११ जिल्लाकै खेलकुद पदाधिकारी हटाउँदै गण्डकी सरकार

A+ A A-

गण्डकी प्रदेश सरकारले ११ वटै जिल्लाका खेलकुद विकास समिति पदाधिकारी हटाउने भएको छ । अध्यक्ष, उपाध्यक्ष, सचिव, कोषाध्यक्ष, सदस्यसहित प्रदेश सरकारमातहतका सबै पदाधिकारीलाई हटाउन उनीहरूलाई स्पष्टीकरण सोधिएको छ ।

युवा तथा खेलकुदमन्त्री राजीव गुरुङ (दीपक मनाङे) ले जिम्मेवारी पूरा नगरेको भन्दै उनीहरूलाई ४ चैतमा स्पष्टीकरण सोधेकाे खुलेकाे छ । खेलकुदमन्त्री बनेदेखि नै गुरुङले जिल्लाका खेलकुद पदाधिकारीलाई हटाउने बताउँदै आएका थिए । अहिले प्रक्रिया अघि बढाएका हुन् ।

स्पष्टीकरण सोधिएको विषय मन्त्रालयका कतिपय अधिकारीलाई नै थाहा छैन । मन्त्री गुरुङको सचिवालयबाटै स्पष्टीकरण सोधिएको मन्त्रालयका एक कर्मचारीले बताए । ‘स्पष्टीकरण सोधिएको कुरा यथार्थ हो । मन्त्रीज्यूको सचिवालयबाटै सोधिएको हो । अध्यक्ष, सदस्य सबैलाई अलग–अलग पत्र पठाएर स्पष्टीकरण सोधिएको छ,’ मन्त्रालय स्रोतले शिलापत्रसँग भन्यो ।

मन्त्री गुरुङले सोधेको स्पष्टीकरणमा १५ दिनभित्र जवाफ पेस गर्न भनिएको छ । ‘प्रदेश खेलकुद विकास ऐन, २०७७ को दफा ३० (१) बमोजिम जिल्ला खेलकुद विकास समिति गठन हुँदा तपाईं उक्त समितिको अध्यक्ष पदमा मनोनीत गरिएकोमा गण्डकी प्रदेश खेलकुद विकास नियमावली २०७८, को नियम १२ बमोजिम काम, कर्तव्य र जिम्मेवारी पूरा गरेको देखिएन । प्रचलित नियमानुसार प्राप्त जिम्मेवारी के कति कारणले पूरा गर्न नसक्नुभएको हो ? सोसम्बन्धमा मनासिब कारण पेस गर्न यो स्पष्टीकरण सोधिएको छ । पत्रको मितिले १५ दिनभित्र चित्तबुझ्दो स्पष्टीकरण पेस गर्नुहोला । स्पष्टीकरण चित्तबुझ्दो नभएमा प्रचलित कानुनबमोजिम हुने व्यहोरासमेत जानकारी गराइन्छ,’ जिल्ला खेलकुद विकास समिति अध्यक्षलाई सोधिएको स्पष्टीकरणमा भनिएको छ ।

गण्डकी प्रदेशमा एमाले नेता पृथ्वीसुब्बा गुरुङ नेतृत्वको सरकार हुँदा जिल्ला खेलकुद विकास समिति गठन गरेर पार्टीसम्बद्ध नेता–कार्यकर्तालाई गत वैशाख पहिलो साता नियुक्त गरिएको थियो । गत २९ जेठमा कांग्रेसको नेतृत्वमा प्रदेश सरकार बनेको छ । सरकार गठनको १० महिनापछि स्थानीय तहको चुनाव आइरहँदा पदाधिकारीलाई हटाउने मनसायसहित स्पष्टीकरण सोधिएको हो ।

एमालेबाटै नियुक्त प्रदेश खेलकुद परिषद्का पदाधिकारीलाई भने स्पष्टीकरण सोधिएको छैन । एक जिल्ला खेलकुद विकास समिति अध्यक्षले कार्यालयमा पत्र आएको जानकारी भए पनि त्यसलाई नखोलेको बताए । अरू जिल्लाका अध्यक्षले भनेपछि स्पष्टीकरण सोधिएको थाहा भएको र के गर्ने भनेर निधो गरिनसकेको ती अध्यक्षले बताए ।

आफूहरूलाई हटाउने विषय चुनावसँग जोडिएको जिकिर जिल्ला अध्यक्षको छ । ‘चुनाव आइराखेको छ । उहाँहरूलाई खेलकुदमा आफ्नो कार्यकर्तालाई पुर्‍याउँदा केही न केही फाइदा हुन्छ भन्ने भयो होला,’ एक अध्यक्षले भने । २० चैतपछि एमालेनिकट सबै पदाधिकारीलाई हटाएर गठबन्धन निकटका कार्यकर्ता नियुक्त गर्ने तयारी छ । गण्डकी प्रदेशमा कांग्रेसको नेतृत्वमा माओवादी, जसपा र एक स्वतन्त्र सांसद संलग्न सरकार छ ।

प्रकाशित मिति: बिहीबार, चैत १०, २०७८ २०:०६