लेटाङ घटनाकाे नालीबेली : यसअघि पनि मिलापत्र गरेर उम्केका थिए शिक्षक पाैडेल

A+ A A-

बालिकामाथि यौन दुर्व्यवहार आरोप लागेका मोरङको लेटाङ– ५, खेरुवास्थित शिक्षा विकास माविका शिक्षक मनोज पौडेललाई पाँच वर्षअघि पनि यौन दुर्व्यवहारकै घटनामा मिलापत्र गराएर छाडिएकाे खुलेकाे छ । शिक्षक पौडेलले २०७३ सालमा पनि विद्यालयमा अध्ययनरत एक छात्रामाथि यौन दुर्व्यवहार गर्दा मिलापत्र गरेर छाडेको खुलेको हो ।

लेटाङ– ५ का वडाध्यक्ष भूमबहादुर सूर्य मगरका अनुसार ०७३ सालमा शिक्षक पौडेलले सोही विद्यालयमा अध्ययनरत एक छात्रामाथि यौन दुर्व्यवहार गरेका थिए । ‘०७३ सालमा पनि विद्यार्थीमाथि यस्तै दुर्व्यवहार गरेका थिए', उनले शिलापत्रसँग भने, ‘त्यतिबेला आइन्दा त्यस्तो गल्ती नगर्ने कागज गरेर छाडिएको थियाे । अहिले पनि त्यो कागज छ भन्ने बुझिएको छ ।’

के हो अहिलेको घटना ?

वडाध्यक्ष मगरका अनुसार ४ चैत शुक्रबारका दिन शिक्षक पौडेलले पीडित बालिकाको घरमा गएर उनीसँग पानी मागेका थिए । पानी दिने क्रममा पौडेलले बालिकामाथि यौन दुर्व्यवहार गरेपछि उनी अत्तालिँदै भागेकी थिइन् । लगत्तै शिक्षक त्यहाँबाट हिँडेका थिए । भोलिपल्ट शनिबार थियो । आइतबार पीडित बालिका विद्यालय गएकी थिइन् । उनले शुक्रबारको घटनाबारे साथीहरूलाई भनेपछि सो घटना सार्वजनिक भएको थियो । शिक्षक पौडेलले यौन दुर्व्यवहार गरेको घटनाको जानकारी प्रधानाध्यापक लक्ष्मीप्रसाद मिश्रहुँदै वडाध्यक्ष मगरसम्म पुग्यो ।

त्यसपछि घटनाबारे बुझ्न वडाध्यक्ष मगरसहितकाे टाेली विद्यालय गयाे । शिक्षकलाई कानुनबमोजिम सजाय दिलाउने विषयमा छलफल चलिरहँदा आक्रोशित विद्यार्थी र स्थानीयवासीले ढु‌ंगामुढा तथा तोडफोड र आगजनी गर्न सुरु गरेकाे वडाध्यक्ष मगरले बताए ।

प्रहरी जवानकाे हत्यापछि लेटाङ तनावग्रस्त, अनिश्चितकालीन कर्फ्यु

उनका अनुसार पीडित बालिकाले उनका साथीलाई घटनाबारे बताएपछि अन्य छात्राहरूले आफूहरूमाथि पनि यस्तै व्यवहार हुँदै आएको बताएपछि भिड थप आक्रोशित भयाे । ‘अरु विद्यार्थीसँग पनि त्यस्तै व्यवहारहुँदै आएको भन्ने कुरा आयो’, वडाध्यक्ष मगरले भने, ‘त्यसपछि स्थिति तनावग्रस्त बन्दै गयो ।’

आक्रोशित विद्यार्थी र स्थानीयवासीले शिक्षकलाई कालो मोसो दलेर घुमाउनुपर्ने माग गर्दै प्रदर्शन गर्न थालेपछि लेटाङ नगरपालिकाकी उपमेयर कृष्णकुमारी निरौला, लेटाङ– ५ का वडाध्यक्ष मगर, शिक्षक र विद्यालयका प्रधानाध्यापक विद्यालयमै थुनिएका थिए । विद्यालयमा आगजनीको प्रयास गरेपछि स्थिति तनावग्रस्त बनेको प्रहरीले जनाएको छ ।

विद्यालयको अवस्था तनावग्रस्त बनेपछि पुगेको प्रहरी टोली र प्रदर्शनकारीबीच झडप सुरु भयाे । राति करिब ९ बजेपछि शिक्षक पाैडेललाई पक्राउ गरेर लैजाने क्रममा प्रहरी र स्थानीयबीच झडप भएको वडाध्यक्ष मगरले जानकारी दिए ।

झडपमा परेर प्रहरी जवान उर्मिला श्रेष्ठको मृत्यु भएको छ । छुरा प्रहारबाट गम्भीर घाइते भएकी उनलाई विराटनगरस्थित कोशी अस्पतालमा उपचारका लागि ल्याइएकोमा चिकित्सकले मृत घोषणा गरेका थिए । झडपमा जिल्ला प्रहरी कार्यालय मोरङका प्रमुख प्रहरी उपरीक्षक जनार्दन जीसीसहित १८ प्रहरी र दुई जना स्थानीय बासिन्दा घाइते भएको प्रदेश प्रहरी कार्यालय विराटनगरका प्रवक्ता प्रहरी उपरीक्षक नवीनराज राईले जानकारी दिए ।

झडपमा घाइतेको विराटनगरस्थित कोशी अस्पतालमा उपचार भइरहेको छ । झडपका क्रममा स्थितिलाई नियन्त्रणमा लिन प्रहरीले अश्रुग्याससमेत प्रहार गरेको थियो । सो स्थानमा थप हिंसा भड्किन नदिन मोरङ प्रशासनले सोमबार बिहान ७ बजेदेखि अनिश्चितकालीन कर्फ्यु आदेश जारी गरेको छ ।

प्रकाशित मिति: सोमबार, चैत ७, २०७८ १०:२६