कसरी जोडिइन् अवैध भनिएको क्रिप्टोमा प्रियंका कार्की ?

A+ A A-

नेपालमा अवैध भनिएको क्रिप्टो कारोबारलाई लिएर नायिका प्रियंका कार्कीमाथि प्रहरी केन्द्रीय अनुसन्धान ब्युरो (सीआईबी) ले अनुसन्धान सुरु गरेपछि यसप्रतिको चासो थप बढेको छ ।

सरकार तथा नियामक निकायलाई अहिले क्रिप्टो कारोबार बढ्दै गएको र यसले अर्थतन्त्रका अन्य सूचकमा प्रभाव पार्न थालेपछि चुनौती थपिएको छ । कारोबार गरेको आशंकामा दिन प्रतिदिन प्रहरीले अनुसन्धानको दायरा बढाए पनि कारोबारीको संख्या भने बढ्दै गएको सीआईबीको स्वीकारोक्ति छ ।

अन्य कारोबारीको तुलनामा नायिका कार्कीमाथिको अनुसन्धान भने फरक छ । नायिका कार्कीमाथि कारोबार गरेको नभई कारोबार गर्न उकासेको नाममा छानबिन थालिएको हो । सीआईबीका अधिकारीकाअनुसार उनीमाथि अवैध क्रिप्टोकरेन्सीमा लगानी गर्न उक्साएको आरोप छ । त्योबाहेक कार्कीले क्रिप्टोकरेन्सीमा लगानी गरेको आशंकामा सीआईबीले अनुसन्धान थालेको हो ।

सामाजिक सञ्जालमा नायिका कार्कीको फोटो प्रयोग गरेर क्रिप्टोको कारोबार गर्न विज्ञापन गरिएको सीआईबीका अधिकारीले बताएका छन् । विशेषत: उनीमाथिको अनुसन्धान क्रिप्टो कारोबारसँग जोडेर उनको फोटो प्रयोग गरी भएको विज्ञापनमा केन्द्रित गरिएको छ ।

'अहिले हामीले उहाँमाथि सोधपुछ गरिरहेका छौँ । सामाजिक सञ्जालमा उहाँको फोटो प्रयोग गरेर क्रिप्टोकरेन्सीमा लगानी गर्न उक्साउने खालको पोस्ट भएको देखिन्छ,' ती अधिकारीले भने, 'सोही विषयको अनुसन्धानका लागि उहाँलाई हामीले बोलाएका हौँ ।'

सरकारले अहिले विदेशी विनिमयको सञ्चिति घट्दै गएको र विप्रेषण आप्रवाहमा कमी आएको भन्दै क्रिप्टोको कारोबार बढेको हुन सक्ने आशंका गरेको छ । राष्ट्र बैंकले नेपालमा मात्रै नभई विदेशमा बस्ने नेपालीलाई पनि क्रिप्टो कारोबारमा संलग नहुन आग्रह गर्दै आएको छ ।

प्रकाशित मिति: सोमबार, चैत ७, २०७८ १२:२९