'श्रमिकका मुद्दा कार्यान्वयनमा सरकारकाे सौदाबाजी'

A+ A A-

सरकारले श्रमिकका मुद्दा कार्यान्वयन गर्ने विषयमा रोजगारदातासँग सौदाबाजी गर्ने गरेको नेपाल ट्रेड यूनियन कांग्रेस (एनटियुसी)ले आरोप लगाएको छ । बिहीबार श्रमिकलाई स्थानीय तहको निर्वाचनमा सहभागी गराउने विषयमा पत्रकार सम्मेलन गर्दै एनटियुसीले मजदुरका मुद्दामा मुख्य राजनीतिक दल नै गरैजिम्मेवजारी हुने गरेको आराेप पनि लगाएकाे छ ।

एनटियुसीले आगामी स्थानीय निर्वाचनमा श्रमिकको प्रतिनिधित्व अनिवार्य गराउन पनि नेपाली कांग्रेससँग माग राखेको छ । तीनै तहको निर्वाचनमा श्रमिकको प्रतिनिधित्व हुनुपर्छ भने माग राखेको एनटियुसीका महासचिव योगेन्द्रकुमार कुवँरले पत्रकार सम्मेलनमा बताए ।

सरकारले हरेक स्थानीय तहमा एक जना श्रमिक महिला–पुरुष प्रतिनिधिलाई सामेल गराउनुपर्ने उनले बताए । ‘श्रमिकका मुद्दा धेरै ओझेलमा परेका छन् । मजुदरका मुद्दा स्थापित गर्न पनि श्रमिक प्रतिनिधिको आवश्यक छ । त्यही भएर एनटियुसीले यो माग राखेको हो’, उनले प्रष्ट पारे ।

सरकारले श्रमिकको न्यूनतम पारिश्रमिक, सामाजिक सुरक्षा कोष, श्रमिक स्वास्थ्य उपचार, रोजगारी गुमेका श्रमिकलाई आर्थिक क्षतिपूर्ति र बीमालगायतका विषयमा रोजगारदाता कम्पनीसँग सौदाबाजी गर्दा मजदुरका समस्या समाधान नभएको एनटियुसीको आरोप छ ।

देशमा रोजगारी सिर्जना गर्न र बेरोजगारी समस्या समाधान गर्न समेत सरकारले चासो नदिएको एनटियुसीका अध्यक्ष महेन्द्र यादवले बताए । कोरोनाका कारण बेरोजगारी बढे पनि सरकारको ध्यान नगएको उनको आरोप छ । सरकारले रोजगारी दिन नसके बरोजगारी भत्ता दिनुपर्ने उनको माग छ ।