फागुनमा विदेश जाने घटे, साउदी जाने धेरै

A+ A A-

पुस र माघको तुलनामा फागुन महिनामा म्यानपावर कम्पनीबाट वैदेशिक रोजगारीमा जाने नेपाली श्रमिकको संख्या घटेको छ । संस्थागत रूपमा २४ हजार ९८ जनाले श्रम स्वीकृति लिएको वैदेशिक रोजगार विभागको फागुनको मासिक प्रतिवदेनमा उल्लेख छ । माघमा उक्त संख्या ३० हजार २ सय ९७ र पुसमा ३३ हजार १ सय ९३ थियाे ।

समग्रमा फागुन महिनामा ५३ हजार ४ सय ५७ जनाले श्रम स्वीकृति लिएका छन् । माघमा ५४ हजार ४ सय ६५ जनाले श्रम स्वीकृति लिएका थिए । फागुनमा व्यक्तिगत प्रयासमा नयाँ २ हजार ३ सय २९ जनाले वैदेशिक रोजगारीका लागि श्रम स्वीकृति लिएका छन् । वैधानिकीकरण हुने १ हजार ९३ जना र पुनः श्रम स्वीकृतिका माध्यमबाट २५ हजार ९ सय ९७ जनाले श्रम स्वीकृति लिएको विभागले जनाएको छ ।

८ सय ६० मध्ये फागुन महिनामा ६ सय ४८ म्यानपावर कम्पनीले कामदार पठाउन श्रम स्वीकृति लिएका छन् । २ सय बढी म्यानपावर कम्पनीले फागुन महिनामा एक जना कामदारको पनि श्रम स्वीकृति निकालेनन् ।

फागुन महिनामा सबैभन्दा बढी साउदी अरबका लागि ९ हजार १ सय ६० जनाले श्रम स्वीकृति लिएका छन् । साउदी अरबपछि कतार जान ५ हजार ८ सय ४४ जनाले श्रम स्वीकृति लिएका छन् । यूएई जान ४ हजार २ सय ५८ जनाले श्रम स्वीकृति लिएका छन् ।

बहराइनका लागि ७ सय ५६, साइप्रसका लागि २ सय ४९, क्रोएसियाका लागि ७, जोर्डनका लागि १ सय १६, कुवेतका लागि ३ हजार १ सय ५२, मरिससका लागि ३०, ओमानका लागि ३ सय १३ जनाको संस्थागत श्रम स्वीकृति भएको छ ।

अघिल्लो महिनामा जस्तै रोमानिया जाने क्रम फागुनमा पनि देखिएको छ । रोमानियाका लागि २ सय ५ जनाको श्रम स्वीकृति भएको छ । केही म्यानपावर कम्पनीले नयाँ मागको विज्ञापन गराए पनि फागुनमा मलेसियामा संस्थागत रूपमा श्रम स्वीकृति जारी भएकाे छैन ।

प्रकाशित मिति: बुधबार, चैत ९, २०७८ ११:३३