एनआरएन युके निर्वाचन : आईसीसी सदस्य सिम्खडालाई कारबाहीको माग

A+ A A-

गैरआवासीय नेपाली संघ (एनआरएन) युकेको हालै सम्पन्न कार्यसमितिको बैठक विभिन्न महत्त्वपूर्ण निर्णय गर्दै सम्पन्न भएको छ।

आगामी सेप्टेम्बर १४ मा संघको निर्वाचन हुँदै गर्दा एनआरएन केन्द्रले जारी गरेको विधानमा उल्लेख भएअनुसार एनसीसी अर्थात् राष्ट्रिय समितिकाको निर्वाचनमा कुनै पनि राजनीतिक तथा जातीय प्यानल बनाउन रोक लगाउने निर्णयलाई समर्थन गर्दै निर्वाचनमा जातीय तथा राजनीतिक प्यानल नबनाउन आग्रह गरिएको छ ।

आइतबार सम्पन्न बैठकको निर्णयअनुसार निर्वाचन समिति गठन गर्ने सम्पूर्ण अधिकार अध्यक्ष योगकुमार फगामीलाई दिइएको जनाइएको छ ।

बैठकले सदस्यताबाट प्राप्त प्रति सदस्य ५० पेन्स हिमाल आरोही निर्मल पुर्जालाई दिने निर्णय गरेको छ ।

यस्तै, बैठकले एक एनसीसी एक परियोजनाअन्तर्गत भरतपुर नगरपालिकामा एम्बुलेसका लागि आर्थिक संकलन गर्ने निर्णय गरेको छ । बैठकले संघको निर्वाचनमा भाग लिन चाहने व्यक्तिहरुको सदस्यता फाराम र शुल्क ३१ जुलाईभित्र अनिवार्य पेस गर्न आग्रह गर्नुका साथै फाराम बुझाउन हरेक दिन १० बजे देखि १ बजेसम्म अफिस खुला राख्ने निर्णयसमेत गरेको छ।

यसैबीच एनआरएन युकेका अध्यक्षका चार प्रत्याशीहरुले एनआरएनए अन्तर्राष्ट्रिय समिति (आईसीसी) सदस्य रामशरण सिम्खडाले निर्वाचन आचार संहिताविपरीत गतिविधि गरेको आरोप लगाउँदै कारबाहीको माग गरेका छन् ।

अध्यक्षका प्रत्याशीहरु शेर सुनवार, प्रेम गहामगर, सुशीला राई र ललित न्यौपानेले एनआरएन युकेका अध्यक्ष फगामीलाई बैठकमा कारबाहीको माग गर्दै एक ज्ञापनपत्र बुझाएका छन् । उक्त ज्ञापनपत्रको बोधार्थ एनआरएन आईसीसी अध्यक्ष्य भवन भट्टलाई समेत दिइएको छ।

संयुक्त उजुरीमा कुनै एक उम्मेदवारका पक्षमा लबिङ गर्ने, जातीय र राजनीतिक समूह बनाउँदै हिँड्ने, उम्मेदवारका सामाजिक सञ्जालमा लाइभ गर्ने र भोट माग्दै हिँड्ने गरेको आरोप लगाइएको छ ।

उनको क्रियाकलापबाट राष्ट्रिय महाधिवेशन सञ्चालनसम्बन्धी नियमावली २०१९ को उल्लंघन भएको समेत दाबी गरिएको छ । उजुरीमा आईसीसी सदस्य सिम्खडाका गतिविधिले निष्पक्षतामाथि गम्भीर प्रश्न खडा भएको जनाइएको छ ।

उजुरीमा त्यस प्रकारका गतिविधि रोक्न नसके बेलायतको नेपाली समाजमा भ्रम सिर्जना भई चरम ध्रुवीकरणमा जाने चेतावनीसमेत दिएका छन् ।