मलाई माओवादीको मात्र होइन, राष्ट्रकै अध्यक्ष हुँ किजस्तो लाग्न थालेको छ : प्रचण्ड

मलाई माओवादीको मात्र होइन, राष्ट्रकै अध्यक्ष हुँ किजस्तो लाग्न थालेको छ : प्रचण्ड

A+ A A-

नेकपा माओवादी केन्द्रका अध्यक्ष पुष्पकमल दाहाल 'प्रचण्ड' ले भरतपुर महानगरको विकासप्रति जिब्रो नचपाउन आफू इतरका दलहरूलाई आग्रह गरेका छन् ।

भरतपुर महानगरमा बन्न लागेको नयाँ प्रशासनिक भवनको शिलान्यास गर्दै प्रचण्डले अरु महानगरको तुलानामा भरतपुर महानगर विकासमा १ नम्बर रहेको दाबी गरे । ४१ किलोमिटर रिङरोड निर्माण सम्पन्न भइसकेको उनको भनाइ छ ।

शिक्षा स्वास्थ्यलगायतका क्षेत्रमा भरतपुरको विकास देखेर स्वदेशी मात्रै होइन विदेश पनि अचम्म पर्ने गरेको उनको भनाइ छ । 'विदेशीहरू आउँदा भरतपुरको विकास देखेर विदेशकै जस्तो विकास भएको महसुस गर्ने गरेका छन् । यो चर्चा विदेशमा पनि सुन्ने गरिन्छ,' अध्यक्ष प्रचण्डले भने, 'हामीले राम्रोलाई राम्रो भन्न सक्नुपर्छ, विकास भयो भन्न नसक्दा कतै विकासको अवरोध गर्न त खोजिएको छैन ?'

मुलुकमा समस्या पर्दा आफू त्यसका लागि भारी बोकेर अगाडि बढ्नुपर्ने अवस्था आउने गरेको प्रचण्डले दाबी गरे । 'देशमा अप्ठ्यारो पर्दा जसरी पनि राष्ट्र बचाउनुपर्छ भनेर म त्यो दुःखको भारी बोकेर हिँडिरहेको जस्तो लाग्छ,' प्रचण्डले भने ।

उनले गिरिजाप्रसाद कोइरालालाई स्मरण गर्दै कोइरालापछि अहिले आफू एक्लो भएको जस्तो महसुस हुन थालेको टिप्पणी गरे । 'सात राजनीतिक दलको तर्फबाट अभिभावकको भूमिकामा गिरिजाप्रसाद कोइराला र विद्रोही नेताको रूपमा मैले हस्ताक्षर गरेपछि नेपालमा युगान्तकारी परिवर्तन आएको हो,' उनले भने ।

प्रचण्डले राष्ट्र आफ्नै वरिपरि घुमिरहेको पनि दाबी गरे । 'मलाई नेकपा माओवादीको अध्यक्ष मात्र होइन राष्ट्रकै अध्यक्ष हुँ कि जस्तो लाग्न थालेको छ,' उनले भने । अहिले देश पुन: अप्ठ्यारो परिस्थितिमा रहेको बताउँदै पुन: नेकपा माओवादी अग्रपंक्तिमा आउनुपर्ने बाध्यता सिर्जना भएको उनको भनाइ छ ।

प्रकाशित मिति: शुक्रबार, चैत ११, २०७८ १५:१७