चुनावी लाइनविरुद्ध बोल्ने केन्द्रीय सदस्यलाई विप्लवले भोलि जवाफ दिने

A+ A A-

नेत्रविक्रम चन्द विप्लव नेतृत्वको नेपाल कम्युनिष्ट पार्टी (नेकपा) को जारी केन्द्रीय कमिटी बैठक लम्बिएको छ । महासचिव विप्लवको राजनीतिक प्रस्तावको विपक्षमा मत राख्ने केन्द्रीय सदस्यको संख्या बढेपछि बैठक लम्बिएको हो ।

महासचिव विप्लवले केन्द्रीय सदस्यले उठाएका प्रश्नको जवाफ शुक्रबारकाे बैठकमा दिने भएका छन् । नेकपाको ६९ सदस्यीय केन्द्रीय कमिटी, कलाकार र सल्लाहकार सदस्यसमेत गरेर करिब ७४ जना बैठकमा सहभागी छन् । बैठकमा सहभागी सदस्यलाई आधा घण्टाको दरले प्रतिवेदनमाथि धारणा राख्ने समय दिइएको छ ।

कपिलवस्तुस्थित शिवगढीमा जारी बैठकस्थलबाट एक केन्द्रीय सदस्यले दिएको जानकारी अनुसार बिहीबारसम्म ६५ जना केन्द्रीय सदस्यले धारणा राखेका छन् र तीमध्ये बहुमत सदस्यले महासचिवको लाइन विपरीत धारणा राखेका छन् ।

महासचिव विप्लवले स्थानीय तहमा सहभागी हुनुपर्ने राजनीतिक लाइन बैठकमा प्रस्ताव गरेका थिए । ती केन्द्रीय सदस्यले भने, ‘अधिकांश केन्द्रीय सदस्यले चुनावमा सहभागी हुने राजनीतिक लाइनमाथि आंशका गरेर प्रश्न उठाएका छन् । आंशका गर्ने सबैजना चुनाव वहिस्कार गर्नुपर्ने पक्षमा भने देखिएका छैनन् ।’

स्रोतका अनुसार मध्यमार्गी धारमा बसेर चुनावी रणनीतिमाथि आंशका गरेका नेताहरूलाई भने महासचिव विप्लवले फकाउने प्रयास पनि थालेका छन् । संभावित अल्पमतबाट जोगिने दिउँसो खानापछिको समयमा नेताहरूलाई व्यक्तिगत रुपमा कन्भिन्सकाे प्रयास गरेका छन् ।

ती केन्द्रीय सदस्यले महासचिव विप्लव अल्पमत पर्नेगरी राजनीतिक लाइन पास नहुने भएकोले मध्यमार्गी धारमा उभिएका नेताहरूकाे सहयाेगमा विप्लवको जवाफपछि चुनावी लाइन पास हुने देखिएको छ ।

त्यसो त, विप्लवको राजनीतिक लाइनमा प्रश्न उठाउने अधिकांक नेताहरू जनधार कमजोर भएका नेताहरू रहेको पनि ती केन्द्रीय सदस्यले जानकारी दिए ।

केन्द्रीय सचिवालय सदस्यहरू धर्मेन्द्र बाँस्तोला र हेमन्तप्रकाश ओलीले विप्लवको चुनावी लाइनविरुद्धमा मत राखेका छन् । उनीहरू शीर्ष तहका नेताहरूमध्ये भूगोलमा जनमत कम भएका नेतामा पर्छन् ।

बलियो जनमत भएका सन्तोष बुढामगर र खड्गबहादुर विश्वकर्माले विप्लवको राजनीतिक लाइनलाई समर्थन गरेका छन् । त्यसैले, विप्लवको राजनीतिक लाइन पारित भएर आउने अर्का एक केन्द्रीय सदस्यले दाबी गरे ।

शिलापत्रसँग कुराकानी गर्दै ती केन्द्रीय सदस्यले विप्लवको राजनीतिक लाइनप्रति असहमति राखेका नेता हेमन्तप्रकाश ओली पार्टी छोडेर मोहन बैद्य किरणसँग जोडिने संभावना भने रहेको बताए । ती केन्द्रीय सदस्यले बाँस्तोलाले भने विप्लवलाई नछोड्ने दाबी गरे ।

प्रकाशित मिति: बिहीबार, चैत १०, २०७८ १८:०८