आवेदन दिन तीन दिन बाँकी छँदै म्यादी प्रहरीमा मागभन्दा दोब्बर आवेदन, गाडीको कुरा अझै टुंगिएन

आवेदन दिन तीन दिन बाँकी छँदै म्यादी प्रहरीमा मागभन्दा दोब्बर आवेदन, गाडीको कुरा अझै टुंगिएन

A+ A A-

३० वैशाखमा हुने स्थानीय तह चुनावको सुरक्षाको लागि म्यादी प्रहरीको माग गरिएकामा हालसम्म एक लाख ९४ हजार जनाको आवेदन परेको छ ।

प्रहरी प्रधान कार्यालयले १ चैतदेखि म्यादी प्रहरीको आवेदन लिन थालेको थियो । १३ चैतसम्म आवेदन दिन पाइने समय सीमा तोकिएको छ ।

प्रहरी प्रधान कार्यालयले जारी गरेको विज्ञप्तीअनुसार स्थानीय तहको निर्वाचनको सुरक्षाको लागि एक लाख म्यादी प्रहरी माग गरेको थियो । आवेदन दिने समय तीन दिन बाँकी छँदै एक लाख ९४ हजारको आवेदन परेको प्रहरी प्रवक्ता एसएसपी विष्णु केसीले जानकारी दिए ।

‘९ चैतसम्म देशभरबाट एक लाख ९४ हजार जनाको आवेदन परेको छ । आजकाे तथ्यांक आउँदा दुई लाख क्रस हुन्छ । १३ चैतसम्म कुल पाँच लाखको आवेदन पर्ने हाम्रो अनुमान छ,’ एसएपी केसीले भने ।

उमेरको हद बढी राखेको कारण पनि म्यादी प्रहरीमा आवेदन दिनेको सख्या बढेको उनको भनाइ छ ।

१८ वर्ष पूरा भएका र ५४ वर्ष ननाघेका नेपाली नागरिकले म्यादी प्रहरीमा भर्ना हुन पाउनेछन् । उनीहरूले चुनाव अवधिको ४० दिने सेवासुविधा पाउनेछन् ।

म्यादी प्रहरीले ४० दिनको तलब ३० हजार २ सय ४०, खाद्यान्नबापत एकमुष्ठ ७ हजार २००, पोशाकका लागि ६ हजार र निर्वाचनस्थल आवतजावतका लागि थप एक हजार गरी जम्मा ४४ हजार ४०० रुपैयाँ पाउनेछन् ।

प्रहरीले सबै जिल्ला प्रहरी कार्यालयबाट म्यादी प्रहरी भर्ना दिन सकिने जनाएको छ । छनोट भएका व्यक्तिलाई ७ दिन तालिम दिएर चुनावमा खटाइने छ ।

सवारी सधानको अझै लागेन टुङ्गो लागेन

एक लाख म्यादी प्रहरी भर्ना गर्न प्रहरीलाई बजेट दिएको अर्थ मन्त्रालयले प्रहरीलाई आवश्यक पर्ने सवारीसाधनका बारेमा भने अझै निर्णय दिएको छैन ।

प्रहरी प्रधान कार्यालयले चुनावका लागि देशभर करिब १५ सय गाडी आवश्यक हुने भन्दै प्रतिवेदन गृह मन्त्रालयलाई बुझाएको थियो ।

त्यसमध्ये प्रत्येक स्थानीय तहका लागि एउटा नयाँ गाडी खरिद गर्ने माग प्रहरी प्रधान कार्यालयको छ ।

चुनावका लागि खरिद गर्न लागिएका नयाँ गाडी किन्न सार्वजनिक खरिद प्रक्रियाबाट झन्झटिलो र समय लाग्ने भएकाले सरकारको पहलमा (जीटुजी) मार्फत सवारीसाधन खरिद हुने प्रहरी प्रधान कार्यालयले जनाएको छ ।

तर, सवारीसाधन भने नयाँ खरिद गर्ने वा भाडामा लिने भन्ने अझै निर्णय भएको छैन ।

प्रकाशित मिति: बिहीबार, चैत १०, २०७८ १५:४९