आक्रोशित भिड नियन्त्रण गर्न खटिएकी थिइन्, उनीहरूबाटै मारिइन् प्रहरी जवान उर्मिला

आक्रोशित भिड नियन्त्रण गर्न खटिएकी थिइन्, उनीहरूबाटै मारिइन् प्रहरी जवान उर्मिला

A+ A A-

मोरङको लेटाङमा स्थानीयवासीको आक्रमणबाट एक जना महिला प्रहरीले अनाहकमा ज्यान गुमाइन् । यौन दुर्व्यवहारमा परेकी बालिकाको अनुसन्धानमा खटिएकी २६ वर्षीया प्रहरी जवान उर्मिला श्रेष्ठले ज्यान गुमाउनु पर्‍यो ।

आक्रोशित स्थानीयवासीले श्रेष्ठको घाँटीमा छुरा प्रहार गरेर घाइते बनाएका थिए । प्रदेश १ प्रहरी कार्यालय सशस्त्र प्रहरी गण रानी विराटनगरमा कार्यरत श्रेष्ठ आइतबार राति कोशी अस्पतालमा उपचारका क्रममा मृत्यु भएको जिल्ला प्रहरी कार्यालय मोरङले जनाएको छ । उनीबाहेक मोरङ प्रहरी प्रमुख एसपी जनार्दन जिसीसहित २० जना प्रहरी घाइते भएका छन् ।

प्रहरीकै मृत्यु भएपछि जिल्ला प्रशासन कार्यालयले मोरङको लेटाङमा सोमबार बिहान ७ बजेदेखि अर्को आदेश नभएसम्मका लागि कर्फ्यु जारी गरेको छ । लेटाङ नगरपालिका ३, ४, ५, ६ र ७ नम्बर वडामा कर्फ्यु लगाइएको छ । लेटाङ-५, खेरुवास्थित शिक्षा विकास माविका शिक्षक मनोज पौडेलले सोही विद्यालयमा अध्ययनरत एक बालिकालाई यौन दुर्व्यवहार गरेको आरोप लागेपछि विद्यार्थी र स्थानीयवासी आक्रोशित भएका थिए ।

स्थानीयवासीले शिक्षक पौडेललाई कालो मोसो दलेर बजार घुमाउनुपर्ने माग राख्दै आन्दोलन थालेका थिए । प्रहरीले भने आक्रोशित भिडले पौडेलमाथि कुटपिट गर्ने भन्दै नियन्त्रणमा राखेको थियो । त्यही आक्रोश स्थानीयले प्रहरीमाथि पोखेका हुन् ।

तीन वर्षअघि भर्ती भएकी थिइन् उर्मिला

स्थानीयको आक्रमणमा परेकी प्रहरी जवान श्रेष्ठ तीन वर्षअघि मात्रै प्रहरीमा भर्ना भएको खुलेको छ । १ साउन २०७६ देखि उनी प्रहरी सेवामा लागेकी हुन् । प्रदेश १ प्रहरी प्रवक्ता प्रहरी उपरीक्षक नवीन राईका अनुसार श्रेष्ठ तालिमपछि प्रदेश १ प्रहरी कार्यालय सशस्त्र प्रहरी गण रानी विराटनगरमा कार्यरत थिइन् । खोटाङकी श्रेष्ठका श्रीमान् पनि प्रहरीमै कार्यरत छन् ।

उनका श्रीमान् जिल्ला प्रहरी कार्यालय इलाममा कार्यरत छन् । उनको हत्यापछि भने प्रहरीले लेटाङ क्षेत्रमा सर्च अप्रेसन चलाएको छ । प्रहरीले घटनामा संलग्न पाँच जनालाई पक्राउ गरेको जनाएको छ ।

प्रकाशित मिति: सोमबार, चैत ७, २०७८ ११:५४