नेप्से सामान्य अंकले वृद्धि भए पनि कारोबार रकम घट्यो

A+ A A-

शेयरबजारमापक नेप्से परिसूचक मंगलबार पनि सामान्य वृद्धि भएको छ । पछिल्लो दुई सातादेखि निरन्तर रूपमा गिरावट हुँदै आएको नेप्से परिसूचक सोमबारबाट बढ्न सुरु भएको छ ।

सोमबारको कारोबारमा १७.९९ अंकले वृद्धि भएको नेप्से परिसूचक मंगलबार १२.५४ अंकले बढेर भएर २ हजार ६४७.५४ बिन्दुमा पुगेको छ ।

त्यस्तै, सेन्सेटिभ इन्डेक्स २.०६ अंकले बढेको छ भने फ्लोट इन्डेक्स ०.९४ अंक र सेन्सेटिभ फ्लोट इन्डेक्स ०.८१ अंकले बढेको छ ।

मंगलबार कारोबारमा आएका २३५ कम्पनीको ५३ लाख २९ हजार ९९३ कित्ता शेयर २ अर्ब ५१ करोड ८८ लाख ९४ हजार १७८ रुपैयाँ बराबरको कारोबार भएको छ । सोमबारको तुलनामा मंगलबार कारोबार रकममा भने सामान्य गिरावट आएको छ । सोमबार २ अर्ब ५९ करोड २७ लाख १८ हजार १३१ रुपैयाँ बराबरको कारोबार भएको थियो ।

नेप्सेका १३ उपसमूहमध्ये सोमबार १२ वटा उपसमूहको सूचकमा वृद्धि भएको छ भने बाँकी एकवटा उपसमूहको सूचकमा गिरावट आएको छ । जसमा व्यापार उपसमूहको सूचक १.०४ प्रतिशतले गिरावट आएको छ । १२ उपसमूहको परिसूचक पनि त्यति धेरै उत्साहजनक रूपमा वृद्धि भएको छैन । विकास बैंक, जलविद्युत्, फाइनान्स, जीवन बीमा र लगानी उपसमूहको सूचक ० प्रतिशतभन्दा बढीले बढेको छ ।

मंगलबारको कारोबारमा पनि इमर्जिङ नेपालको शेयर सकारात्मक सर्किट लेभलमा कारोबार भएको छ । त्यस्तै, राष्ट्र उत्थान लघुवित्तको शेयरमूल्य ६ प्रतिशतले बढेको छ भने नेपाल लाइफ इन्स्योरेन्सको ५ प्रतिशतभन्दा बढीले बढेको छ । तर कालिका पावर, मैलुङ खोला जलविद्युत्, शिवश्री हाइड्रोपावर र तेह्रथुम पावर कम्पनीको शेयरमूल्य भने २ प्रतिशतभन्दा बढीले घटेको छ ।

कारोबार रकमका आधारमा १० करोडभन्दा बढीको शेयर खरिदबिक्री गरेर नेपाल टेलिकम शीर्ष स्थानमा छ । शिवम् सिमेन्ट र जीवन विकास लघुवित्तको ८ करोडभन्दा बढीको शेयर कारोबार भएको छ ।

प्रकाशित मिति: मंगलबार, चैत ८, २०७८ १६:१४