लुम्बिनी प्रदेशसभाको नमुना काम : कानुन निर्माणमा जनसहभागिता सुनिश्चित गर्न मोबाइल एप

लुम्बिनी प्रदेशसभाको नमुना काम : कानुन निर्माणमा जनसहभागिता सुनिश्चित गर्न मोबाइल एप

फाइल तस्वीर

A+ A A-

लुम्बिनी प्रदेशसभाले कानुन निर्माण गर्दा धेरै भन्दा धेरै जनसहभागिता जुटाउने उद्देश्यले मोबाएल एप्लिकेसनबाट प्रदेश र स्थानीय तहका जनप्रतिनिधिमार्फत मत सर्वेक्षण गर्ने कार्यको सुरुवात गरेको छ ।

नविनतम् प्रबिधि मोबाइल एप्लिकेसनको प्रयोगबाट प्रदेश र स्थानीय तहका जनप्रतिनिधिहरूले प्रदेशसभामा कानुन निर्माणका क्रममा जनताको तर्फबाट आफ्नो मत राख्न पाउने ब्यबस्था मिलाइएको प्रदेशसभा सचिवालयले जनाएको छ ।

सचिवालयका अनुसार लुम्बिनी प्रदेशसभामा बिचाराधीन कानुनका मस्यौदाहरूमा सम्बन्धित बिषयगत समितिबाहेक अन्य प्रदेशसभा सदस्य र स्थानीय तहका जनप्रतिनिधिहरूले अनलाइनमार्फत सहभागिता जनाउन पाउने भएका छन् ।

प्रदेशसभामा कानुन निर्माण गर्दा जनस्तरमा पुगेर अधिकतम रूपमा राय, सल्लाह र सुझाव संकलन गर्नका लागि लुम्बिनी प्रदेशसभाले मोबाइल एप प्रयोगमा ल्याएको छ । बिषयगत समितिमा छलफलका क्रममा रहेका बिधियकहरूमाथि जनमत सर्वेक्षणका लागि सहयोग पुर्‍याउ सो समितिमा नरहेका अन्य प्रदेशसभा सदस्यहरू र स्थानीय तहका जनप्रतिनिधिहरू समेतलाई कानुन निर्माणमा सहभागि गराउने उद्देश्यले सो मोबाइल एपको व्यवस्था गरिएको प्रदेशसभा सचिव दुर्लभकुमार पुनले बताए ।

कानुन निर्माणमा प्रदेशसभा र बिषयगत समितिले आफै निर्णय गर्नसक्ने व्यवस्था भए पनि जनस्तरमा राय, सुझाव र सल्लाह संकलनका लागि यो प्रबिधिको प्रयोग गरिएको र यसबाट जनताले अपेक्षा गरे अनुरुप जनमैत्री कानुन बनाउन र निर्णय गर्न सहज हुने बिश्वास गरिएको छ ।

हाल प्रदेशसभा र सबै स्थानीय तहका जनप्रतिनिधिहरूलाई मात्र सहभागी गराइने र भविष्यमा पूर्णरुपमा जनस्तरमा पुर्‍याउने लक्ष्य रहेको छ ।

यूएनडीपीको आर्थिक तथा प्राबिधिक सहयोगमा तयार पारिएको सो मोबाईल एप प्लेस्टोरबाट डाउनलोड गर्न सकिने र सो एपको नाम ई-पोल लुम्बिनी एसेम्ब्ली रहेको प्रदेशसभा सचिवालयले जनाएको छ ।

मोबाइल एपमा चार प्रकारका बस्तुगत र बिषयगत प्रश्नहरूको ब्यबस्था गरिएको तथा प्रदेश र स्थानीय तहका जनप्रतिनिधिले विधेयकबारे आफ्नो राय सुझावसमेत राख्न सक्ने ब्यबस्था मिलाइएको प्रबिधि संचालक बिजयकुमार केसीको भनाइ छ ।

प्रकाशित मिति: आइतबार, चैत ६, २०७८ २०:०६