ? गठबन्धन नगर्दा कहाँ जितिन्छ ।’

बैठकमा केन्द्रीय सदस्य नैनसिंह महरले घर-घर जाऔँ कांग्रेस जिताऔँ अभियानमा जाँदा कांग्रेसप्रति जनताको उत्साह देखिएकाले गठबन्धनको विषयमा बुद्धिमतापूर्वक निर्णय लिनुपर्ने मत राखेका थिए । ‘गठबन्धन गर्दा भुईंको टिप्न खोज्दा कांग्रेसीजन नझरून् कांग्रेसप्रति उत्साह नै छ । तल्लो कमिटीको सुझावअनुसार नै अघि बढ्नुपर्छ,’ उनको मत थियो ।

बैठकमा केन्द्रीय सदस्य अजयबाबु शिवाकोटीले पनि गठबन्धन गर्न नहुने मत राखेका छन् । ‘अधिकांश स्थानमा कांग्रेसले एक्लै जित्ने स्थिति छ । हामी एक्लै जान सक्छौँ स्थानीय कमिटीको मत विपरीत केन्द्रबाट निर्णय लिनु हुँदैन,’ उनले भनेका छन् ।

बैठकमा कांग्रेस नेताहरूले सधैँ गठबन्धन गरिराख्ने हो भने भारतीय कांग्रेसको जस्तै हालत हुने सुझाव पनि नेतृत्वलाई नेताहरूले दिएका छन् । बैठकमा धारणा राख्दै लुम्बिनी प्रदेशका सभापति अमरसिंह पुन र कर्णाली प्रदेशका सभापति ललितजंग शाहीले गठबन्धन गर्दै जाने हो जनताले कांग्रेसलाई भोट नै हाल्न बिर्सिने बताएका थिए । ‘गठबन्धन गर्दै जाने हो भने भारतमा कांग्रेस आईलाई खोज्नुपरेको जस्तै हालत हुनसक्छ । जनताले कांग्रेसलाई भोट नै हाल्न विर्सिन्छन्,’ उनको भनाइ थियो ।

बैठकमा शान्ति परियार विकले भने गठबन्धन गर्नुपर्ने मत राखेकी थिइन् ।‘अर्घखाँचीमा एमालेसँग प्रमुख प्रतिस्पर्धा रहेकाले गठबन्धन गर्नुपर्ने स्थिति रहेको रिपोर्टिङ गरेँ,’ उनले भनिन् ।

देउवाको निर्देशन : गठबन्धनका दललाई नचिढ्याउनू, ओलीआतंक नबिर्सिनू

बैठकमा सभापति देउवाले सत्ता गठबन्धनका दललाई नचिढ्याउन कार्यकर्ताहरूलाई निर्देशन दिएका छन् । ‘अहिले हामीसँगै सरकारमा छौँ । सरकारमा सहकार्य गरिरहेका दलहरूलमाई चिढ्याउने काम नगरौँ । आवश्यक पर्ने ठाउँमा हामीले मिलेरै अघि बढ्नुपर्छ,’ देउवाको भनाइ उद्दृत गर्दै परियारले भनिन् ।

यस्तै, उनले एमाले अध्यक्ष केपी शर्मा ओलीको आतंक नबिर्सिन पनि कार्यकर्ताहरूलाई भनेका छन् । ‘तपाईंहरू गठबन्धन नगर्ने मात्रै भन्नुहुन्छ । ओली आतंक नबिर्सिनुस् । ओली आतंकविरुद्ध लडेरै हामी आएका हौँ । उनको आतंकविरुद्ध अझै सहकार्य आवश्यक छ,’ देउवाको भनाइ उद्धृत गर्दै नेता शिवाकोटीले भने ।

बैठकमा नेताहरू नैनसिंह महरले कञ्चनपुर, प्रदीप पौडेलले स्याङजा, गोविन्द शाहले बैतडी, रामहरि खतिवडाले धनकुटा, जानकी सिंहले दैलेख, सीता रानाले अछाम, कर्ण बुढाले मुगु, सरस्वती अर्यालले पाल्पा, दिवाकर पाख्रिनले बाग्लुङको वस्तुस्थिति जानकारी गराएका थिए ।

यस्तै, गरिमा पौडेलले रसुवा, दिनेश कोइरालाले गुल्मी, अजयबाबु शिवाकोटीले मुस्ताङ, मुक्त कुमारी यादवले सिन्धुली, शान्ति परियारले अर्घाखाँचीको रिपोर्टिङ गरेका थिए । यस्तै, हरीशरण नेपालीले दोलखा, कृष्णकिशोर घिमिरेले जुम्ला, टेकप्रसाद गुरुङले नवलपुर र मोहनबहादुर बस्नेतले काठमाडौँको वस्तुस्थिति जानकारी गराएका थिए ।

प्रकाशित मिति: शुक्रबार, चैत ११, २०७८ १९:२०