रूपन्देहीमा ३२ दल दर्ता, चुनावी प्रतिस्पर्धामा ३८ दल

A+ A A-

स्थानीय तहको चुनावका लागि रूपन्देहीमा ३२ वटा दल दर्ता भएका छन् । जिल्ला निर्वाचन कार्यालय रूपन्देहीका अनुसार राष्ट्रिय दलको मान्यता नपाएका ३२ दल दर्ता भएका हुन् ।

निर्वाचन आयोगले केन्द्रीय निर्वाचन आयोगमा दर्ता भएका तर राष्ट्रिय दलको मान्यता नपाएका ७३ राजनीतिक दलहरूलाई स्थानीय तहको चुनावका लागि आफ्नो कुन-कुन जिल्लामा जिल्लास्तरको संगठनात्मक संरचनाको विवरण बुझाउन आइतबारसम्मको समयसीमा दिएको थियो । सो समयभित्र रूपन्देहीमा स्थानीय तहको चुनावमा भाग लिन ३२ दलले दल दर्ता गराएका हुन् ।

जिल्ला निर्वाचन कार्यालय रूपन्देहीले दिएको जानकारी अनुसार राष्ट्रिय दलको मान्यता नपाएको जनमत पार्टी, मंगोल नेशनल अर्गनाइजेशन, नेपाल मजदुर किसान पार्टी, राष्ट्रिय नागरिक पार्टी, जनता प्रगतिशील पार्टी, नेपाल लोकतान्त्रिक पार्टी, मौलिक जरोकिलो पार्टी, नेपाल सद्‌भावना पार्टी, राष्ट्रिय जनमुक्ति पार्टी, राष्ट्रिय प्रजातन्त्र पार्टी नेपाल, राष्ट्रिय जनमोर्चा, नेपाल परिवार दल, नेपाल विवेकशील पार्टी, सचेत पार्टीले दल दर्ता गराएका छन् ।

यस्तै समाजवादी केन्द्र नेपाल, नेपाल कम्युनिस्ट पार्टी (मार्स्कवादी लेनिनवादी), नेपाल जनता पार्टी, नेपाल कम्युनिस्ट पार्टी (समाजवादी), उन्नत लोकतन्त्र पार्टी, नेपाल दलित पार्टी, बहुजन पार्टी, नेपाल कम्युनिस्ट पार्टी मार्क्सवादी (पुष्पलाल), नेपाल सुशासन पार्टी, नेपाल कम्युनिस्ट पार्टी माओवादी समाजवादी, राष्ट्रिय प्रजातन्त्र पार्टी, संघीय लोकतान्त्रिक राष्ट्रिय मञ्च (थारुहट), विवेकशील साझा पार्टी, नेपालका लागि नेपाली पार्टी, नेपाली कांग्रेस (बी.पी.), सामाजवादी एकता पार्टी, जनसमाजवादी पार्टी र राष्ट्रिय मुक्ति आन्दोलन गरी ३२ वटा दल दर्ता भएको जिल्ला निर्वाचन कार्यालय रूपन्देहीले जनाएको छ । योसँगै रूपन्देहीमा ३८ दलले दलगत रूपमा चुनावी प्रतिस्पर्धा गर्न पाउने छन् ।

जिल्लामा एमाले, कांग्रेस, माओवादी केन्द्र, एकीकृत समाजवादी, जनता समाजवादी र लोकतान्त्रिक समाजवादी राष्ट्रिय दलको मान्यताप्राप्त दलका रूपमा सक्रिय छन् ।

मतदान स्थल २०८, ७०४ मतदान केन्द्र निर्धारण

आगामी ३० वैशाखमा हुने हुने स्थानीय तहको चुनावका लागि रूपन्देहीमा २०८ वटा मतदान स्थल र ७०४ वटा मतदान केन्द्र निर्धारण भइसकेको जिल्ला निर्वाचन कार्यालय रूपन्देहीका प्रमुख अयोधाप्रसाद भण्डारीले बताए ।

‘यसअघिको प्रदेश एवं प्रतिनिधिसभा निर्वाचनमा जिल्लामा २०८ मतदान स्थलमा ६१० वटा मतदान केन्द्र रहेको थिए । अहिले मतदाताको संख्या बढेकाले मतदान केन्द्र थप्नु परेको हो,’निर्वाचन कार्यालयका प्रमुख भण्डारीले शिलापत्रसँग भने ।

प्रत्येक पालिकामा सबै निर्वाचन अधिकृत बस्न कनेक्टिभिटीलगायतका काम सकिएको भण्डारीले बताए । ‘दलहरूलाई निर्वाचन चिह्न दिन जिल्लामा दल दर्ता गर्ने काम सकियो । मतदाता नामावलीको नाम आयोगमा पठाइसक्यौं । निर्वाचन अधिकृतहरूको कार्यालय प्रत्येक पालिकामा बस्न उनीहरूलाई चाहिने कनेक्टिभिटीलगायतका काम सकियो,' भण्डारीले शिलापत्रसँग भने, 'निर्वाचन अधिकृतको नियुक्तिलगायतका काम बाँकी रहेको र ती काम केन्द्रीय निर्वाचन आयोगले नै गर्छ ।’

६ लाख बढी मतदाता

रूपन्देहीमा ६ लाख ३४ हजार ७ सय ९७ जना मतदाता रहेको निर्वाचन कार्यालयले जनाएको छ । जिल्लाका स्थानीय तहको टोली खटाएर, जिल्ला निर्वाचन कार्यालय, इलाका प्रशासन कार्यालयमार्फत संकलन गरिएको ९८ हजार बढी मतदाता गरी जिल्लामा हाल मतदाताको संख्या ६ लाख ३४ हजार पुगेको निर्वाचन कार्यालयको भनाइ छ । मतदाता नामावलीको दाबी विरोधमा केही संख्या घट्न सक्ने निर्वाचन कार्यालयले जनाएको छ ।

प्रकाशित मिति: शुक्रबार, चैत ११, २०७८ १३:०६