खुला चौरमा बसेर पढ्न बाध्य छन् जुम्लाका विद्यार्थी

प्रतीकात्मक तस्वीर ।

A+ A A-

जुम्लाको कनकासुन्दरी गाउँपालिका–३ गौरीगाउँस्थित नवदुर्गा आधारभूत विद्यालयका विद्यार्थी खुला चौरमा पढ्न बाध्य छन् ।

विद्यालयमा कक्षा कोठा नहुँदा विद्यार्थीहरू खुला चौरमै बसेर पढ्न बाध्य भएका हुन् । उनीहरू वर्षायामको चर्को घाममा चौरमै पढ्छन् । हिउँदे याममा कठयांग्रिदो जाडोमा समेत चौरमै बसेर पढिरहेका छन् ।

विद्यालयमा दुई कोठे तीनवटा भवन छन् । भएका भवनसमेत निकै जीर्ण र बस्न लायक छैनन् । विद्यार्थीहरूलाई बस्नका लागि कक्षाकोठा नहुँदा शैक्षिक सामग्रीको प्रयोग गरेर शिक्षण गर्न कठिनाइ भएको विद्यालयका प्राधानाध्यापक हरिबहादुर बुढाले बताए । विद्यार्थीको गुणस्तर र सिकाई उपलब्धिमा प्रत्यक्ष असर परेको उनी बताउँछन् ।

विद्यालयमा काम लाग्ने भवन एउटा मात्र छ । सो भवनका दुइ कोठा छन् । एउटा कोठामा विद्यालयको कार्यालय छ । अर्कोमा बालविकास केन्द्रका विद्यार्थी पढिरहेका छन् ।

विद्यालयमा तीनदेखि १२ वर्षसम्मका विद्यार्थी आउने गरेका छन् । कक्षा ५ मा अध्ययनरत निराजन बुढाले भने, 'बिहान १० बजेदेखि अपराह्न ४ बजेसम्म खुला चौरमा बस्छौँ ।' खुला चौरमा पढ्न निकै सास्ती भएको बुढा बताउँछन् । उनका अनुसार विद्यालयमा विद्यार्थीका लागि भएको एउटा कोठामा साना बालविकास केन्द्रका बालबालिका बस्ने भएकाले अरू कक्षाका विद्यार्थीहरू चौरमा पढ्न बाध्य छन् ।

बिहान १० बजेदेखि अपराह्न ४ बजेसम्म खुला चौरमै पढाइ हुने गरेको ५ कक्षामा अध्ययनरत अर्का विद्यार्थी रमिला बुढाले बताइन् ।

तत्कालको लागि एउटा कक्षाकोठा मर्मत गर्न सकिने बजेट प्रदान गरिएको कनकासुन्दरी गाउँपालिकाका शिक्षा शाखा प्रमुख नारायण न्यौपानेले बताए । विद्यालयको समस्या समाधानका लागि शिक्षा शाखा र गाउँपालिका लागि परेको उनको भनाइ छ ।

त्यहाँका ४० घरपरिवारका विद्यार्थी उक्त विद्यालयमा अध्ययन गर्छन् । विद्यालय व्यवस्थापन समितिका अध्यक्ष हर्क बुढा विद्यालयको अवस्था हेरेर कतिपय अभिभावकले छोराछोरीलाई निजी विद्यालयमा पढ्न पठाउने गरेको बताए । अधिकांश अभिभावकको चासो निजी विद्यालय तिर गएकोले सरकारी विद्यालय उपेक्षामा परेको उनको भनाइ छ ।

प्रकाशित मिति: शुक्रबार, चैत ११, २०७८ १८:५०