निर्दयी ओमबहादुरः आमा मार्न साथीलाई सुपारी, आफैँ हारगुहार

नौमायाको हत्यामा संलग्न छोरा ओम र उनका साथी कुमार (दायाँ) ।

A+ A A-

पैसाले मान्छे कतिसम्म लाल्ची बन्छ ? कास्कीमा सम्पत्ति बेच्न नमान्दा आमाकै हत्या भएको एउटा घटना सार्वजनिक भएको छ ।

गत ४ चैतमा पोखरा-१२, शीतलादेवीस्थित सुकुम्बासी बस्तीकी ६७ वर्षीय नौमाया नेपाली घरमै मृत भेटिएकी थिइन् । हत्या आरोपमा पक्राउ परेका नौमायाका जेठा छोरा ओमबहादुरलाई प्रहरीले सोमबार सार्वजनिक गरेको छ । ओमबहादुरले साथी कुमार गुरुङको सहयोगमा ३ चैतमा आमाको हत्या गरेका हुन् ।

पोखरा-१२, शीतलादेवी बस्ने ३६ वर्षीय ओमबहादुर र सोही वडाको माटेपानी बस्ने ३७ वर्षीय कुमारलाई नौमाया हत्या आरोपमा प्रहरीले सोमबार पत्रकार सम्मेलन गरेर सार्वजनिक गरेको हो । दुवैले हत्या गरेको स्वीकारिसकेका छन् ।

साथीलाई हत्याको सुपारी

फागुपूर्णिमाको दिन राति अबेरसम्म ओमबहादुर र कुमारले अबेरसम्म रक्सी पिए । पटक-पटक सम्पत्ति बेच्न गरेको आग्रह अस्वीकार गरेको झोक ओमबहादुरलाई चढ्यो । त्यसपछि घर फर्किनेबेला उनले साथी कुमारलाई आमालाई मार्न पैसाको लोभ देखाए ।

हत्या स्थल ।

प्रहरीले बताएअनुसार आमाको हत्या गरेबापत ओमबहादुरले कुमारलाई घरजग्गा बेचेपछि एक लाख रुपैयाँ दिने वाचा गरेका थिए । आर्थिक जोहो गर्न कुमार पनि राजी भए र मदिराको लहैलहैमा नौमाया निदाएका बेला हत्या गरे । घटना ३ चैत राति साढे १० बजेको हो ।

नौमायालाई प्यारालाइसिसको समस्या थियो । ओमबहादुर आमाको राम्रै हेरचाह गर्थे । उनले आफैँ आमालाई मार्ने आँट गर्न सकेनन् । उनले ढोका खोलेर साथी कुमारलाई आमाको हत्या गर्न कोठामा पठाएका थिए । हत्यापछि दुवै कुमारको डेरामा गएर सुते ।

कास्की प्रहरीका प्रवक्ता डीएसपी सुन्दर तिवारीका अनुसार घटनाको बिहान आमाको हत्या भएको भनेर ओमबहादुरले नै टोलमा हारगुहार र प्रहरीलाई खबर गरेका थिए । ‘टोलमा बुझ्दा ओमबहादुरले नै आमाको हत्या गरेको भन्ने कसैले शंका गर्ने अवस्था थिएन । आमाको राम्रै हेरचाह गर्ने गरेका थिए,’ डीएसपी तिवारीले भने, ‘हत्यापछि उनीहरू कुमारकहाँ गएर सुते । भोलिपल्ट बिहान घर गएर टोलमा हारगुहार गरे ।’

घटना थाहा पाएपछि जिल्ला प्रहरी कार्यालय, कास्की र वडा प्रहरी कार्यालय, बगरको संयुक्त टोली घटनास्थलमा पुग्यो । सिरकले छोपेको अवस्थामा नौमायाको शव प्रहरीले भेटेको थियो । उनको घाँटीमा निलडाम र अनुहारमा चोट थियो । पटक-पटक आग्रह गर्दा पनि आमाले घरजग्गा बेच्न नमानेपछि मार्ने योजना बनाएको प्रारम्भिक बयान ओमबहादुरले प्रहरीलाई दिएका छन् ।

कुमारले हत्यामात्रै गरेनन् । हत्यापछि ती वृद्धामाथि जबरजस्ती करणीको प्रयास गरेको प्रहरी अनुसन्धानमा खुलेको छ । पक्राउ परेका नेपाली र गुरुङलाई फौजदारी अपराध संहिता, २०७४ अनुसार ज्यानसम्बन्धी कसुरमा ६ दिनको म्याद लिएर प्रहरीले अनुसन्धान थालेको छ ।

प्रकाशित मिति: सोमबार, चैत ७, २०७८ २२:११