प्रचण्ड भन्छन्– हामी त भेडा जस्तो भ्या भ्या गर्न थाल्यौँ

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी स्थानीय चुनाव सामान्य र औपचारिक निर्वाचनमात्र नभएको बताएका छन् । शनिवार सिन्धुलीमा माओवादी पार्टी कार्यालय भवनको उद्घाटनपछि आयोजित सभालाई सम्बोधन गर्दै उनले आगामी चुनाव सामान्य नभई माओवादी ‘जनयुद्ध’ तथा माओवादी र सात दलले गरेको संयुक्त जनआन्दोलनका उपलब्धिलाई रक्षा गर्ने वा तिनलाई मर्न दिने भन्ने लडाइँ भएको बताए ।

उनले चुनावमा माओवादी सिंह जस्तो गर्जिनुपर्नेसमेत बताएका छन् । उनले भनेका छन्, ‘जसले यो परिवर्तन ल्याएको हो, तेल्ले हार्नुपर्ने, जो यो परिवर्तन विरोधी हो त्यसले जित्ने चुनाव पनि कहिँ चुनाव हो लोकतान्त्रिक ? त्यसका कारण गुण्डागर्दी गर्ने र धाँधली गर्नेलाई परास्त गर्नुछ ।’

उनले गुण्डागर्दी गर्ने र धाँधली गर्नेविरुद्ध हतियार उठाउनुनपर्ने समेत बताए । तर, तिनिहरूको सात्तो लिनुपर्ने प्रचण्डको भनाइ छ । उनले भने, ‘युवाहरूको टिमबाट गुण्डागर्दी गर्ने, धाँदली गर्नेको सात्तो खानुछ ।’

शान्ति प्रक्रियामा आएपछि माओवादी भेडा जस्तो भएको समेत टिप्पणी गरेका छन् । सिंह र भेडाको कथा सुनाउँदै उनले आफूहरू अहिले भेडा जस्तो भ्या भ्या गर्ने भएको बताए । उनले भने, ‘शान्ति प्रक्रियामा आएपछि भेडासँग हिँड्दा हिँड्दा भ्या भ्या गर्ने जस्तो भयौँ । हुन त हामी सिंह हो । माओवादी त गर्जिनुपर्ने हो । तर, भेडाहरूसँग हिँड्दा हिँड्दा भ्या भ्या गर्न थालियो ।’ उनले फेरि सिंह जस्तै गर्जिन जरुरी रहेको बताए । उनले भने, ‘तर अहिले हतियारको टिम चाहिँदैन, शान्तिपूर्ण टिम बनाउँ । घर घर जाने टिम बनाउँ । गोली चलाउनु छैन, बम पडुकाउनु छैन ।’

प्रकाशित मिति: शनिबार, चैत ५, २०७८ १९:०८