उपेन्द्र यादवकाे निर्वाचन क्षेत्र राजविराजमा जसपालाई कसले देला चुनाैती ?

A+ A A-

जनता समाजवादी पार्टी (जसपा) का अध्यक्ष उपेन्द्र यादवको निर्वाचन क्षेत्र मात्र होइन, कुनै बेला पूर्वी पहाडको व्यापारिक केन्द्र थियो– राजविराज । प्रदेश बन्नुअघि मात्रै पनि सगरमाथा अञ्चलको राजधानी राजविराजमा पहाडबाट बसाइँ सर्नेहरूको लर्को नै हुन्थ्यो ।

०६५ को मधेस आन्दोलनपछि पहाडी समुदायको वर्चस्व कमजोर मात्र भएन, राजविराजको गुल्जार पनि घट्दो क्रममा थियो । तर, ०७४ को स्थानीय तहको निर्वाचनपछि राजविराजले पुनः रौनक फर्काउन खोजिरहेको छ ।

अहिले राजविराज नगरपालिकालाई थप गुल्जार बनाउन नेतृत्वका लागि कस्सिनेहरूको लामै लर्को देखिन थालेकाे छ । राजविराज नगरपालिकाको मेयरको दाबीका लागि प्रमुख दलका स्थानीय नेताहरूबीच हानाथाप सुरु भइसकेको छ ।

जसपा अध्यक्ष यादव र प्रदेशसभा सदस्य मनिष सुमनको निर्वाचन क्षेत्रमा पर्छ, राजविराज नगरपालिका । त्यसैले नगरपालिकाकाे चुनाव नेताहरूको प्रतिष्ठाको विषयसमेत बनेको छ । जसपाबाट मेयर बनेका शम्भुप्रसाद यादवले पुनः दाेहाेरिने इच्छा देखाएका छन् । मेयर यादवबाहेक जसपाबाट भीमराज यादवले पनि दाबी गरिरहेका छन् । जसपा नेता मनिष सुमनका अनुसार, अहिलेसम्म जसपाबाट आकांक्षा देखाउनेमा यी दुई जना छन् ।

२० चैतभित्र स्थानीय तहको उम्मेदवार तय गर्ने मनसायमा रहेको जसपाभित्र थप आकांक्षीहरू देखिन सक्ने सुमन बताउँछन् ।

यता, लोसपाबाट शैलेश चौधरी वा सुनील झा र साधना झाले मेयरका लागि दाबेदारी गरिरहेका छन् । पार्टीले अहिलेसम्म अनौपचारिक रूपमा छलफल चलाउन नसकेका कारण उनीहरू पार्टी नेतृत्वको विश्वास जित्ने प्रयासमा लागेका छन् ।

अहिले राजविराज नगरपालिकाको उपमेयरसमेत रहेकी साधना झाले आफू स्वतः मेयरको दाबेदार रहेको दाबी गरेकी छिन् । झाले भनिन्, ‘पाँच वर्षको कार्यक्षमताको मूल्यांकन गरेर पार्टीले टिकट देओस् भन्ने चाहन्छु ।’ झाका अनुसार, लोसपाबट सुनिल झा र शैलेश चौधरीले पनि मेयरका लागि दाबी गरिरहेका छन् ।

चौधरी पूर्वमेयर पनि हुन् । राजविराज नगरपालिका भएपछि पहिलाे मेयर हुन् चाैधरी । मेयरका दाबेदार झा भने लोसपाको सप्तरी जिल्ला अध्यक्ष हुन् ।

त्यसैगरी, एमालेबाट शुकराम यादवले मेयरमा दाबी गरिरहेका छन् । यादवबाहेक नरूद्दिन अन्सारी लुकैया पनि मेयरका आकांक्षी छन् । एमालेका केन्द्रीय सदस्य दिवाकर देवकोटाका अनुसार, उम्मेदवारीका लागि दाबेदारहरू देखिन थाले पनि पार्टीले निर्णय लिइसकेको छैन ।

उता, माओवादीभित्र आन्तरिक विवाद देखिएका कारण दाबेदारहरू देखिइसकेका छैनन् । स्थानीय नेताहरूका अनुसार माओवादीबाट महेश यादवलाई उम्मेदवार बनाउने प्रयास भइरहेकाे छ । प्रदेशसभाको उम्मेदवार पनि रहेका यादवलाई मेयरमा उठाउने तयारी गरेको चर्चा राजविराजमा भइरहेको छ ।

त्यता, कांग्रेसबाट भने अर्जुन साह, इर्ताज अन्सारी र शम्भु देव दाबेदार छन् । कांग्रेसमा तुलनात्मक रूपमा दाबेदारको संख्या धेरै देखिएको छ । एकीकृत समाजवादीको तर्फबाट भने ममता चौधरीले मेयरमा दाबी गरिरहेका छन् ।

प्रकाशित मिति: आइतबार, चैत ६, २०७८ २२:११