धनकुटामा ‘क्लीन स्वीप’ गरेको एमालेविरुद्ध चार दलीय गठबन्धन, कसको शक्ति कति ?

धनकुटामा ‘क्लीन स्वीप’ गरेको एमालेविरुद्ध चार दलीय गठबन्धन, कसको शक्ति कति ?

A+ A A-

२०७४ सालको स्थानीय तह निर्वाचनमा प्रमुख प्रतिपक्षी दल एमालेले धनकुटाका सबै स्थानीय तहमा ‘क्लीन स्वीप’ गरेको थियो ।सो निर्वाचनमा ७ स्थानीय तह र ६० वडा रहेको धनकुटाका सबै पालिका र ४३ वडामा एमाले विजयी भएको थियो । उक्त निर्वाचनमा एमालेले ४३, कांग्रेसले ९, माओवादी केन्द्रले पाँच, तत्कालीन संघीय समाजवादी फोरमले दुई र तत्कालीन नयाँ शक्ति पार्टीले एउटा वडा जितेका थिए ।

यसपटकको निर्वाचनमा एमाले आफ्नो वर्चस्व कायम राख्ने रणनीतिसहित चुनावी तयारीमा होमिएको छ । त्यस्तै, नेपाली कांग्रेस, माओवादी केन्द्र, नेकपा (एस) र जनता समाजवादी पार्टीले गठबन्धनको घोषणा गरेका छन् । उनीहरू निर्वाचन परिणाम गठबन्धनको पक्षमा ल्याउने दाबीसहित चुनावी मैदानमा होमिएका छन् । गठबन्धन गर्ने औपचारिक सहमति भए पनि प्राविधिक विषयमा सहमति जुटाउन बाँकी रहेको नेपाली कांग्रेस धनकुटाका सभापति दिनेश राईलेले शिलापत्रलाई बताए । ‘हामी स्थानीय तहको निर्वाचनमार्फत तमाम विसंगति, बेथिति, भ्रष्टाचार, तदर्थवाद, व्यक्तिवाद र असंवैधानिक कदमहरूलाई परास्त गर्न चाहन्छौँ’, उनले भने, ‘त्यसैले चार दल एक ठाउँमा उभिएका हौँ ।’

सभापति राईले चारदलीय गठबन्धनले धनकुटामा एमालेलाई परास्त गर्ने दाबी गरे । ‘हामी एक ठाउँमा उभिनासाथ बलियो अवस्थामा पुगेका छौँ,’ उनले भने, ‘यसपटक उहाँहरूलाई क्लील स्वीप पार्छौं ।’ एमालेविरुद्ध गठबन्धन गरेको माओवादी केन्द्र धनकुटाका अध्यक्ष ऋषिराम ढुंगानाले गठबन्धन गर्ने नीतिगत निर्णय गरिसकेको भए पनि बाँडफाँटका कुराहरू मिल्न बाँकी रहेको बताए । ‘एमालेलाई दम्भ छ । यसपटक हामी त्यो दम्भ तोड्दैछौँ’, उनले भने, ‘गठबन्धनमा प्राविधिक कुराहरू मात्र मिलाउन बाँकी छ ।’

यता एमालेबाट विभाजित भएर बनेको नेकपा (एस) धनकुटाका अध्यक्ष अर्जुन राईले पनि निर्वाचनकाे नतिजा गठबन्धनको पक्षमा पार्न सबै नेता/कार्यकर्ता एक ठाउँमा उभिएको बताए । ‘परिणाम जस्तोसुकै आओस्, हामी धनकुटामा गठबन्धन गरेर अघि बढेका छौँ,’ उनले भने, ‘लेनदेनको विषय मिल्न बाँकी छ, चाँडै बसेर टुंग्याउँछौँ ।’

एमाले विभाजन भए पनि धनकुटामा त्यसको असर नरहेको एमाले नेताहरूले दाबी गर्दै आएका छन् । बरु उल्टै निर्वाचित जनप्रतिनिधिहरूसहित अन्य पार्टीका नेता/कार्यकर्ता प्रवेश गर्ने लहर चलेकाले धनकुटामा आफूहरू पहिलेभन्दा थप मजबुत अवस्थामा रहेको एमाले धनकुटाका अध्यक्ष इन्द्रमणि पराजुली बताउँछन् ।

‘धनकुटामा पार्टी विभाजनको कुनै पनि असर छैन । माओवादीका ८० प्रतिशत नेता/कार्यकर्ता हाम्रो पार्टीमै हुनुहुन्छ । अन्य पार्टीबाट पनि प्रवेशको लहर चलिरहेको छ', उनले भने, ‘हामीले पहिलेभन्दा अहिले अझ फराकिलो मतान्तरले सबै पालिका र वडाहरू जित्छौँ ।’

२०७४ मा यस्तो थियो निर्वाचन परिणाम

२०७४ सालको निर्वाचनमा धनकुटाको शहीदभूमि गाउँपालिका अध्यक्षमा एमालेका मनोज राई दोब्बर बढी मतान्तरले निर्वाचित भएका थिए । उनले ४०५४ मत ल्याउँदा उनका निकटतम प्रतिद्वन्द्वी माओवादी केन्द्रका भरतसिंह राईले १५७९ र कांग्रेसका तीर्थ राईले १५०१ मत प्राप्त गरेका थिए । सो पालिकामा एमालेले उपाध्यक्ष पनि जितेको थियो । सातवटा वडा रहेको शहीद भूमिमा एमालेले वडा नम्बर २, ३, ४, ५, ६ र ७ नम्बर वडा जितेको थियो । नेपाली कांग्रेसले १ नम्बर वडा जितेको थियो ।

त्यस्तै, चौबीसे गाउँपालिकामा पनि अध्यक्ष र उपाध्यक्षसहित चारवटा वडा एमालेले जितेको थियो । अध्यक्षमा एमालेका खजिन्द्र राईले ३७८२ मत प्राप्त गर्दा कांग्रेसका हर्क चेम्जोङले ३२७९ मत प्राप्त गरेका थिए । माओवादी केन्द्रका दलबहादुर मगरले ९८९ मत ल्याएका थिए । सो पालिकाका वडा नम्बर १, ३, ५ र ८ मा एमालेले जितेको थियो । कांग्रेसले ४ र ६ नम्बर वडा जित्दा माओवादी केन्द्रले २ नम्बर वडा र तत्कालीन संघीय समाजवादी फोरमले वडा नं. ६ मा जितेको थियो ।

त्यस्तै, छथर जोरपाटी गाउँपालिकामा पनि एमालेले अध्यक्ष, उपाध्यक्ष र पाँचवटा वडामा जितेको थियो । अध्यक्षमा एमालेका शेरबहादुर लिम्बूले प्रतिद्वन्द्वीभन्दा दोब्बर बढी मत (३३४९) ल्याएर निर्वाचित हुँदा उपाध्यक्षमा एमालेकै भीमकला श्रेष्ठ ३२९८ मतसहित विजयी भएकी थिइन् ।

अध्यक्षमा माओवादी केन्द्रका विष्णुबहादुर लिम्बूले १५३१, राष्ट्रिय प्रजातन्त्र पार्टीका माधवबहादुर भट्टराईले १४५१, नेपाली कांग्रेसका निर्मलप्रसाद ओझाले ४१६ मत प्राप्त गरेका थिए । एमालेले सो पालिकाको १, ३, ४, ५ र ६ नम्बर वडामा जितेको थियो । माओवादी केन्द्रले २ नम्बर वडा मात्र जितेको थियो ।

सदरमुकामसमेत रहेको धनकुटा नगरपालिकाको मेयर, उपमेयरसहित अधिकांश वडामा एमालेले जितेको थियो । मेयरमा एमालेका चिन्तन तामाङले ४९३३ मत ल्याउँदा उनका निकटतम प्रतिद्वन्द्वी नेपाली कांग्रेसका दिनेश राईले ४८१९ र माओवादी केन्द्रका गणेशबहादुर विष्टले २५३७ मत प्राप्त गरेका थिए । उपमेयरमा एमालेकै शकुन्तला बस्नेत ५४६४ मतसहित विजयी भएकी थिइन् ।

धनकुटा नगरपालिकाका वडा नम्बर १, २, ४, ७ र १० मा एमालेले जितेको थियो । त्यस्तै, तत्कालीन नयाँ शक्ति पार्टीले ३ नम्बर वडा, कांग्रेसले ५ र ६, माओवादी केन्द्रले ८ र ९ नम्बर वडामा जितेका थिए । त्यस्तै, पाख्रिबास नगरपालिकामा भने एमालेले मेयर, उपमेयरसहित १० वटै वडामा ‘क्लीन स्वीप’ गरेको थियो । मेयरमा एमालेका वृषबहादुर राई ४४३९ मतसहित निर्वाचित हुँदा उपमेयरमा देवकला पौडेल तिम्सिना ४४२६ मतसहित विजयी भएकी थिइन् ।

मेयर पदका निकटतम प्रतिद्वन्द्वी नेपाली कांग्रेसकी इन्दिरा थापाले १६२८, राष्ट्रिय प्रजातन्त्र पार्टीका श्यामबहादुर गुरुङले १५६५ र माओवादी केन्द्रका कृष्णबहादुर कट्वालले १००६ मत प्राप्त गरेका थिए ।

महालक्ष्मी नगरपालिकामा एमालेले मेयर, उपमेयर र अधिकांश वडामा जितेको थियो । मेयरमा एमालेका पर्शुराम नेपाल ४८९७ मतसहित निर्वाचित हुँदा उपमेयरमा एमालेकै मञ्जुकुमारी कार्की (अधिकारी) ४५३४ (दोब्बर) मतसहित विजयी भएकी थिइन् । मेयरका निकटतम प्रतिद्वन्द्वी नेपाली कांग्रेसका अग्निप्रसाद पौडेलले ३१५६ र माओवादी केन्द्रका रामबहादुर नेपाल १७४६ मत प्राप्त गरेका थिए ।

एमालेले सो नगरपालिकाका १, ५, ६, ७, ८ र ९ नम्बर वडा जितेको थियो । नेपाली कांग्रेसले २, ४ र माओवादी केन्द्रले ३ नम्बर वडा जितेको थियो । त्यस्तै, उक्त निर्वाचनमा साँघुरीगढी गाउँपालिकाको अध्यक्षमा कुमारजंग याक्खा ४४४९ मत र उपाध्यक्षमा विन्द्र राई ४२०९ मतसहित विजयी भएकी थिइन् ।

अध्यक्षमा निकटतम प्रतिद्वन्द्वी नेपाली कांग्रेसका जितेन्द्र राईले ३३३३, माओवादी केन्द्रका जगतबहादुर राई ६९५ र राष्ट्रिय प्रजातन्त्र पार्टीका धर्मध्वज राईले ४७९ मत ल्याएका थिए । सो निर्वाचनमा साँघुरीगढी गाउँपालिकाका वडा नम्बर १, २, ३, ७, ८, ९ र १० नम्बर वडा जितेको थियो । नेपाली कांग्रेसले ५, ६ र तत्कालीन संघीय समाजवादी फोरमले ४ नम्बर वडा जितेका थिए ।

प्रकाशित मिति: बुधबार, चैत ९, २०७८ २२:११