निर्वाचनको अघिल्लो दिन प्राध्यापक संघमा तालाबन्दी

A+ A A-

नेपाल प्राध्यापक संघको निर्वाचनको वैधानिकतामाथि प्रश्न उठाउँदै विभिन्न दलनिकट प्राध्यापकका संगठनले प्राध्यापक संघको कार्यालयमा तालाबन्दी गरेका छन् ।

संघको निर्वाचन भोलि हुँदै छ । चुनावकै अघिल्लो दिन संघको केन्द्रीय कार्यालय सरस्वती सदनमा तालाबन्दी भएको छ । अध्यक्ष रामेश्वर उपाध्याय पक्षले आर्थिक हिनामिनादेखि प्रतिनिधि समेत एकलौटी गरेको भन्दै प्राध्यापक संगठनले तालाबन्दी गरेपछि बिहीबारदेखि हुने भनिएको प्राध्यापक संघको अधिवेशन फेरि पनि अनिश्चित बनेको हो ।

विभिन्न मुद्दा उठाउँदै सत्तारुढ नेकपा निकट नेपाल प्रगतिशील प्राध्यापक संठन तथा राष्ट्रिय प्राध्यापक संगठन, राष्ट्रिय लोकतान्त्रिक प्राध्यापक संघ, वैद्य निकट प्राध्यापकहरुसहित सबै प्राध्यापक संगठनले संयुक्त वक्तव्य निकालेर सरस्वती सदनमा तालाबन्दी गरेको जनाएका हुन् ।

सबै संगठनका केन्द्रीय अध्यक्ष र प्रतिनिधिले हस्ताक्षर गरेको विज्ञप्तिले अधिवेशन प्रतिनिधि छनाेटमा एकलौटी र मनलागी गरेको आरोपसहित विभिन्न माग राखेका छन् । प्राध्यापक संगठनले आर्थिक हिनामिना भएको भन्दै आपत्ति जनाउँदै आएका छन् । नेपाल प्रगतिशील प्राध्यापक संगठनका केन्द्रीय उपाध्यक्ष प्राडा. कृष्णप्रसाद न्यौपानेले अध्यक्षले नै अधिवेशन गराउन नचाहेको दाबी गरे ।

‘प्रतिनिधि छनोटदेखि आर्थिक गतिविधिसम्म पारदर्शी नभएपछि बाध्य भएर हामीले तालाबन्दी गर्नुपरेको हो,’ उनले भने । उनका अनुसार प्रतिनिधि छनोटमा अध्यक्ष उपाध्यायले व्यवस्था नै नभएका विश्वविद्यालयबाट आफू निकटलाई प्रतिनिधिमा चयन गरेका छन् ।

मध्यपश्चिमाञ्चल विश्वविद्यालयमा प्राध्यापकको अधिवेशन गर्न नदिएको पनि तालाबन्दीमा सहभागी प्राध्यापक संगठनको आरोप छ । तालाबन्दी पछि युस्टान महासचिव सुदर्शन ढुंगानाले अब प्राध्यापक संघ भित्रको बेथितिको भण्डाफोर गरिने बताए ।

प्रकाशित मिति: बिहीबार, असार १९, २०७६ ०५:२५