चुनाव उपयोग गर्ने विप्लवको प्रस्तावले पार्टीमा विवाद, बैठक लम्बियो

A+ A A-

नेत्रविक्रम चन्द विप्लव नेतृत्वको नेपाल कम्यनिस्ट पार्टी (नेकपा) भित्र चुनावी मुद्दाले विवाद उत्कर्षतिर लागेको छ । नेकपाको केन्द्रीय कमिटीको बैठकमा चुनावलाई उपयोग गर्ने कि नगर्ने भन्ने विवादले पार्टी विभाजनउन्मुख गराएको हो ।

नेकपाको कपिलवस्तुको शिवगढीमा केन्द्रीय कमिटी बैठक बसिरहेको छ । बैठकमा महासचिव विप्लवले ३० वैशाख ०७९ को स्थानीय तहको निर्वाचन उपयोग गर्ने कार्यनीतिसहितको राजनीतिक प्रस्ताव पेस गरेका छन् ।

उक्त प्रस्तावको विपक्षमा उभिने नेताहरूको संख्या बहुमत देखिएपछि बैठक लम्बिएको बताइएको छ । नेकपाको ६९ सदस्यीय केन्द्रीय कमिटी बैठकमा बुधबारसम्म ५४ जनाले प्रस्तावमाथि धारणा राखेका छन् । त्यसरी आफ्नो धारणा राख्ने क्रममा अधिकांशले चुनाव उपयोग गर्न नहुने पक्षमा मत राखेका छन् ।

हरेक केन्द्रीय सदस्यलाई आधा घण्टाको दरले आफ्ना धारणा राख्ने समय दिइएको छ । बैठक केही दिन लम्बिन सक्ने नेता हेमन्तप्रकाश ओलीले जानकारी दिए । शिलापत्रसँग ओलीले बैठकमा केन्द्रीय नेताहरूले बोल्ने क्रम जारी रहेको बताए । तर, पार्टीभित्र उठेका विषयमाथि भने केही बताउन चाहेनन् ।

नेकपाको ५ सदस्यीय सचिवालयमा ओली र धर्मेन्द्र बाँस्तोलाले चुनाव उपयोग गर्ने रणनीति गलत हुने बताएका छन् । बाँस्तोलाले चुनाव उपयोग गर्नेभन्दा पनि कार्यकारी राष्ट्रपतिको एजेण्डासहित आन्दोलनमा जानुपर्ने धारणा राखेको एक केन्द्रीय सदस्यले बताए ।

ती केन्द्रीय सदस्यका अनुसार ओलीले भने चुनाव उपयोग गर्नेभन्दा पनि क्रान्तिकारी कम्यनिस्टहरूको एकतामा जोड दिनुपर्ने मत राखेका थिए । तर, महासचिव विप्लवको लाइन भने पार्टी जोगाउने हो भने चुनावलाई उपयोग गर्नुपर्ने बताएका थिए ।

त्यसमा नेता खड्गबहादुर विश्वकर्मा र सन्तोष बुढामगरले साथ दिएका छन् । विप्लवको लाइन भने गठबन्धन गरेर भए पनि चुनावमा परिणाम ल्याउने गरी उपयोगको नीति लिनुपर्ने बताएका छन् । अहिले अधिकांश केन्द्रीय सदस्यले चुनावको लाइनविपरीत धारणा राखेको भए पनि पार्टी निर्णय भने चुनाव उपयोग गर्ने पक्षमै हुने बताइएको छ । केन्द्रीय सदस्यले उठाएका प्रश्नको जवाफ दिने क्रममा विप्लवले चुनाव उपयोगको आवश्यकतामाथि जवाफ दिएपछि निर्णय हुने दाबी गरे ।

विप्लवनिकट स्रोतका अनुसार चुनावको पक्षमा उभिनेहरूमा विप्लव, विश्वकर्मा र बुढामगरसहित माइला लामा, अनिल शर्मा विरही, चिरन पुन, उमा भुजेल, भरत बम, ओमप्रकाश शर्मालगायत छन् । चुनावको विपक्षमा ओली, बाँस्तोला, उदय बहादुर चलाउने, गुणराज लोहनी, सावित्री दुरा, चुणामणि ओलीलगायत रहेका छन् ।

प्रकाशित मिति: बुधबार, चैत ९, २०७८ १७:३७