२ वर्षदेखि रिन्यू र जाँचपासबिनै चल्दैछन् ट्याम्पो, इन्धनका लागि एलपी ग्यास

२ वर्षदेखि रिन्यू र जाँचपासबिनै चल्दैछन् ट्याम्पो, इन्धनका लागि एलपी ग्यास

A+ A A-

इमाडोल बस्ने ४२ वर्षीय रामबहादुर भुजेल बिहान डराई–डराई ट्याम्पो निकाल्छन् । २०६४ देखि सेकेन्ड ह्याड ट्याम्पाे किनेर चार जनाको परिवारको गुजारा गर्दै आइरहेका उनलाई ट्राफिकले चिट काट्छ कि भन्ने डर हुन्छ ।

उनले चाहेर पनि ब्लुबुक रिन्यू, जाँचपास, इन्स्याेरेन्स गर्न पाएका छैनन् । इन्स्याेरेन्स नहुँदा दुर्घटना हुन्छ कि भन्ने डर त छँदैछ, ग्यास पम्प नहुँदा उनले गैरकानुनी तरिकाले खाना पकाउने एलपी ग्यास प्रयोग गर्नु परेको छ ।

प्रदूषण नियन्त्रण, दुर्घटना न्यूनीकरण, जाम न्यूनीकरण गर्ने भन्दै सरकारले २० वर्ष पुराना गाडीलाई प्रतिबन्ध लगाएपछि ट्याम्पो व्यवसायीले यस्ताे समस्यो भोग्नुपरिरहेकाे छ । सन् २००१ मा दर्ता भएका ती ट्याम्पो दर्ता भएको २२ वर्ष भइसकेको छ ।

१ चैत २०७२ गतेको मन्त्रिपरिषद् बैठकले २० वर्षभन्दा पुराना सवारीसाधनलाई २ वर्षभित्र विस्थापन गर्ने निर्णय गरेको थियो । यातायात व्यवस्था विभागले मन्त्रिपरिषद्को निर्णयअनुसार काठमाडौं उपत्यकामा १८ फागुन २०७३ देखि २० वर्ष पुराना सार्वजनिक सवारीसाधन सञ्चालनमा प्रतिबन्ध लगाएको थियो ।

त्यसयता भुजेलकाे जस्तै १ सय हाराहारी ट्याम्पो व्यवसायीले यो समस्या भोग्नुपरेको छ । ‘पुरै प्रतिबन्ध लगाएर रोकेको पनि छैन । ट्राफिकलाई रिस उठ्यो भने चिट काट्छ । काठमाडौंका सबै ट्याम्पोमा प्रयोग गरिने ग्यास पम्प बन्द भएकाले खाना पकाउने ग्यास प्रयोग गर्दा अर्को सरकारी टोलीको चेकिङमा परिन्छ कि भन्ने पनि डर छ', उनले भने ।

यस्तै समस्याका कारण उपत्यकामा ३ सय ५० वटा ग्यास ट्याम्पाेबाट १ सयको हाराहारीमा झरेको अन्नपूर्ण सार्वजनिक यातायात सेवाका अध्यक्ष तोयानाथ पोखरेल बताउँछन् ।

‘सरकारको यो निर्णयपछि व्यापारीले ट्याम्पाेको पाट्स ल्याउन छाडे, ग्यास पम्पहरू बन्द भयो, ट्याम्पाेको जाचँपास, बीमा र ब्लुबुक रिन्यू गर्न नपाएको २ वर्ष भन्दा धेरै भयो । गरीखाने स्वरोजगार व्यवसायीले गैरकानुनी तरिकाले काम गर्नु परेको छ', उनले भने । गाडीको आयु तोक्नु भन्दा मेकानिकल चेक जाँचका आधारमा काम हुनुपर्ने पोखरेलको तर्क छ ।

२० वर्ष पुराना गाडीको विषयमा विवादका कारण अहिले कारबाही अगाडि नबढाइएको महानगरीय ट्राफिक प्रहरी महाशाखाका प्रवक्ता सञ्जिव शर्मा दासले बताए । यातायात व्यवसायीहरूले प्राविधिक परीक्षण गरेर मात्रै सवारी साधन पत्रु बनाउनुपर्ने माग गरेपछि विभागले कडाई नगरेको यातायात व्यवस्था विभागका महानिर्देशक नमराज घिमिरे बताउँछन् ।

‘यो पोलिसी रिभ्यू गर्नुपर्छ भन्नेमा म पनि सहमत छु तर पुरानो पोलिसी नआउन्जेल हामीले पुरानैलाई कार्यान्वयनमा लैजाने हो । हामीले गाडीको आयु हेरेर कारबाही गरेका छैनौँ तर, अन्य अनुगमनका क्रममा नियन्त्रणमा आएका सवारी साधनलाई २० वर्ष पुराना छन् भने कारबाही गरेका छौँ', उनले भने ।

प्रकाशित मिति: बुधबार, चैत ९, २०७८ ०८:०७