एआईजी बढुवा सिफारिसविरुद्ध उजुरी दिने असन्तुष्ट डीआईजीहरूको तयारी

A+ A A-

प्रहरी अतिरिक्त महानिरीक्षक (एआईजी) मा बढुवा सिफारिस भएका तीन जना प्रहरी नायब महानिरीक्षक (डीआईजी) विरुद्ध असन्तुष्ट डीआईजीहरूले उजुरी दिने तयारी गरेका छन् ।

मंगलबार गृहसचिव टेकनारायण पाण्डे अध्यक्ष, सदस्य सचिव आईजीपी शैलेश थापा क्षेत्री र प्रधानमन्त्री कार्यालयका सचिव सदस्य रहेको बढुवा सिफारिस समितिको बैठकले डीआईजी बसन्त पन्त, धीरजप्रताप सिंह र रविन्द्र धानुकलाई एआईजीमा बढुवा गर्न सिफारिस गरेको थियो ।

बढुवा समितिको सिफारिसको निर्णय बदर गर्न माग गर्दै डीआईजीहरू घनश्याम अर्याल, ईश्वरबाबु कार्की र प्रकाशजंग कार्कीले बढुवा समितिको सचिवालय गृह मन्त्रालयमा आइतबार उजुरी दिने तयारी गरेका हुन् । असन्तुष्टमध्येका एक डीआईजीले आजै उजुरी दर्ता गर्ने बताए । आफूभन्दा जुनियर ब्याचका डीआईजीहरू सिंह र धानुक एआईजीमा बढुवा सिफारिस भएपछि अर्याल, ईश्वरबाबु र प्रकाशजंगले असन्तुष्टि जनाएका थिए ।

उजुरी दिएका डीआईजीहरू बढुवा सिफारिसमा परेका बसन्त पन्तका ब्याची हुन् । १९ वैशाख २०४९ देखि प्रहरी निरीक्षकमा भर्ना भएका उनीहरू ३० वर्षे सेवा अवधिका कारण एक महिनापछि १९ वैशाखमा अनिवार्य अवकाशमा जाँदैछन् । सिंह र धानुकले भने १९ चैत २०४९ मा प्रहरी निरीक्षकबाट सेवा सुरु गरेका हुन् ।

सिंह र धानुक १९ वैशाखमा हुने प्रहरीको नयाँ आईजीपीको दाबेदारसमेत हुन् । हालका आईजीपी क्षेत्री ३० वर्षे सेवा अवधिका कारण अनिवार्य अवकाशमा जाँदैछन् । उसो त यसअघि नै सिंह र धानुकका ब्याची विश्वराज पोखरेल र सहकुल थापा एआईजी भइसकेका छन् ।

पोखरेललाई केपी ओली नेतृत्वको सरकारले भावी आईजीपीका रूपमा उभ्याउँदै एक वर्षअघि नै एआईजीको दरबन्दी थप गरेर बढुवा गरेको थियो । त्यसको केही समयमै फेरि ओली सरकारले नै थप एउटा एआईजीको दबरन्दी थप गरेर सहकुल थापालाई बढुवा गरेको थियो ।

उनीहरू अहिले आईजीपीको दौडमा छन् । सरकारले प्रहरीमा १२ फागुनमा थप तीन जना एआईजीको दरबन्दी थप गरेका थिए । योसँगै प्रहरीमा एआईजीको दरबन्दी ८ पुगेको छ । सोही दरबन्दीमा पन्त, सिंह र धानुक बढुवा सिफारिस भएका हुन् । तर, उनीहरूले उजुरी दर्ता भएपछि बढुवा प्रक्रिया लम्बिने देखिएको छ । बढुवा सिफारिसविरुद्ध चित्त नबुझे एक हाताभित्र बढुवा समितिमा उजुरी दिनुपर्ने कानुनी व्यवस्था छ । बढुवा सिफारिसविरुद्ध उजुरी दर्ता गराउने अन्तिम म्याद भोलि (सोमबार) सकिँदैछ ।

उनीहरूले उजुरी दिए पुनरावलोकन समितिले अध्ययन गर्नेछ । पुनरावलोकन समितिमा लोकसेवा आयोगका अध्यक्ष, मुख्य सचिव र कानुन, न्याय तथा संसदीय मामिला मन्त्रालयका सचिव सदस्य रहने व्यवस्था छ । उक्त समितिले बढुवा गर्दा कार्य क्षमताका आधारमा बढुवा गर्दा दिएको नम्बरबारे अध्ययन गर्नेछन् । नम्बरमा कुनै कैफियत देखाएमा बढुवा सिफारिस समितिलाई पुनर्विचारका लागि निर्देशन दिनेछ ।

उक्त समितिले पनि बढुवा सिफारिसमा कुनै कैफियत नदेखाए र सोही बढुवा सदर गरे असन्तुष्ट समूह अदालत जान सक्ने कानुनी व्यवस्था छ । हाल एआईजीमा बढुवा सिफारिस भएका पन्त, सिंह, धानुक र असन्तुष्ट अर्यालसहित १० जना यसअघि २८ चैत २०७६ मा सँगै डीआईजी बढुवा भएका थिए ।

डीआईजीमा बढुवा हुँदा भने घनश्याम अर्याल एक नम्बर, प्रकाशजंग कार्की दोस्रो, बसन्त पन्त तेस्रो, ईश्वरबाबु कार्की चौथो, सिंह छैटौँ र धानुक ८औँ नम्बरमा बढुवा भएका थिए । एआईजीको दौडमा भने उत्तमराज सुवेदी, दिवेश लोहनी, बसन्त लामा र अरुण कुमार बीसी पनि थिए ।

प्रकाशित मिति: आइतबार, चैत ६, २०७८ १४:२२