पुटिनकी कथित प्रेमिकाविरुद्ध युक्रेनमा अभियान, देश निकाला गर्न स्विट्जरल्याण्डसँग माग

पुटिनकी कथित प्रेमिकाविरुद्ध युक्रेनमा अभियान, देश निकाला गर्न स्विट्जरल्याण्डसँग माग

सन् २०१४ मा भ्लादिमिर पुटिन र एलिना काबाएभा । तस्वीरः द टाइम्स डट युके ।

A+ A A-

युक्रेनमाथि रुसी आक्रमणका बीच चर्चामा छिन् जिमनास्ट एलिना काबाएभा । पश्चिमा मिडियाहरूकाे रिपाेर्टअनुसार उनलाई रुसी राष्ट्रपति भ्लादिमिर पुटिनकी 'प्रेमिका' भनेर पनि चिन्ने गरिन्छ ।

पुटिनकाे विराेध गरिरहेका युक्रेन, रुस र बेलारुसका मानिसले एलिनाविरुद्ध अनलाइन पिटिसन सुरु गरेका छन्, जसमा उनीहरू पुटिनकी कथित प्रेमिकालाई देश निकाला गर्न स्विट्जरल्याण्डसित माग गरिरहेका छन् ।

एलिनाविरुद्ध अनलाइन अभियान चलाउनेहरूका अनुसार स्विट्जरल्याण्डमा उनी एक आलिसान महलमा बस्दै आएकी छन् । ३८ वर्षकी एलिना ओलम्पिककी पूर्व जिमनास्ट हुन् । उनले गोल्ड मेडलसमेत जितिसकेकी छन् । पश्चिमी मिडियाकाे दाबीअनुसार उनी पुटिनकी प्रेमिका हुन् । पुटिन र एलिनाका दुई बच्चासमेत छन् ।

मार्च महिनाकाे सुरुवातमै पुटिनले एलिनालाई स्विट्जरल्याण्ड पठाएका थिए । युक्रेनमाथि आक्रमणकाे विराेध गरिरहेका मानिसले अहिले एलिनाविरुद्ध पिटिसन सुरु गरेका हुन् ।

राेचक छ के भने, अमेरिकासमेत कुनै पनि पश्चिमी देशले एलिनामाथि प्रतिबन्धचाहिँ लगाएका छैनन् । उनी रुसकाे नेसनल मिडिया समूहमा बाेर्ड अध्यक्ष छिन् । याे मिडिया समूह रुस सरकारले सञ्चालन गरेकाे हाे, जसले टिभी च्यानल र अखबार चलाउँछ ।

अध्यक्ष पदमा रहेकी एलिनाले बर्सेनि ५८ मिलियन पाउण्ड तलबका रूपमा पाउँछिन् । भ्लादिमिर पुटिन र एलिना काबाएभा एक साथ उति देखिँदैनन् । उनीहरू सँगै निकै कम देखिन्छन् । पूर्व जिमनास्ट एलिना पनि सार्वजनिक मञ्चमा कमै देखिन्छिन् । युक्रेनमाथि रुसले आक्रमण गर्नुभन्दा केही दिनअघि डिसेम्बरमा उनी एक कार्यक्रममा नाचिरहेकाे देखिएकी थिइन् ।

अहिलेसम्म एलिनाविरुद्ध सुरु गरिएकाे अनलाइन पिटिसनलाई ५५ हजार मानिसले समर्थन गरेका छन् । change.org मा दायर गरिएकाे अनलाइन पिटिसनमा भनिएकाे छ, 'हामी रुस, बेलारुस र यूक्रेनका नागरिक याे युद्धले निकै नराम्राेसँग पीडित छाैँ । हामी स्विस अथाेरिटीसँग एलिनालाई बाहिर निकाल्न अपिल गर्छाैं । रुसकाे राजनीति र मिडियासँग जाेडिएकी हस्ती एलिना स्विट्जरल्याण्डमा लुकेकी छन् भन्ने कुरा हामीलाई थाहा छ । उनी रुसमा लगाइएकाे प्रतिबन्धबाट बच्नका लागि त्यहाँ छिपेकी हुन् ।'

पुटिनलाई युद्ध अपराधी करार गर्दै पिटिसनमा भनिएकाे छ, 'उनकी 'प्रिय पत्नी'लाई स्विट्जरल्याण्डले संरक्षण गरिरहेकाे छ । जबकि, पुटिन कराेडाैँ मानिसकाे जिन्दगी समाप्त पार्नमा जुटेका छन् ।'

प्रकाशित मिति: मंगलबार, चैत ८, २०७८ १४:००