देशभर माओवादीको उभार छ, अरु पार्टीले हामीसँग तालमेल गर्न आउनुपर्छ : प्रचण्ड

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले एकल बलमा ३० वैशाखको चुनाव लड्ने घोषणा गरेका छन् । माओवादी निकट पत्रकारको संस्था प्रेस सेन्टर, गण्डकीले आइतबार पोखरामा आयोजना गरेको पत्रकार भेटघाटमा प्रचण्डले एकल बलमा चुनाव लड्ने तयारी आफूहरूले गरिरहेको बताए ।

‘देशभर माओवादीको उभार छ । त्यसैले अबको चुनावमा कसैको वैशाखी टेकेर होइन एकल बलमा चुनाव लड्ने तयारी गर्दैछौँ । एकचोटी फेरि माओवादी आउनैपर्छ', प्रचण्डले भने ।

देश परिवर्तनको बाहक माओवादी भएकाले आफूहरूसँग अरु पार्टी तालमेल गर्न आउनुपर्ने जिकिर प्रचण्डले गरे । उनले सबैतिर भने एक्लै चुनाव नलड्ने पनि सुनाए । एमालेको नाम नलिई उनले उक्त पार्टी बलियो रहेको ठाउँमा मिलेर जाने संकेत गरेका छन् ।

संविधान, लोकतन्त्र र राष्ट्रियताको रक्षा गर्ने उद्देश्यले गठबन्धन बनेको र उद्देश्य पूरा भइनसकेकाले समझदारी गरेर केही ठाउँमा तालमेल हुने उनले बताए । ‘आफ्नै बलमा चुनाव लड्ने कुरालाई प्राथमिकता दिँदै फेरि हामी गठबन्धनसँग हुन सक्ने जति तालमेल गर्ने कुरालाई प्रष्टसँग भनेका पनि छौँ । पार्टीभित्र विभिन्न विचार भए पनि मूल नेतृत्व मिलेर जाने कुरामा प्रष्टै छ', उनले भने ।

उनले स्थानीय तहको निर्वाचन ३० वैशाखमा हुने दाबी गरे । ‘निर्वाचन तोकिएकै मितिमा हुन्छ । वैशाख ३० मै हुन्छ । दुविधामा बस्नुपर्ने कुनै आवश्यकता छैन', प्रचण्डले थपे, ‘अस्ति प्रधानमन्त्रीजीले चुनावको बिहानसम्म चुनाव हुन्छ–हुँदैन भइराख्छ भन्नुभाथ्यो । म प्रष्ट गर्न चाहन्छु, निर्वाचन तोकिएकै मितिमा हुन्छ ।’

२०६४ सालको चुनावमा माओवादीले कसैले नपत्याउँदो मत ल्याएको बताउँदै प्रचण्डले आगामी चुनावमा पनि पहिलो पार्टी बन्ने जिकिर गरे । ‘२०६४ सालमा शान्ति सम्झौता गरेर आउँदा कसैले पनि माओवादीले जित्छ भन्न सक्ने स्थिति थिएन । ठूला भनिएका दलले त माओवादीले पाँच सिट जित्छ होला भनेर हेप्थे । कोहीले १० सिट जित्छ भन्थे । यथार्थ के हो भने जनताले हामीलाई बहुमत दिएर देखाइदिए', अध्यक्ष प्रचण्डले थपे, ‘२०७४ सालको परिणाम पनि हाम्रो अगाडि छ । अब २०७९ सालको चुनावमा जाँदैछौँ । देशभरको स्थिति हेर्दा हामी पहिलो पार्टी बन्ने सम्भावनातिर अगाडि गएका छौँ ।’

माओवादीले लोकतन्त्रको रक्षा गरेकाले देशभर पार्टीप्रति जनमत बलियो बनेको प्रचण्डको दाबी थियो । गठबन्धन बनाएर प्रतिगमनविरुद्ध निर्णायक भूमिका खेलेकाले जनताले माओवादीको मूल्यांकन गरेको र आफूहरूले आगामी चुनाव जित्ने प्रचण्डले बताए ।

प्रकाशित मिति: आइतबार, चैत ६, २०७८ १०:०९