मच्छिन्द्रलाई लिग उपाधि दिलाए, नयाँ-नयाँ कीर्तिमान बनाए

A+ A A-

ए डिभिजनका 'सुपरस्टार' विशाल श्रेष्ठले याे वर्ष आफूलाई उत्कृष्ट गाेलरक्षक मात्र साबित गरेनन्, नयाँ कीर्तिमान पनि कायम गरे । अब्बल प्रदर्शन र उपलब्धिका कारण उनी मिडियामा छाइरहे ।

शही स्मारक लिग ‘ए’ डिभिजन लिग फुटबल ०७८ काे उपाधि उनले उम्किन दिएनन् । उनी आबद्ध मच्छिन्द्र क्लबले लिग उपाधि दुई खेलअगावै पक्का गरेकाे थियाे । विशालकाे कीर्तिमानी प्रदर्शनपछि नै क्लबका लागि उपाधि उचाल्ने अवसर जुरेकाे हाे । लिग उपाधि जित्दासम्म विशालले दुई खेलमा दुई गोल मात्र खाए । यसबाहेक ११ वटा खेलमा विपक्षीकाे प्रहार सफल हुन दिएनन् अर्थात् क्लिनसिट राखेर उपाधि जिते । उनी उत्कृष्ट गोल रक्षक पनि चुनिएका थिए ।

७ फागुनमा मच्छिन्द्र र थ्रीस्टारबीचकाे खेल विशालका लागि जीवनकाे सयाैँ लिग थियाे । त्याे खेलमा उनले क्लिनसिट राखे । खेल जीवनकाे ५० औँ क्लिनसिट तयार गरे । यसैगरी खेल सुरु भएको ६४ मिनेट हुँदा उनले कुनै गोल नखाएको समय कीर्तिमान् हजार मिनेट पनि छोए ।

यसपालि मच्छिन्द्रलाई उपाधि जिताएसँगै विशाल लगातार चार लिग जित्ने खेलाडी पनि बने । मनाङका लागि दुई मच्छिन्द्रका लागि दुई गरी लगातार चार लिग उपाधि जित्नु विशालकाे अर्को ऐतिहासिक सफलता हाे ।

घरेलु प्रतिस्पर्धाका स्टार विशालले अन्तर्राष्ट्रिय प्रतिस्पर्धा लागि ११ वर्ष कुर्नुपर्‍याे । उनकाे पर्खाइले यसै वर्ष सार्थकता त पायाे तर केवल ४ मिनेटका लागि । भारतविरुद्ध काठमाडौंमा भएको मैत्रीपूर्ण खेलमा उनी ४ मिनेटका लागि मैदान पसेका थिए । त्यसयता उनले राष्ट्रिय टिमबाट खेल्न पाएका छैनन् । तर, घरेलु फुटबलमा उनी अब्बल मानिन्छन् ।